Matamata Taudia be Hebou Idauidau amo Namo Idia Abia
1 Kekeni matamata ta ia gwau: “Nega haida lau laloa matamata taudia edia mauri lalonai, nega auka momokani idia davaria. Ai be sihari kava idia karaia, drag idia ania kava, bona kekero muramura idia abia taudia edia huanai ai noho.” Oiemu hemami be unai bamoa, a? Bema oibe, dahaka oi laloa, dahaka ese oi do ia durua unai kara dikadia oi tuari henia totona? Abidadama oi abia, Iehova ena dala be maoro oi abidadama henia goadagoada be namo, badina abidadama be lasi neganai, oi hegeregere lasi ‘Dirava ena ura do oi badinaia’ totona. (Heb. 11:6) Kongregesen ena hebou lao henia karana ese emu Keristani abidadama bona dika gaudia dadaraia urana ia hagoadaia.
2 Hebou amo Gau Momo Oi Abia Diba: Dahaka dainai emu turadia ida aniani namona ania hebou negana ese moale ia havaraia? Aniani bona hebamo namona idia noho dainai, ani? Iseda hebou be unai bamona moale idia henia danu, to lauma dalanai.
3 Hebou dekenai ita herevalaia gaudia be ita idia hagoadaia, iseda mauri lalonai dina ta ta ai ita davaria hekwakwanai ita herevalaia bona lalona idia veria Baibel ena peroveta herevadia ita stadilaia danu. Oi badinaia diba dalanai idia henia herevadia ese mauri dalana namona bona oi davaria hekwakwanai oi hanaia dalana be oi dekenai idia hadibaia. Hebou dekenai ita davaria turadia namodia be gabu ta dekenai ita davaria diba lasi, bona lauma dalanai do ita noho namo bona kerere ta ita davaria lasi. (Sal. 133:1) Unai dainai ita hoa lasi matamata ta ese inai ia gwauraia neganai: “Dina ibounai sikuli dekenai lau lao, bona unai dainai lau hesiku. To hebou be tano gagaena dekenai ia noho ranu gabuna bamona, lau idia hagoadaia sikuli dinana ma ta lau haheaukalaia totona.” Ma ta ia gwau: “Lau davaria Iehova idia lalokau henia taudia bema lau bamodia, unai ese lau ia durua, Ia kahirakahira dekenai lau noho totona.”
4 Haroro Sikuli lalonai oi vareai karana amo Baibel ena hereva oi haboua, hereva ta ai oi halaoa, bona herevahereva dalana amo Kingdom Hall lalonai idia helai taudia vairanai oi henia karadia oi diba. Taunimanima hamauria hereva momokani Dirava ena Hereva lalonai ita hadibaia namonamo totona oi abia diba ese ia havaraia namo mani oi laloa! Matamata taudia be gabu ma ta ai unai bamona hadibaia karana namona idia dibaia diba, a?
5 Hebou ai Gau Momo Oi Dibaia Dalana: Hebou amo namo bada oi abia totona, mai anina bada gaudia toi idia noho. Unai be hegaegae karana, haere henia karana, bona badinaia karana.
6 Idia Totona Oi Hegaegae: Nega oi atoa hebouhebou gaudia oi hegaegaelaia hanaihanai totona. Namona be sikuli gaukara, pat-taim moni gaukara, eiava moale karadia ese hebou ta ta dekenai do ita herevalaia gaudia totona oi hegaegae negana idia haorea lasi. Sediual namona ese ita ia durua bada. Gau ginigunana bona badana be pura ta ta ena Baibel duahiduahi Haroro Sikuli totona ita badinaia. Dina ta ta lalonai idia abia hidi Baibel ena karoa be miniti haida sibona lalonai ita duahia bona lalohadailaia diba. Nega oi atoa Kongregesen ena Buka Stadi bona Gima Kohorona Stadi gaudia do oi hegaegaelaia totona. Dina tamona eiava rua idia noho bena hebou do idia karaia neganai, haida ese unai idia karaia. Bema emu nega ia hegeregere, Hesiai Hebou ena kahadia pura ta ta totona danu be unai bamona oi karaia be namo.
7 Hebou Karadia Oi Karaia: Baibel ia gwau Iesu ena mauri lagani be 12 neganai, ia be dubu dekenai idia davaria, ia kamonai, ia henanadai, bona haere ia henia. (Luka 2:46, 47) Anina be unai kara lalonai ia vareai momokani. Hebou amo namo bada do oi abia bema oi hekwarahi hebou karadia oi karaia totona.—Aon. 15:23.
8 Namona be hebou dekenai idia hadibaia gaudia oi kamonai namonamo. Nega haida, hereva oi kamonai be auka, hereva oi henia be auka lasi. Dahaka dainai? Ma ia hereva neganai oiemu lalona be ma gau idauidau ia laloa diba. Edena bamona unai oi koua diba? Namona be oi kamonai herevadia oi torea. Mai anina bada herevadia, oi ura gabeai oi itaia lou herevadia, oi torea. Nouti torea karana ese oi do ia durua program do oi kamonai namonamo totona. Danu, siri oi itaia, bona hereva henia tauna ese unai siridia ia duahia neganai, namona be emu Baibel amo oi itaia.
9 Ma danu, emu lalona oi hadaia hebou dekenai henanadai bona haere dalanai kahana idia henia neganai, haere do oi henia. Namo bada do oi davaria bema oi gwauraia herevana oi laloa namonamo guna. Aonega Herevadia 15:28 ia gwau: “Kara maoromaoro taudia ese, haere idia henia neganai idia laloa namonamo guna.”
10 Oi Dibaia Gauna Oi Badinaia: Kara ginigabena be oi hamomokania oi dibaia gauna be ‘emu kudouna dekenai ia gaukara noho.’ (1 Tes. 2:13) Hebou ta ta dekenai oi dibaia hereva namodia oi badinaia neganai, Iehova Dirava kahirakahira dekenai oi lao diba. Do oi abia dae momokani ia mauri noho, bona ‘hereva momokani ena dala dekenai oi raka noho’ lalonai, do oi moale bada bona emu lalona do ia hegeregere, bona hereva momokani be sibona emu mauri ena kahana ai oi halaoa.—3 Ioa. 4.
11 Matamata tadikaka bona taihu e, hanaihanai hebou totona umui hegaegae, haere umui henia, bona umui dibaia gaudia umui badinaia neganai, hebou do umui moalelaia badabada. Danu, hebou amo oi abia diba namo ibounai be do oi abia. Oiemu abidadama do ia goada bona emu lalona do oi hadaia diba emu guba Tamana Iehova, ida do oi noho momokani totona.—Sal. 145:18.