Henanadai Mauana
◼ Edena dala ai atendan taudia ese tama sina idia durua diba, edia natudia be hebou dekenai kara namo idia hahedinaraia totona?
Natudia edia tauanina idia goada, idia manada lasi nega daudau idia helai totona. Hebou murinai, natudia edia goada ia do noho dainai reana idia ura heau bona natudia ma haida idia lulua Kingdom Hall lalonai eiava hebou gabudia ma haida dekenai, motuka atoa gabuna, eiava taunimanima idia raka gabudia dekenai. To, aonega herevana ia gwau bamona, “sibona ena ura ia karaia noho merona ese, iena sinana do ia hahemaraia.”—Aon. 29:15.
Sibona edia namo bona ma haida ese dika idia davaria lasi totona, namona be natudia be Kingdom Hall lalonai eiava murimurinai idia heau bona gadara lasi. Bema natuna ta be ia heau loaloa dainai buruka tadikaka eiava taihu ta ia bampaia bena unai buruka tauna ia moru bona bero bada ia davaria, madi, unai be dika. Unai ese hisihisi ia havaraia kava bona reana tama sina bona kongrigeisen ese moni do idia negea kava diba.
Baibel ese ia gwauraia hegeregerena, tama sina be mai edia maduna edia natudia idia hadibaia, iseda tomadiho gabuna do idia matauraia totona. (Had. 5:1a) Unai ena anina be natudia ese Kingdom Hall ena sea eiava haba dekenai idia toretore lasi eiava gau haida idia hadikaia lasi. Madi, nega haida unai ia vara vadaeni.
Iseda Keristani hebou, bona sekit bona distrik hebouhebou dekenai, atendan taudia idia itaia gau iboudiai idia heau “namonamo” bona “maoromaoro.” (1 Kor. 14:40; Kol. 2:5) Atendan taudia be Kingdom Hall lalonai bona murimurinai, program vairanai, lalonai, bona murinai idia gima noho. Bema natuna ta ia heau loaloa eiava ia gwau-edeede, atendan tauna be mai hebogahisi ida unai natuna ia hadokoa diba, bona unai natuna dekenai ia gwauraia hedinarai diba dahaka dainai ia karaia karana be ia maoro lasi. Mai hemataurai ida unai natuna ena tama sina dekenai unai hekwakwanai ia gwauraia danu, bona ia hamaoroa natuna idia naria be namo. Unai tama eiava sina be dala maorona ai ia kara be namo.
Ita diba nega haida hebou lalonai beibi bona natudia maragidia idia tai eiava idia helai namonamo lasi. Atendan taudia be miniti 20 hebou vairanai, program ia do matamaia lasi neganai, idia ginidae bona Kingdom Hall ena dokona kahana dekenai idia noho helai gaudia be tama sina mai edia natudia matamata totona idia makaia diba. Namona be ita ibounai ita durua heheni bona unai helai gaudia ita rakatania idia totona.
Bema natuna ta ia helai namonamo lasi, namona be tama eiava sina ese kara ta ia karaia be namo. Bema tama eiava sina ese kara ta ia karaia lasi bona unai natuna ena kara ese haida edia kamonai karana ia hadikaia, atendan ta ese mai hemataurai ida unai tama eiava sina ia noia natuna be Kingdom Hall amo do ia abia lao murimuri ai. Bema kamonai matamata taudia bona edia natuna maragidia be hebou dekenai ita boiria mai, namona be idia ida ita helai, unai amo edia natudia idia tai eiava idia helai namonamo lasi neganai, ita durudia diba.
Kingdom Hall dekenai lagani idauidau natudia ita itaia bona Dirava ena ruma bese lalonai edia kara namodia ita itaia neganai ita moale. (1 Tim. 3:15) Iehova ese tomadiho totona ia kehoa dalana idia matauraia neganai, ia do idia hanamoa bona kongrigeisen taudia ibounai ese unai matamata taudia do idia moalelaia.
This is a repeat of article in km 5/00 taken from km-E 5/00 “Question Box.”