Mauri Havaraia Gaukarana Ita Durua Namonamo Dalana
1 Aposetolo Paulo ese sivarai namona harorolaia dalana ia haidaua “haida do [ia] veria mauri totona.” (1 Kor. 9:19-23) Ia hegeregerena, ita haroro neganai bema ita gima noho ruma taudia edia lalohadai ita diba totona, bona iseda hereva ita haidaua idia ura henia sivaraina do ita kikilaia totona, iseda haroro gaukara dekenai do ita kwalimu. Unai ita karaia be auka lasi Gima Kohorona bona Noga! magasin eiava buklet ta ita hariharilaidia neganai.
2 Ruma tauna oi hanamoa murinai, reana inai bamona do oi hereva diba:
◼ “Taunimanima momo idia lalohisihisi badina tanobada ena gavamani be hari idia vara hekwakwanai momo idia haoredia diba lasi. Haida idia gwau hekwakwanai idia davaria be gavamani ena kerere dainai. Oi laloa gavamani ta be ia hegeregere iseda mauri durua gaudia iboudiai ita ia henia totona, a? [Naria ia haere totona.] Gwauhamata namona ta ese ita ia hadibaia gavamani ta do ia mai bona iseda hekwakwanai iboudiai do ia kokidia; dahaka oi laloa unai hereva dekenai?” Ruma tauna ena haere oi kamonai henia namonamo. Bena oi gima noho kiki hereva idauidau amo namona ta oi abia hidi iena haere hegeregerena oi herevalaia totona.
3 Bema ruma tauna ena hereva amo sibona ia gwauraia ia be Keristen tauna, ita nanadaia, ita gwau reana ia ese “Aiemai Tamana,” eiava Lohiabada Gurigurina ia diba. Bema ia haere, oibe, ita be unai guriguri herevana do ita gwauraia ela bona “Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.” (Mat. 6:9, 10) Unai ese ia hahedinaraia Iehova ena ura be gabeai inai tanobada dekenai do ia vara. Bena Gima Kohorona eiava Noga! magasin amo, eiava Inai Gavamani ese Paradaiso Do Ia Mailaia buklet ena rau 3 ai, ia kikilaia herevana do oi hahedinaraia.
4 Bema ia hedinarai ruma tauna be Dirava ia abidadama henia lasi, reana Heberu 3:4 oi duahia bona Dirava ese Ita Ia Laloa Eiava? buklet oi kehoa rau 4 dekenai. Paragraf 1 bona 2 oi duahidia bona murinai rau henunai ia noho henanadai oi gwauraia. Eiava magasin matamatana ta amo unai bamona sivarai oi hahedinaraia ia dekenai.
5 Bema ruma tauna ia laloa ia noho namo vadaeni, reana inai henanadai oi henia diba:
◼ “Dahaka dainai Baibel ena hereva gavamani dekenai do ita laloa be gau badana?” Bena Reasoning buka ena rau 154 bona 155 dekenai ia noho sivaraina do ita gaukaralaia diba, unuseniai idia torea hereva 8 amo tamona eiava rua do oi kikilaia ia dekenai. Bema ruma tauna ia ura kamonai noho, namona be Inai Tanobada Do Ia Ore Eiava? pepapepana oi gaukaralaia, oi kehoa rau 2 ai, bona paragraf 1 amo sivarai oi gwauraia umui kikilaia noho totona.
6 Nega ginigunana ruma tauna oi vadivadi henia neganai, namona be ena lalona oi veria bena do ia ura oi lou mai, hereva ma ta do ia kamonai totona. Unai dainai, namona be lalona veria henanadai namona ta oi henia bona oi hamaoroa do oi giroa mai neganai haere do oi gwauraia.
7 Atai hereva amo oi dekenai ia hegeregere herevana oi abia hidi. Unai heduru herevadia haida oi haidaudia oiemu teritori dekenai idia hegeregere totona. Do oi gaukaralaia buklet, pepapepa, bona magasin edia hereva do oi diba namonamo, unai neganai emu hereva oi haidaua haraga diba ruma tauna oi durua totona. Namona be “Sivarai Namona dainai” ita iboudiai be iseda kiki herevadia do ita hegaegaelaidia namonamo, bena unai mauri havaraia gaukarana do ita karaia namonamo diba.—1 Kor. 9:23.