Keristani Kara Namodia Goadalaia, Bena Hahenamo Davaria
1 Keristani tauna ai oi lao neganai, Iehova tomadiho henia karadia oi goadalaia, hegeregere Baibel oi stadilaia, Keristani heboudia dekenai oi lao, oi haroro, bona oi guriguri. Iehova be emu hekwarahi ia hanamoa dainai lauma dalanai oi goada oi lao. Oi bapatiso negana amo ema bona hari lagani haida idia ore vadaeni. To oi bapatiso murinai oi karaia Keristani kara namodia oi do goadalaia noho, a?
2 Emu Kara Oi Tahua Namonamo: Dina ta ta ai Baibel ena kahana ta duahia karana be vaia emu kara, a? Unai oi karaia neganai hahenamo do oi davaria! (Ios. 1:8; Sal. 1:2, 3) Idaunegai Israela dekenai, king ta ta ese Taravatu bukana ena kopi ta be ‘edia mauri dinadia ibounai lalonai’ do idia duahia. Dahaka anina namona ia havaraia? Unai king be do ia manau bona Iehova do ia gari henia, unai amo Iehova ena hahegani do ia dadaraia lasi. (Deu. 17:18-20) Unai hegeregerena, hari inai negai, dina ibounai Baibel duahia karana ese ita do ia durua, inai kara dika tanobadana lalonai kara maoromaoro ita karaia totona. Unai ese ita ia durua danu haroro gaukara ita karaia namonamo totona.—Fili. 2:15; 2 Tim. 3:17.
3 Iesu ena kara be hanaihanai dubu dekenai ia lao, badina unuseniai Buka Helaga idia duahia. (Luka 4:16) Unai ese ia ia durua do idia vara hahetoho ia haheaukalaia totona. Hebou dekenai ita kamonai herevadia ese ita ia durua bona iseda abidadama ia hagoadaia. (Roma 1:12) Iseda tadikaka ida ita hebou karana ese ita ia durua nega dokona ena hekwakwanai ita haheaukalaia totona. (Heb. 10:24, 25) Hebou lao henia karana be vaia emu kara, a?
4 Baibel ese ia hahedinaraia, aposetolo taudia be “dina ibounai, Dubu Helaga lalonai bona ruma lalonai” taunimanima dekenai sivarai namona idia harorolaia. (Kara 5:42) Ena be dina ibounai ita haroro lasi, to wiki lalonai stadi eiava lou henia ita karaia diba, a? Bema unai oi karaia, Dirava ena Hereva do ita gaukaralaia namonamo, bona Baibel ena hereva momokani be ma haida dekenai ita herevalaia dainai ekspiriens namodia do ita davaria.
5 Peroveta tauna Daniela be “nega ibounai” Iehova ia hesiai henia dainai, Iehova ese ia hanamoa. Ia be hanaihanai Iehova ia guriguri henia. (Dan. 6:10, 16, 20) Unai hegeregerena, mai kudouna ibounai ida hanaihanai Iehova ita guriguri henia neganai, iena lauma helaga ena heduru ita abia diba. (Luka 11:9-13) Unai amo Iehova be ita kahirakahira do ia mai bona Ia ida hetura karana namona do ita moalelaia. (Sal. 25:14, BHğ; Iam. 4:8) Unai be hahenamo badana! Unai dainai, namona be ita hekwarahi Keristani kara namodia ita goadalaia, bena Iehova amo hahenamo do ita abia.
[Study Questions]
1. Dahaka dainai emu kara oi tahua be namo?
2. Dina ibounai Baibel ita duahia karana ese edena bamona ita do ia durua?
3. Hebou lao henia hanaihanai karana ese edena bamona ita ia durua?
4. Wiki ta ta lalonai ita haroro ese edena bamona ita do ia durua?
5. Dahaka dainai hanaihanai Iehova ita guriguri henia be namo?