Kara Namodia Dekenai Haheitalai Namona Hahedinaraia
1 Distrik hebouhebou ai, hutuma ai ita hebou neganai, iseda kara bona taunimanima ita kara henidia dalana be taunimanima ese idia itaia haraga diba. Unai dainai, ita ta ta ese Baibel ena hagoadaia herevana ita laloa be gau badana, ia gwau: “Laloa maoromaoro, bona edia tauanina do idia biagua namonamo. Bona oi sibona danu kara namodia do oi hedinaraia.” (Tito 2:6, 7) Namona be ita hekwarahi ‘haida edia namo ita tahua, bona ita durudia noho’ totona. (Fili. 2:4) Iseda “Dirava Ita Hanamoa” Distrik Hebouhebouna dekenai do ita badinaia hagoadaia herevadia haida mani ita laloa.
2 Noho Gabudia Hegaegaelaia: Iseda noho gabudia ita abia hidi neganai, unai be nega namona kara namodia ita hahedinaraia totona. Namona be inai gaudia ita laloatao. (1) Bema noho gabuna oi tahua, emu kongregesen ena seketere amo Mahuta Gabudia ia Naria Dipatmen oi hadibaia. Kongregesen ena seketere ese Mahuta Gabudia ia Naria Dipatmen amo fom ia abia murinai, emu ura gauna ia torea bona unai fom do ia siaia haraga be namo. (2) Noho gabuna oi noia murinai, namona be palani idaudia haida oi karaia lasi. Tadikaka be edia moni do idia halusia kava diba, bema ita momo be noho gabudia ita haidaua. (3) Namona be iseda noho gabuna ita rakatania neganai, ia goeva bona gau ibounai be edia gabu korikori dekenai ita atoa. (4) Ita noholaia gabuna ena taravatu ita badinaia be namo.
3 Ita noholaia gabudia dekenai kara namodia ita karaia be namo. Taunimanima idia diba ita be kara momokani taudia. (Heb. 13:18) Unai dainai, namona be ita hereva momokani taunimanima hida be ita ida daiutu dekenai do idia noho. Bema daiutu lalonai nadunadu karana idia taravatua, namona be ita karaia lasi. Namo lasi ita laloa iseda tadikaka be edia ruma dekenai ita idia abia dae dainai iseda ura gaudia ita karaia diba. Edia heabidae karana ita laloa bada dainai namona be moni sisina ita abia hegaegae aniani bona ma gau haida edia davana karaia totona. Unai dala amo ita be “taunimanima ibounai dekenai kara namodia do ita karaia” bona unai dainai ma haida ita haroro henia diba.—Gal. 6:10.
4 Tama Sina Bona Natudia: Inai tanobada lalonai hemataurai lasi matamata taudia momo idia noho, to iseda natudia be idia idau, bona unai ese Iehova bona iena orea ia hanamoa. To, nega haida, iseda natudia ita naria namonamo lasi neganai, hekwakwanai haida idia vara diba. (Aon. 29:15) Tama sina ese noho gabuna dekenai, eiava hebouhebou gabuna dekenai edia natudia idia rakatania kava be namo lasi.
5 Tama sina haida idia davaria, hebouhebou vairanai edia natudia ese nega ibounai bona gabu ibounai idia karaia be namo karadia idia herevalaia, unai ese idia ia durua bada. (Efe. 6:4) Idia ese natudia idia durua, Keristani lalokau korikorina, unai be “haida hadikaia ia ura lasi” eiava “sibona ena gau ia tahua lasi,” idia lalo-pararalaia totona. (1 Kor. 13:5) Distrik hebouhebou negana be Iehova ese ita ia hadibaia totona idia hegaegaelaia, bona hebouhebou gabudia bona ma gabu haida ai natudia bona taunimanima badadia ese kara namodia idia karaia amo unai dala dekenai hemataurai idia hahedinaraia.—Isa. 54:13.
6 Iseda kara namodia ese lalohadai kereredia idia abia taudia ia durua bona do idia ura ita tomadiho henia Diravana do idia diba. (Mat. 5:16; 1 Pet. 2:12) Iseda kara bona hebouhebou dekenai idia mai taudia ita kara henidia dalana amo ita ese idia ita haroro henidia diba. Inai dala amo ita ese ‘kara namodia do ita hahedinaraia’ bona Iehova do ita hanamoa.—Tito 2:7.
[Study Questions]
1. Dahaka dainai distrik hebouhebou dekenai iseda kara ita naria namonamo be gau badana?
2. Noho gabudia ita hegaegaelaia neganai, dahaka gaudia ita laloatao be namo?
3. Edena dala ai iseda noho gabudia dekenai “taunimanima ibounai dekenai kara namodia do ita karaia” diba?
4, 5. Edena dala ai natudia ese Iehova idia hanamoa diba, bona tama sina dekenai dahaka maduna ia noho?
6. Edena dala ai iseda kara namodia amo ma haida ita durua diba?
[Box on page 5]
Ma Haida Edia Namo Oi Laloa
▪ Oi abia hidi daiutuna sibona oi gaukaralaia
▪ Mahuta Gabudia ia Naria Dipatmen ia naria tadikaka oi hadibaia haraga be namo
▪ Oi noho ruma ena biaguna oi matauraia
▪ Emui natudia umui naria namonamo