Tama Sina E—Emui Natudia Idia Maragi Negana ai Umui Hadibadia Matamaia
1 “Mero dekenai mauri dala maorona do oi hadibaia, vadaeni ia buruka neganai, unai dala do ia rakatania lasi.” (Aon. 22:6) Tama sina e, bema umui ura emui natudia ese hereva momokani ena ‘dala do idia rakatania lasi,’ edena negai umui hadibadia matamaia be namo? Idia do maragi negana ai!
2 Paulo ia gwau Timoteo be ‘ia mero maragi neganai’ lauma dalanai edukeisen ia abia, anina be ia do beibi negana ai. (2 Tim. 3:14, 15) Unai dainai, Timoteo be lauma gaudia laloa bada tauna ai ia lao. (Fili. 2:19-22) Tama sina e, umui danu be emui natudia ‘idia do maragi neganai’ idia dekenai idia abia be namo gaudia umui hadibaia, unai amo ‘Lohiabada ena vairana dekenai idia tubu namonamo.’—1 Sam. 2:21.
3 Ranu Henia, Idia Tubu Totona: Au maragidia ese hanaihanai ranu idia abia be namo au badadia ai idia lao totona, unai hegeregerena lagani idauidau natudia ibounai be Baibel ena hereva momokani ena ranu idia abia be namo, Dirava ena lo hesiai taudia ai idia lao totona. Natudia dekenai hereva momokani umui hadibaia bona Iehova ida hetura karana namona idia abia totona idia umui durua lalonai, gau badana be ruma bese ena Baibel stadi umui karaia hanaihanai. To tama sina e, natudia ta ta ia kamonai namonamo diba negana ena lata umui laloa be namo. Natudia maragidia totona, reana hadibaia nega kwadogidia momo ese namo bada do ia havaraia, to nega latadia haida be namo momokani lasi.—Deu. 11:18, 19.
4 Oi laloa lasi emu natudia ese gau haida sibona idia dibaia diba. Baibel negadia lalonai idia noho taudia edia sivarai be idia dekenai umui gwauraia. Unai negai idia vara gaudia edia laulau idia torea eiava Baibel drama maragina umui karaia be namo. Bema umui dekenai vidio bona kaset teipi idia noho, idia bona Baibel drama teipidia danu, umui gaukaralaia namonamo. Emui natudia edia lagani bona diba hegeregerena ruma bese ena stadi umui karaia. Auka lasi gaudia haida sibona amo umui hadibaia matamaia; to namona be natuna ta ia bada ia lao neganai ia dekenai dobu gaudia umui hadibaia danu. Baibel hadibaia negadia be dala idauidau ai bona moale havaraia dalanai umui karaia. Oi ura emu natudia be Dirava ena hereva idia “ura dikadika” dainai, edia ura umui habadaia dalanai stadi umui karaia.—1 Pet. 2:2.
5 Oi Durua Kongrigeisen ai Gau Haida Idia Karaia: Emui natudia totona tahua gaudia umui atoa, unai amo kongrigeisen lalonai gau haida idia karaia. Reana edia tahua gauna ginigunana be dahaka? Natudia rua edia tama sina idia gwau: “Natudia ruaosi ai hadibaia matamaia, Kingdom Hall dekenai idia helai mai regerege lasi totona.” Gabeai, natudia umui durua hebou dekenai sibodia edia hereva amo idia haere totona, bona namona be edia tahua gauna be Tiokratik Haroro Sikuli lalonai idia vareai. Haroro gaukara ai idia tahua gaudia be pepapepa idia henia, siri ta idia duahia, magasin idia hariharilaia toho, bona ruma tauna ida mai anina bada herevahereva idia karaia.
6 Haheitalai Namona Umui Hahedinaraia: Emui natudia idia kamonai umui be dina ta ta ai Iehova umui herevalaia bona umui guriguri henia, a? Idia itaia ena Hereva umui stadilaia, hebou umui lao henidia, haroro gaukara umui karaia, bona Dirava ena ura be mai moale ida umui karaia, a? (Sal. 40:8) Unai gaudia idia itaia bona unai umui karaia hebou be gau badana. Sinana ta ese ena natudia siks ia naria bena idia be abidadama Witnes taudia ai idia lao, bona ena natuna kekeni badana ese ia herevalaia, ia gwau: “Aiemai lalona ia veria gauna badana be Sinagu ena haheitalai—ena siahu ese iena hereva ena siahu ia hereaia.” Mai ena natuna hani sinana ta ia gwau: “Ai dekenai ‘Iehova atoa guna’ herevana be hereva sibona lasi, to emai mauri dalana.”
7 Tama sina e, emui natudia idia maragi neganai umui hadibaia matamaia, Dirava ena Hereva ena hereva momokani umui hadibadia, tahua gaudia umui atoa, bona haheitalai namona umui hahedinaraia. Do umui moale bada unai bamona umui karaia dainai!
This is a repeat of article in km 1/02 taken from km-E 1/02 “Parents—Train Your Children From Infancy.”