Iehova Ena Dina Ita Naria

¹ Isaia ia gwau: “Iehova be hahemaoro goevagoeva Diravana. Ia idia naria taudia ibounai be namo.” (Isa. 30:18b, BHğ) Dirava ese ena kamonai hesiai taudia ia hamauria bona ena inai taudia ia hahemaoro henia edia sivarai momo be Baibel dekenai idia noho. Hari inai negai, Iehova idia tomadiho henia taudia be unai sivarai amo dahaka idia dibaia? Iehova ena “dina badana” mai garina totona, hari dahaka ita karaia be namo? (Ioe. 2:​31, 32) “Hahemauri be Kahirakahira!” Distrik Hebouhebou ese ita do ia hagoadaia, unai henanadai ita lalodia bona ita sibona eda kara ita tahua totona. Unai hebouhebou ese ita do ia durua Iehova ena dina ita naria totona.

² Palani oi karaia hebouhebou ena dina toi dekenai oi lao bona namo oi davaria totona, a? Hegeregere, emu gaukara biaguna oi noia vadaeni, dina haida do oi gaukara lasi bena hebouhebou ena dina toi dekenai oi lao diba, a? Oibe, kara ta oi karaia be namo. Iehova dekenai unai oi gurigurilaia, bena emu biaguna oi noia. (Neh. 2:​4, 5) Unai hegeregerena, namona be palani oi karaia nega bada lalonai trenspot, mahuta gabuna, bona mai anina bada gaudia ma haida oi hegaegaelaia totona. Unai bamona palani namona ita karaia neganai, ita hahedinaraia ita be Iehova ese ia hegaegaelaia ariana ita laloa bada. Namona be elda taudia be palani idia karaia heduru idia ura taudia, hegeregere buruka taudia idia durua hebouhebou dekenai idia lao totona.​​—Gal. 6:​10.

³ Dirava Hanamoa Karadia: Hebouhebou ai hutuma ita hebou neganai, eda kara amo ita be iseda dekena taudia ita haroro henia bamona. Vadaeni, dahaka ita karaia diba? Ita rentaia rumadia ai ita noho, PMV ita naria, o hebouhebou gabuna badinai idia noho sitoa dekenai ita lao neganai, namona be iseda Keristani karadia​—haheauka, manau, boga auka, bona manada kara​—idia itaia taudia edia lalona ia hamoalea. (Gal. 5:​22, 23; BHğ; Fili. 4:5) Namona be ita hahedinaraia lalokauna “be haida hadikaia ia ura lasi . . . sibona ena gau ia tahua lasi, ia badu haraga lasi.” Hekwakwanai idia vara negadia ai danu, ita ura ‘gau ibounai do ita karaia Dirava hanamoa totona.’​​—1 Kor. 10:31; 13:5.

⁴ Tano ta ai, hebouhebou ia ore neganai, hotel biaguna ta be iseda memero kekeni edia kara bona toana ia moalelaia bada, bona ia ura “Iehova ena Witnes taudia idia vadivadi neganai, ena hotel dekenai idia noho be namo.” Unai be moale gauna! Tama sina e, unai ia vara badina emui natudia umui hadibaia bona naria namonamo. Tama sina be idia rentaia gabudia dekenai edia natudia sibona idia rakatania be aonega karana lasi. Namona be nega ibounai tama sina ese edia natudia idia naria namonamo. (Aon. 29:15) Namona be edia kara namodia amo Iehova idia hanamoa bona hamoalea!​​—Aon. 27:11.

⁵ Dabua Bona Tauanina Edia Toana Namona: Hebouhebou gabunai namo bada ita havaraia diba, bema tanobada taudia edia sitaelo ita badinaia lasi to hemataurai dabua ita hahedokilaia bona tauanina edia toana idia namo. Anina be, gabu hagoevaia o program ita kamonai totona hebouhebou gabuna ita lao o rakatania neganai, eda dabua bona tauanina edia toana idia namo be mai anina bada. Ita be Dirava ena hesiai taudia dainai, Iehova ena ladana ita laloa bada guna be namo, bona ita sibona eda ura ita dadaraia. Ruma bese kwaradia edia maduna be edia ruma bese taudia do idia hamaoroa, hanaihanai hemataurai dabua idia hahedokilaia bona laloa maoromaoro idia hahedinaraia.​​—1 Tim. 2:9.

⁶ Unai hegeregerena, PMV o bouti amo hebouhebou totona ita lao o hebouhebou murinai ita laga-ani, eiava sitoa o maketi dekenai ita lao neganai, eda dabua bona tauanina edia toana amo hemataurai toana ita hahedinaraia be gau badana. Hebouhebou ena lapel kadi ita atoa neganai, unai ese dala ia kehoa ma haida ita haroro henidia totona.​​—2 Kor. 6:​3, 4.

⁷ Isaia ia peroveta: “Lohiabada ese umui ia rakatania lasi, umui totona ia naria noho, umui dekenai do ia bogahisihisi totona.” (Isa. 30:18a) Iehova ena hebogahisi karana ita laloa bada dainai, unai ese ita ia doria hebouhebou gabudia dekenai iseda dabua bona tauanina ena toana amo Iehova ita hanamoa totona. “Hahemauri be Kahirakahira!” Distrik Hebouhebou ese eda Dirava ia hanamoa, bona ita ia durua Iehova ena dina ita naria totona!

