Taunimanima Laloa Bada—Henanadai Henia Bona Kamonai Karana Amo
1 Taunimanima momo idia ura edia lalohadai idia herevalaia, to idia ura lasi ita hadibadia o henanadai momo ita henia. Ita be Keristani hesiai taudia dainai, henanadai amo taunimanima edia lalona ita veria dalana ita dibaia be namo.—Aon. 20:5.
2 Namona be eda henanadai amo ta ena lalona ita hahisia lasi, to ita hagoadaia ena lalohadai ia gwauraia totona. Tadikaka ta be ruma-ta-ruma-ta dekenai ia haroro neganai, ia henanadai: “Oi laloa nega ta do ia mai bona taunimanima be do idia hemataurai heheni, a?” Ruma tauna ena haere dainai, tadikaka ma ia henanadai: “Oi laloa unai be edena bamona do ia guguru?” eiava “Dahaka dainai unai bamona oi laloa?” Tadikaka ma ta be nega, gabu, eiava taunimanima idia noho gabudia ai ia haroro neganai, tama sina mai edia natudia ia nanadaia: “Ruma bese ena maduna dekenai, dahaka oi moalelaia?” Bena ma ia henanadai: “Oi laloa bada gauna be dahaka?” Mani oi itaia, unai bamona henanadai ese taunimanima ia hahemaraia lasi, to idia ia durua edia lalohadai idia gwauraia totona. Taunimanima edia noho daladia be idauidau dainai, namona be eda teritori taudia edia noho dalana hegeregerena, ita gwauraia gaudia bona eda henanadai ita haidaua.
3 Taunimanima Edia Lalohadai Dibaia: Bema taunimanima idia ura dikadika edia lalohadai idia herevalaia, vadaeni mai haheauka ida edia hereva oi kamonai bona oi koudia lasi. (Iam. 1:19) Mai manau ida edia hereva oi laloa bada. (Kol. 4:6) Reana oi gwau: “Unai be hoa gauna. Tanikiu unai oi herevalaia dainai.” Edia hereva dainai oi hanamodia. Mai hemataurai ida henanadai ma haida oi henia, unai amo edia lalohadai bona edia lalohadai ena badina do oi diba. Idia diba gaudia oi herevalaia. Bema oi ura ta be siri ta ia laloa bada, reana oi henanadai: “Nega haida oi laloa inai be dala namona, a?” Namo lasi oi hahedinaraia emu lalohadai be maoro eiava umui hepapahuahu.—2 Tim. 2:24, 25.
4 Iseda kamonai karana dainai, ma haida be iseda henanadai do idia haerelaia. Taunimanima idia itaia diba, ita be mai eda ura ida edia hereva ita kamonai eiava lasi. Loaloa naria tauna ta ia gwau: “Bema oi hahedinaraia oi ura taunimanima edia hereva oi kamonai, unai ese taunimanima edia lalona ia veria idia herevahereva totona, bona unai be taunimanima laloa bada karana hereadaena.” Ma haida edia hereva oi kamonai neganai idia oi matauraia, bona unai ese edia lalona ia veria ita harorolaia sivarai namona idia kamonai henia totona.—Roma 12:10.