Gima Noho! Buklet Ena Henanadai

December 26, 2005 amo ia lao January 23, 2006 purana ai, ita ese Kongrigeisen Buka Stadi ai Gima Noho! buklet do ita stadilaia. Mani emui kara, unai buklet umui hegaegaelaia eiava buka stadi umui karaia neganai, henunai idia noho henanadai umui gaukaralaia. Stadi lalonai, buklet umui duahia be namo, bona bema nega ia hegeregere, idia torea siri umui duahia diba.

December 26 Purana

◼ Rau 3-4: Inai rau lalonai idia noho gaudia amo, edena be emu noho gabuna dekenai idia vara? Dahaka ese ia hahedinaraia unai gaudia be oiemu noho gabuna sibona ai idia vara lasi?

◼ Rau 5: Dahaka ese ia hamomokania Dirava ese ita ia laloa bada? Dahaka ese ia hahedinaraia ita be Dirava bona Ia ese ia karaia gaudia ita laloa bada?

◼ Rau 6-8: Mataio 24:​1-8, 14 ese hari tanobada ai idia vara gaudia be edena bamona ia herevalaia? Timoteo Iharuana 3:​1-5 ese ia hahedinaraia bamona, ita be hari edena bamona negana lalonai ita noho? Dahaka ena nega dokona? Dahaka dainai oi abia dae momokani Baibel be Dirava ena Hereva? Ita harorolaia Basileiana be dahaka?

◼ Rau 9-​10: Dahaka dainai dina ta ta ai ita karaia abia hidi bona ita atoa guna gaudia ita laloa namonamo be namo? (Roma 2:6; Gal. 6:7) Rau 10 ai idia noho henanadai oi riviulaia neganai, edena siridia oi laloatao?

January 2 Purana

◼ Rau 11: Dahaka dainai ita ta ta ese inai rau ai idia noho henanadai ita laloa namonamo be namo? (1 Kor. 10:12; Efe. 6:​10-​18) Unai henanadai edia haere ese Mataio 24:44 ita badinaia dalana dekenai dahaka ia hahedinaraia?

◼ Rau 12-​14: Apokalupo 14:​6, 7 ese ia herevalaia “kota henia ena nega” be dahaka? ‘Dirava do umui gari henia bona ia do umui hanamoa bada,’ unai hereva ena anina be dahaka? Babulonia Badana be dahaka, bona ia dekenai dahaka do ia vara? Babulonia Badana do idia hadikaia dainai, dahaka ita karaia be namo? Kota negana ai dahaka do ia vara danu? Dirava ena kota “dina bona hora” ita diba lasi dainai, dahaka ita karaia diba? (Mat. 25:13)

◼ Rau 15: Daika ena lohia siahuna idia hepapahuahulaia, bona ita ta ta be dahaka ita karaia diba?

◼ Rau 16-​19: “Guba matamata” bona “tanobada matamata” be dahaka? (2 Pet. 3:​13) Daika ese unai ia gwauhamatalaia? Guba bona tanobada matamata dekenai, dahaka do idia idau? Ita be namo ta do ita abia, a?

January 9 Purana

◼ Rau 20-1: Iesu ena hahediba taudia ginigunadia be dika amo idia heau mauri totona, ia ese dahaka ia hamaorodia? (Luka 21:​20, 21) Edena negai Ierusalema idia heautania diba? Dahaka dainai idia heau haraga be gau badana? (Mat. 24:​16-​18, 21) Dahaka dainai momo be dika ena hadibaia hereva idia laloa bada lasi? China bona Philippines dekenai, taunimanima momo be dika ena hadibaia hereva idia kamonai dainai, dahaka namo idia davaria? Tanobada ena dokona be kahirakahira dainai, dahaka dainai Baibel ena sisiba ita badinaia be gau badana? Karaharaga lalohadaina ita abia dainai, iseda maduna be dahaka? (Aon. 24:​11, 12)

◼ Rau 22-3: Lagani 1974 be Australia ai bona 1985 be Columbia ai, dahaka dainai momo ese dika ena hadibaia herevadia idia laloa bada lasi, bona dahaka ia vara? Bema unai hadibaia herevadia oi kamonai, edena bamona do oi kara, bona dahaka dainai? Dahaka ese ia hahedinaraia ita be Noa ena nega ai hadibaia hereva do ita badinaia? Dahaka dainai taunimanima idia ura Sodoma bona ena badinai idia noho hanuadia dekenai idia noho? Bema Sodoma dekenai ia vara gauna ita lalohadailaia, unai ese edena bamona ita do ia durua?

January 16 Purana

◼ Rau 24-7: Rau 27 ai “Stadi Ena Henanadai” gaukaralaia.

January 23 Purana

◼ Rau 28-​31: Rau 31 ai “Stadi Ena Henanadai” gaukaralaia.

Inai buklet ita stadilaia karana ese ita do ia durua ita gima noho totona bona Iehova ena dina totona ita noho hegaegae. Namona be iseda haroro gaukarana lalonai, aneru ese ena hereva amo ia hahedinaraia karaharaga lalohadaina ita hahedinaraia, ia gwau: “Dirava do umui gari henia, ia do umui hanamoa bada, badina be Dirava ese taunimanima ibounai do ia kota henia ena nega ia ginidae vadaeni.”​​—Mat. 24:​42, 44; Apok. 14:7.