[Study Questions]

1. Hebouhebou ena sinado be dahaka, bona dahaka dainai unai be sinado maorona?

2. Edena bamona ita hahedinaraia diba, ita be distrik hebouhebou ita laloa bada?

3. Hebouhebou idia karaia gabuna ai, Iehova ena taunimanima ese dahaka kara idauidau idia hahedinaraia be namo?

4. Edena dala ai tama sina be edia natudia idia durua Iehova idia hanamoa totona?

5. Edena dala ai eda dabua bona tauanina ena toana amo Iehova ita hanamoa diba?

6. Hebouhebou vairanai bona murinai, dahaka dainai hemataurai toana ita hahedinaraia be gau badana?

7. Dahaka ita karaia diba hebouhebou ia heau namonamo bona ita moalelaia totona? (“Distrik Hebouhebou Hadibaia Herevadia” itaia.)

[Box on page 8]

Distrik Hebouhebou Hadibaia Herevadia

◼ Nega: Dina toi lalonai, program be 9:00 a.m. ai do ia matamaia. Hebouhebou ia do matamaia lasi bona miusiki be miniti haida lalonai idia gadaralaia lalonai, seamani be platfom dekenai do ia helai. Unai negai, ita ibounai be iseda helai gabuna dekenai ita helai vadaeni, unai amo program ia matamaia namonamo diba. Friday program be 4:15 p.m. ai do ia ore, Saturday be 4:35 p.m. ai do ia ore, bona Sunday be 3:40 p.m. ai do ia ore.

◼ Motuka Atoa Gabuna: Hebouhebou gabudia dekenai motuka atoa gabudia idia noho, davana be lasi. Namona be motuka taria tadikaka ese hebouhebou ena lapel kadi idia atoa, motuka atoa gabuna idia abia totona. Motuka atoa gabudia haida be maragi dainai, mani emui kara atendan taudia edia hereva umui kamonai.

◼ Helai Gaudia: Oi ida motuka tamona ai umui guia taudia eiava ruma tamona ai umui noho taudia edia namba hegeregerena sibona, helai gaudia umui makaia be namo.

◼ Dina Tubu Aniani: Mani emu kara, emu dina tubu ena aniani oi abia lao, namo lasi laga-ani negana lalonai hebouhebou gabuna oi rakatania, sitoa ai aniani oi hoia totona. Helai gauna henunai oi atoa diba eski oi gaukaralaia. Hebouhebou gabuna dekenai, pikiniki ai ita gaukaralaia eski badadia, galasi gaudia, bona kekero muramura be taravatu.

◼ Kontribusen: Distrik hebouhebou hegaegaelaia totona, moni bada idia negea. Iseda tanikiu karana ita hahedinaraia diba bema Kingdom Hall eiava hebouhebou gabuna ai, Tanobada Ibounai Gaukarana ena kontribusen ita henia. Hebouhebou gabuna dekenai idia henia seke be “International Bible Students Association” eiava “I.B.S.A.” dekenai idia siaia be namo.

◼ Aksiden: Bema hebouhebou gabunai ta ia gorere dikadika eiava gau ta ese ia utua, mani atendan tauna ta oi hadibaia haraga, bena ia be Medikol Heduru Dipatmen do ia hadibaia, unai amo unai dipatmen idia naria taudia ese idia sekea diba bona heduru do idia henia. Bema ia dika momokani, vadaeni unai dipatmen be ambalans do idia ringi henia.

◼ Rekodi: Rekodi gaudia be Assembly Hall ena paua eiava saun gabudia dekenai umui gwadaia kau lasi, bona ma haida edia kamonai karana ia hadikaia lasi dalanai umui gaukaralaia be namo.

◼ Laulau Abia: Bema program lalonai laulau oi abia, diari halasia gaudia oi gaukaralaia lasi.

◼ Mobael Fon: Inai gaudia edia volium ita koua be namo, unai amo ma haida edia kamonai karana do ita hadikaia lasi.

◼ Noho Gabudia: (1) Bema mahuta gabudia oi ura oi abia, emu kongrigeisen be Ruma Dipatmen amo fom ia abia neganai, karaharaga seketere oi hadibaia. (2) Daiutu momo oi noia kava lasi, to do idia noho taudia edia namba hegeregerena sibona oi noia, bona daiutu ai do idia noho taudia sibona be emui daiutu dekenai idia noho be namo. (3) Bema emu noho gabuna oi haidaua, Ruma Dipatmen oi hadibaia haraga be namo. (4) Aniani idia nadua lasi daiutu lalonai aniani umui nadua lasi. (5) Bema tadikaka edia ruma ai oi noho, edia heabidae karana oi matauraia be namo. (6)  Emu noho gabunai idia gaukara taudia be idia bisi neganai oi hereva eiava kara henia neganai, lauma ena huahua oi hahedinaraia be namo.