Ful-Taim Hesiai Gaukara Ena Moale
1 Oi be matamata dainai, reana emu vaira negana oi laloa vadaeni. Aonega Herevadia 21:5 ese ita ia hadibaia, “ia gaukara noho tauna ena laloa [“palani,” NW ], ese anina ia havaraia bada noho.” Emu mauri lalonai oi tahua gaudia oi laloa namonamo be namo. Emu vaira negana totona palani oi karaia lalonai, ful-taim hesiai gaukara oi laloa. Dahaka dainai?
2 Bema edia matamata laganidia lalonai painia gaukara idia karaia taudia edia lalohadai oi nanadaia, hanaihanai idia ibounai edia haere be tamona: “Egu mauri lalonai unai be lagani namodia!” Ena matamata negana amo ful-taim hesiai gaukara ena moale ia mamia noho tadikaka ta be gabeai ena mauri lalonai ia gwau: “Egu matamata negana lau laloa bona lau moale bada, badina lau gwau diba inai aonega sisiba lau badinaia: ‘Oi be eregabe neganai, ia ese oi ia karaia Dirava do oi laloa.’ ” (Had. 12:1) Hari, oi bona emu tama sina ese palani namona umui karaia be namo, emu matamata laganidia lalonai unai bamona moale ia havaraia dalana oi davaria totona.
3 Tama Sina E, Ful-Taim Hesiai Gaukara Totona Umui Hagoadadia: Iehova be umui ia laloa bada Tamana dainai, umui dekenai emui raka dalana ia hahedinaraia. (Isa. 30:21) Unai bamona lalokau dalanai umui ia hakaua dainai, umui Keristani tama sina dekenai ia be haheitalai namona. Emui natudia ese edia raka dalana idia abia hidi be namo lasi, to mai aonega ida idia dekenai edia raka dalana umui hadibaia be namo, Iehova ena hahenamo idia abia totona. Bena, idia bada idia lao neganai, umui hadibadia dainai “maoro bona kerere edia toana idia diba namonamo.” (Heb. 5:14) Taunimanima badadia be edia mauri lalonai idia vara gaudia dainai idia diba momokani sibona edia lalohadai idia abidadama henia diba lasi; Iehova dekenai idia tabekau be namo, ia ese idia dekenai dala maorona ia hadibaia totona. (Aon. 3:5, 6) Bona matamata taudia dekenai unai be gau badana, badina mauri idia do diba namonamo lasi.
4 Tama sina e, emui natudia edia mauri lagani be 13 ai idia lao neganai, eiava unai nega vairanai, idia dekenai edia mauri lalonai idia ura do idia karaia gaudia umui herevalaia. Reana varavara, sikuli ena sisiba henia taudia, tisa taudia, bona sikuli turadia ese edia lalona idia veria toho, tanobada gaudia idia tahua totona. Bema kosi idauidau idia noho, emui natudia umui durua, sikuli kosi namodia idia abia hidi bona unai amo edia tauanina durua gaudia idia abia diba, bena Basileia gaudia idia tahua guna noho. (1 Tim. 6:6-11) Nega haida, haisikuli murinai tadikaka eiava taihu ta be imana gaukarana ta idia hadibaia sikuli dekenai ia lao eiava gaukara gabuna ai diba ia abia dainai, pat-taim gaukara ia davaria diba bona regula painia gaukara lalonai mauri durua gaudia do ia abia diba. Ma haida ese sibona idia naria diba badina uma gaukara idia karaia. Reana haida ese maketi dekenai aniani eiava gau ma haida idia hoihoilaia diba, bena regula painia gaukara idia hamatamaia neganai edia mauri durua gaudia idia abia.
5 Matamata taudia umui hagoadaia idia headava haraga lasi totona. Bena gabeai bema idia ura headava, idia hegeregere headava ena maduna metaudia do idia huaia. Bema mai moale ida painia gaukara, haroro taudia be momo lasi gabuna ai haroro gaukara, bona Betele gaukara umui herevalaia, matamata taudia be idia do bada lasi neganai idia dekenai Iehova idia hanamoa, ma haida idia durua, bona moale idia abia dalanai edia mauri idia gaukaralaia urana umui havaraia.
6 Memero Kekeni E, Ful-Taim Hesiai Gaukara Do Umui Karaia Diba Totona Gau Ginigunadia Umui Karaia: Memero kekeni e, ful-taim hesiai gaukara lalonai umui vareai karana umui laloa diba totona mai anina gaudia haida umui karaia guna be namo. Hari oi be bapatiso lasi pablisa vadaeni bona hua ta ta ai haroro gaukara ena ripoti oi henia, a? Tiokratik Haroro Sikuli lalonai oi vareai vadaeni, a? Dahaka palani oi karaia vadaeni, nega daudau lasi murinai Iehova ena gwauhamata bona bapatiso Witnes ai oi lao totona? Oi bapatiso neganai, ful-taim hesiai gaukara ena iduara ia kehoa momokani. Unai oi tohoa totona, lagani ta lalonai oi hegeregere negadiai heduru painia gaukara oi karaia diba. Bena painia gaukara ena moale do oi diba.
7 Bema oi be matamata tadikaka ta Dirava ena orea lalonai, namona be bapatiso murinai hesiai tauna ai oi lao totona emu kara oi hanamoa daladia oi laloa. (1 Tim. 3:8-10, 12) Danu, namona be oi laloa bema emu mauri lagani ia hegeregere neganai, Betele gaukara totona aplikeisen oi ura atoa. Painia gaukara oi karaia lalonai gau namodia oi dibaia, hegeregere sediual badinaia, emu gaudia ibounai hegaegaelaia namonamo, ma haida ida gaukara hebou, bona maduna huaia namonamo karadia. Unai ibounai ese oi ia durua gabeai hesiai gaukara ma haida oi karaia totona. Reana Hesiai Gaukara Hadibaia Sikulina dekenai oi vareai diba danu.
8 Ful-taim hesiai gaukara lalonai oi kwalimu totona gau badana be tiokratik gaukara ibounai be mai ura bada ida oi karaia. Aposetolo Paulo ese ita ia hagoadaia unai bamona lalohadai ita abia totona, bona unai amo ita abia hahenamo ia hahedinaraia, ia gwau: “Emui hesiai gaukara ibounai lalonai, mai emui kudouna ibounai do umui karaia. . . . Lohiabada ena gaukara umui karaia bamona. Badina be umui diba, umui ta ta emui kara dainai, Lohiabada ese davana namona umui dekenai do ia henia.” (Kol. 3:23, 24) Emai ura be Iehova ese emu ful-taim hesiai gaukara lalonai oi dekenai moale bada do ia henia!
This is a repeat of article in km 4/02 taken from km-E 4/02 “The Joys of Full-Time Service.”