Tiokratik Haroro Sikuli Ena Riviu

Inai henanadai be Tiokratik Haroro Sikuli dekenai do ita herevalaia, December 27, 2004 ia matamaia purana ai. Sikuli naria tauna ese miniti 30 lalonai riviu do ia karaia, unai gaudia be November 1 ia lao December 27, 2004 wiki herevadia dekenai. [Itaia: Bema henanadai edia dokona ai buka ta idia torea lasi, sibona emu tahua karana oi karaia be namo haere oi davaria totona.​—Haroro Sikuli bukana, rau 36-7 itaia.]

HEREVA KARANA

1. Ita herevalaia gauna dekenai kamonai taudia edia lalona ita veria dalana namona ta be dahaka? [3, be rau 218 par. 3] Helai taudia edia lalona ita veria ita herevalaia gauna idia laloa matamaia totona. Hahedinaraia edia hekwakwanai, dabu gaudia eiava idia laloa henanadai be inai hereva ese ia gwauraia. Namona be ita hahedinaraia ita be gau tamona sibona do ita herevalaia lasi to ena kahana idauidau danu do ita herevalaia. Unai ita karaia totona ita hegaegae namonamo be namo.

2. Hereva ena dokona idia hanamoa gaudia 5 oi gwauraia. [5, be rau 221 par. 1-5] Hereva dokona ia namo totona, namona be (1) hereva ena sinado ida ia hegeregere, (2) helai taudia oi hadibaia dahaka idia karaia, (3) emu hereva dokona ese idia ia veria unai idia karaia totona, (4) oi hahedinaraia hereva ia doko gwauraia, bona (5) ena lata be ia maoro.

3. Edena bamona ita diba iseda hereva be ia maoro? [8, be rau 224 maua] Namona be (1) bema haere ita diba lasi, haere ita henia lasi, (2) iseda hereva be “hereva momokani” ida ia hegeregere, (3) diba ma haida ita tahua bona (4) namba, hereva bona ekspiriens ita hamomokania guna, bona ita gaukaralaia neganai ita habadaia kava lasi. (2 Tim. 1:​13)

4. Edena bamona kongrigeisen ai ita henia hereva amo ita hahedinaraia ita abia dae momokani kongrigeisen be “hereva momokani ena du bona hereva momokani ia gimaia maguna”? (1 Tim. 3:​15) [8, be rau 224 par. 1-4] Hereva momokani ita abia isi totona, ita ura gaukaralaia siri edia anina ita lalo-pararalaia maoro guna be gau badana. Edia badina siridia bona anina ita laloa neganai, ‘hereva momokani ita badinaia.’ (Tito 1:9) Bema iseda hereva be “hereva momokani” ida ia hegeregere bona hesiai tauna mai ena kamonai bona mai ena kara maoromaoro oreana amo ita abia tulu amo Baibel siri edia anina bona badinaia daladia ita hahedinaraia, iseda hereva do ia maoro.

5. Niusi herevadia, magasin eiava buka edia hereva bona ekspiriens gaudia dekenai, Aonega Herevadia 14:15 be edena bamona ita badinaia diba? [9, be rau 225 par. 1] Unai bamona gaudia be ita abidadama henia diba gabudia amo ita abia be namo. Unai sivarai be ia maoro ita diba totona, ita sibona ita nanadaia: ‘Unai sivarai be hari danu ia maoro, a? Hanaihanai inai hereva idia halasia taudia edia hereva be maoro, a? Ita abidadama henia diba gabudia amo inai hereva ena maoro ita hamomokania diba, a?’ Bema ita laloa hereva ta be reana ia maoro lasi, ita gaukaralaia lasi be namo.

HEREVA NAMBA 1

6. Abata negana amo ia giroa lou Adamu ia vara negana be edena bamona ita duahia diba? [1, bsi04 Stadi Namba 3 par. 12] Unai nega ena lagani 1,656 be Genese 5:​3-29 bona 7:​6, 11 ai ia noho. Unai siri ese Adamu ena nega amo ela bona Noa ena negai idia vara tatau haida ia gwauraia bona idia ese ma ta idia havaraia neganai, edia mauri lagani be hida ia gwauraia danu.

