Ruma Tauna Durua Ia Laloa Namonamo Totona
1. Haroro gaukara ai edena hereva dalana be mai ena namo?
1 Haroro gaukara ai edena hereva dalana be mai ena namo—dala aukana ai eda lalohadai ita gwauraia o eda hereva amo ruma tauna ita durua ia laloa namonamo bona lalohadai maorona ia abia, a? Aposetolo Paulo be Tesalonika ai idia noho Iuda taudia ia durua idia laloa namonamo totona, bona “unai dainai idia haida be abidadama taudia ai idia lao.” (Kara 17:2-4) Edena dala ai haida ita durua idia laloa namonamo totona?
2. Sivarai namona ita harorolaia neganai, edena dala ai Paulo ena haheitalai ita tohotohoa?
2 Hemami Bona Mauri Dalana Laloa: Teritori ai taunimanima ita durua idia laloa namonamo totona, edia hemami bona idia abia dae gaudia ita diba be namo. Areopagu Ororona ai, Paulo be abidadama lasi Greek taudia idia dibaia bona abia dae gaudia amo ena hereva ia hamatamaia. (Kara 17:22-31) Unai dainai, hamatamaia hereva oi hegaegaelaia neganai, emu teritori ai taunimanima ese idia abia dae gaudia bona ura lasi herevadia oi laloa. (1 Kor. 9:19-22) Bema ruma tauna be henanadai ta ia henia, namona be ia laloa bada gauna oi laloa, bona unai amo emu hereva oi habadaia.
3. Edena dala ai henanadai ita gaukaralaia, ma haida ita durua idia laloa namonamo totona?
3 Henanadai Gaukaralaia Namonamo: Loaloa tauna ta ita durua ia lao henia gabuna ia davaria totona, namona be hari ia noho gabuna ita diba guna. Unai hegeregerena, ruma tauna ita durua lalohadai maorona ia abia totona, namona be hari ia abia lalohadaina ita diba guna. Iesu be ena lalohadai ia do gwauraia lasi neganai, nega momo henanadai ia henia, kamonai tauna ena lalohadai ia dibaia totona. Hegeregere, ta ese Iesu ia nanadaia, “Dahaka lau karaia be namo mauri hanaihanai lau abia totona?” Iesu be henanadai amo unai tauna ena lalohadai ia dibaia guna bena ia haere. (Luka 10:25-28) Nega ma ta ai, Petero be haere kererena ia henia neganai, ena lalohadai hamaoromaoroa totona Iesu be henanadai ia gaukaralaia namonamo. (Mat. 17:24-26) Unai dainai, bema ruma tauna be henanadai o lalohadai kererena ta ia gwauraia, henanadai ita gaukaralaia amo ita durua ia laloa namonamo totona.
4. Dahaka dainai ruma tauna ita durua ia laloa namonamo totona?
4 Bema ruma tauna ita durua ia laloa namonamo, ita be Hadibaia Tauna Badana, Iesu, bona aposetolo edia negai haroro idia diba namonamo taudia ita tohotohoa. Namona be ruma tauna ita laloa bada bona matauraia. (1 Pet. 3:15) Unai amo do ia ura dikadika ita lou henia.