Gau Idauidau Itaia Namonamo Karana amo Ma Haida Laloa Bada
1 Iehova Dirava bona Keriso Iesu idia itaia namonamo taunimanima edia dabu gaudia be dahaka, bena unai hegeregerena heduru idia henia. (2 Siv. 16:9; Mar. 6:34) Iseda haroro gaukara lalonai ita davaria taudia edia ura bona idia laloa bada gaudia ita diba neganai, unai hegeregerena iseda haroro herevana ita gwauraia diba.
2 Gau Idauidau Itaia Namonamo: Iesu ese gau idauidau ia itaia namonamo. (Mar. 12:41-43; Luka 19:1-6) Unai hegeregerena, ruma ta dekenai ita lao bona unai ruma dekenai tomadiho herahera gaudia, motuka dekenai idia torea herevadia, eiava natudia edia gadara gaudia ita itaia neganai, dala ia kehoa anina namona ia havaraia dalanai sivarai namona ita gwauraia totona.
3 Tau ta ena hemami be ena vairana ena toana bona ena kara amo ia hahedinaraia diba. (Aon. 15:13) Reana ena lalokau tauna ta ia mase eiava lalohisihisi gauna ma ta dainai heduru ia abia be namo. Reana siri namodia haida be ia dekenai ita duahia neganai, unai ese ena lalona do ia hagoadaia. (Aon. 16:24) Ruma tauna be ia haraga noho gabu ta dekenai ia lao totona, a? Eiava ia tai noho beibi ia rosia, a? Bema unai bamona, namona be dala ita karaia nega ma ta ai ia ita vadivadi henia totona. Unai dala amo ruma tauna ita laloa, bona reana gabeai ita lou henia neganai, iseda hereva do ia kamonai henia.—1 Pet. 3:8.
4 Haroro Herevana Haidaua: Aposetolo Paulo be Atena hanua dekenai ‘idia diba lasi Dirava ena’ boubou patana ta ia itaia. Unai dainai, sivarai namona ia harorolaia neganai, ia gwau: “Inai dainai umui diba lasi Diravana, to umui tomadiho henia, unai Dirava ena kara do lau hadibaia umui. To haida be ia dekenai idia hakapua, bona abidadama henia taudia idia halaoa.” Paulo ena haroro dalana namona dainai, unuseniai idia noho taudia haida ese Basileia ena sivarai idia abia dae bona abidadama taudia ai idia lao.—Kara 17:23, 34.
5 Unai hegeregerena, bema gau idauidau ita itaia namonamo, unai ese ita do ia durua tau ta ia laloa bada gaudia ita diba totona, bena unai hegeregerena iseda haroro herevana do ita gwauraia. Henanadai ita gaukaralaia ruma tauna ena lalohadai ita dibaia totona. Ena ura idia habadaia Baibel siridia ita gaukaralaia. (Aon. 20:5) Bema gau idauidau ita itaia namonamo bona ma haida ita laloa bada, unai ese ita do ia durua anina namona ia havaraia dalanai sivarai namona ita gwauraia totona.