7. Iesu ese ena haroro gaukara ia matamaia deit be edena bamona ita diba, bona dahaka dainai ita abia dae Iesu be lagani toi mai kahana sibona ia haroro? [2, bsi04 Stadi Namba 3 par. 16] Luka 3:​1-3 ai ia noho herevana bona histori ese ia hamomokania lagani 14 C.E. ai Tiberio Kaisara ena lohia negana ia matamaia, unai ese ia hahedinaraia lagani 29 C.E. be mai anina bada, badina unai neganai Iesu be ena haroro gaukara ia matamaia. Ioane buka dekenai ia hahedinaraia Pasova 4 idia karaia, unai ese ia hamomokania Iesu ena haroro gaukara ena daudau be lagani toi mai kahana. (Ioa. 2:​13; 5:1; 6:4; 12:1; 13:1)

8. (a) “Ierusalema hanamoa lou bona haginia lou herevana” be edena negai idia halasia? (b) Unai nega amo lagani hida idia ore guna bena Iesu be Mesia bamona do ia hedinarai? (Dan. 9:​24-​27; NW ) [3, bsi04 Stadi Namba 3 par. 18-​19] “Ierusalema hanamoa bona haginia herevana” be lagani 455 B.C.E. ai idia halasia. (Neh. 2:​1, 17) Pura 69, eiava lagani 483, be ia lao ela bona lagani 29 C.E. ena keru matamaia negana ai, Iesu ia bapatiso bona Dirava ese lauma helaga amo ia horoa neganai, ia be Mesia ai ia lao.

9. Baibel ese taunimanima edia mauri be edena bamona ia haidaua? [7, gm karoa 13 par. 1, 4, 8, 9] Dirava ita dibaia bona diba maoromaoro ita abia amo ita diba edena kara ita haidaua bona edena ita hahedinaraia matamaia be namo. (Efe. 4:​22-24; Kol. 3:​8-10)

10. Dirava ena taravatu mahuta hebou karana dekenai be dahaka? [8, tp karoa 13 par. 1-5] Dirava vairanai headava tau bona hahine sibona idia mahuta hebou be maoro. (Heb. 13:4)

WIKI TA TA ENA BAIBEL DUAHIDUAHI

11. Dahaka dainai Israela taudia ese rara idia bubua lasi mase animal, idia sibona ese idia ania lasi gauna unai, be idau bese tauna dekenai idia hoihoilaia? (Deu. 14:21) Baibel lalonai, inai hereva “idau bese tauna” be Iuda tomadiho ia abia dae Israela lasi tauna, eiava unai tano ena taravatu badadia ia badinaia to Iehova tomadiho henia tauna ta ai ia lao lasi tauna ia herevalaia. Unai idau bese taudia be Taravatu henunai lasi bona unai dainai rara idia bubua lasi animal be dala idauidau ai idia gaukaralaia diba. Israela taudia be unai bamona animal be idau taudia dekenai idia henia eiava idia hoihoilaia be kerere lasi. To Iuda tomadihona ia abia dae tauna be Taravatu henunai ia noho dainai, unai bamona do ia karaia lasi. Levitiko 17:10 ese ia hahedinaraia bamona, unai bamona tauna be animal ena rara do ia ania lasi. [1, w04 10/1 rau 28]

12. Deuteronomi 20:​5-7 ese ita dekenai dahaka ia hadibaia? Edia noho dalana ia idau taudia dekenai hebogahisi ita hahedinaraia, ena be ita karaia noho gaukara be mai anina bada. [2, w04 10/1 rau 29]

13. Dahaka dainai tau ta ese ena abiatorehai ena davana totona ma ta ena “uiti moia nadi rua” ia abia karana be hegeregere ta ena mauri ia kokia bamona? Uiti moia nadi rua be tau ta ena “mauri” ia laulaulaia. Unai gaudia abia karana ese unai ruma bese edia dina ta ta aniani abia dala do ia koua. [3, w04 10/1 rau 28]

14. Taravatu ia gwau Israela taudia ese digara do idia ania lasi, unai dainai idaunegai Heberu Revarevadia ai inai hereva, “mamoe natudia tau edia digara idia ania” ena anina be dahaka? Unai hereva be laulau dalanai idia gaukaralaia bona ia ese mamoe oreana namo herea ia laulaulaia. Heberu Revarevadia lalonai, unai siri tamona ese “uiti ena digara” bona “vain huahua ena rara” ia herevalaia danu. [5, w04 10/1 rau 29]

15. Hari inai negai, Akana ia karaia kerere hegeregerena be dahaka? (Ios. 7:​1-​26) [7, w87 1/1 rau 22 par. 20] Lagani 1919 amo ela bona hari, mataganigani “uda sisia dikadia,” Dirava ena dala idia dadaraia bona sibona edia ura dalana idia badinaia taudia, Akana bamona, be Dirava ena taunimanima bogaragidiai idia hedinarai. Idia laloa namona be Babulonia ena hahediba herevadia do idia lou henia. Mai edia aonega dikana danu idia ese haida idia hadaradaraia toho, do idia daradara ita be “nega dokona” ai ita noho hari eiava lasi, bona Iehova ena Witnes taudia edia gaukara idia koua toho. Edia kara dainai orea amo idia atodia siri. (Kara 20:29; 2 Pet. 3:​3, 4; 2 Ioa. 10, 11)