Lou-Henia Karaia Dala Namodia
1 Hanaihanai lou-henia oi karaia, eiava oi davaria ia be auka badina oi diba lasi dahaka do oi gwauraia, a? Namo lasi oi gari. Gau toi ese oi do idia durua unai gaukara do oi kwalimulaia totona: (1) oi hegaegae namonamo; (2) Baibel ena sivarai haida edia hereva badadia oi kikilaia diba; bona (3) ruma tauna ena hereva oi kamonai namonamo.
2 Oi hegaegae lou-henia oi itaia neganai, ruma tauna dekenai oi gwauraia diba hereva namona ta oi abia hidi. Ia be stiuden ta, a? Stiuden momo ese nega do idia atoa hereva badadia umui kikilaia hebou, badina idia ura gau momo dekenai edia lalo-parara idia habadaia. Reana idia haida be Basileia ena sivarai idia ura kamonai. Oiemu vadivadi ginigunanai henanadai ta oi gwauraia, eiava ruma tauna be hereva ta ia ura bada kamonai? Guna oi torea herevana oi itaia, bona Reasoning buka oi gaukaralaia sivarai haida do oi diba totona, unai neganai lou-henia hereva namona do oi henia diba. Lou-henia oi karaia neganai, hebogahisi bona moale toana oi hahedinaraia. Ruma tauna oi hanamoa neganai ena ladana oi gwauraia.
3 Bema guna ruma tauna dekenai Gima Kohorona bona Noga! magasin oi hariharilaia neganai, oi lou henia neganai, unai magasin amo hereva tamona o rua oi abia hidi do umui kikilaia totona. Bema oiemu vadivadi ginigunanai pepapepa ta oi hariharilaia neganai, oi lou henia neganai unai pepapepa ena sivarai ta oi kikilaia diba eiava magasin eiava buklet ena hereva namona oi kikilaia diba.
4 Bema “Mauri mai Mainona Tanobada Matamatana Lalonai” pepapepana oi hariharilaia neganai, oi gwau:
◼ “Guna lau vadivadi neganai, Dirava ena gwauhamata tanobada matamatana mai mainona ita kikilaia. Ita kikilaia bamona, Dirava ena Basileia ese gau namodia do ia havaradia. Dahaka ita karaia diba unai maino tanobada matamatana dekenai ita vareai totona?” Oi naria sisina ruma tauna ena lalohadai ia gwauraia totona, bena Salamo 37:9, 11, 29 ena hereva umui kikilaia hebou.
5 Bema “Helaro Namona Mase Taudia Totona be Ia Noho A?” pepapepana oi hariharilaia neganai, inai hereva kwadogi amo hereva oi hamatamaia diba, oi gwau:
◼ “Guna lau vadivadi neganai, iseda kiki dokonai, Helaro Namona Mase Taudia Totona be Ia Noho A? pepapepana lau rakatania oi dekenai. Paragraf toi ai henanadai namodia haida idia gwauraia: ‘Dahaka dainai taunimanima idia mase? Mase taudia be edeseniai? Bona edena bamona ita diba momokani do idia mauri lou?’ Bona hereva kwarana maragina ‘Mase, bona Iena Anina Ita Dekenai’ ese unai henanadai ta ta edia haere ia henia. Unai pepapepa ta ia noho lau dekenai. Paragraf 4 mani oi itaia.” Ruma tauna ese paragraf ia itaia noho lalonai, paragraf oi duahia bona unuseniai Baibel siri rua oi duahidia danu, bona ruma tauna oi henanadai henia ena lalohadai be dahaka. Iena lalohadai ia gwauraia neganai, ena hereva ta ta oi kamonai namonamo bona oi durua toho.
6 Umui kiki hebou lalonai, reana ruma tauna ese ena lalohadai ia gwauraia to ena lalohadai haida be idia maoro lasi. Namo lasi ena hereva iboudiai oi hakoikoia toho. Namona be umui herevalaia herevana sibona umui kikilaia. Gabeai oi lou henia neganai Baibel amo ena lalohadai oi hamaoromaoroa toho diba.
7 Namona be lou-henia karaia dala namodia amo kamonai taudia ita durudia.
[Questions]
1. Dahaka gau toi ese oi idia durua lou-henia namodia oi kwalimulaia totona?
2. Oi hegaegae lou-henia ta oi karaia neganai, dahaka gaudia haida oi laloa be namo?
3. (a) Magasin oi hariharilaia neganai, oi lou henia totona hegaegae dalana be edena bamona? (b) Pepapepa oi hariharilaia neganai, oi lou henia neganai dahaka do oi hereva?
6. Bema ruma tauna ena lalohadai kereredia ia gwauraia, oi ese dahaka do oi karaia?