Hebou amo Ita Abia Moale Habadaia Dalana
1 Hebou be mai edia anina bada lauma dalanai ita noho namo totona. Idia amo ita abia moalena be ia mai hebou vairanai, lalonai, bona murinai ita karaia karadia hegeregerena. Edena bamona ita sibona bona ma haida ita durua diba hebou lao henidia karana amo moale bada ita abia totona?
2 Hebou Vairanai: Hegaegae karana be mai anina bada hebou amo moale ita davaria totona. Bema ita hegaegae namonamo, ita ura hebou dekenai hereva do ita kamonai bona haere. Ma danu, hebou ena kahana ta ena hereva be ita dekenai idia henia neganai do ita hegaegae namonamo be namo, idia torea hakaua herevadia hegeregerena hereva do ita hahedinaraia maoromaoro totona bona helai taudia idia kamonai noho totona. Namona be ruma dekenai do ita karaia loulou. Bema iboudiai ia durua, bona hagoadaia hebou edia namo ita habadaia, ita sibona ita goada ita lao karana ia hedinarai bona moale bada ita abia.—1 Tim. 4:15, 16.
3 Hebou Lalonai: Hebou ita moalelaia bada diba bema ita haere. Kahana haida lalonai helai taudia idia noia haere idia henia totona idia hegaegae, namona be kongregesen taudia ibounai idia laloa unai kahana idauidau lalonai idia haere be edia maduna. Haere kwadogidia bona anina idia hahedinaraia haeredia ese namo bada idia havaraia. Nega sisina lalonai idia gwauraia diba ekspiriens namodia ese ita idia hagoadaia, bona ia hegeregere neganai unai ita gwauraia be namo. (Aon. 15:23; Kara 15:3) Bema hebou dekenai hereva ta ita henia, namona be mai eda ura bada bona lalo-goada ida ita hereva, bona kamonai taudia edia lalona ia veria dalanai, edia mauri lalonai ia vara diba dalanai, bona idia badinaia diba dalanai ita karaia.
4 Hebou Murinai: Mai hebogahisi ida ma haida ita hereva namo henia, ita hedavari henia, bona hebou ena hereva badadia haida ita herevalaia lou karana ese ita ibounai do ia durua bada. Matamata taudia, buruka taudia, bona kamonai matamata taudia idia haere dainai eda moale ita hahedinaraia ese iseda lalokau tadikaka edia huanai ia hagoadaia. Hebou idia mai lasi taudia ita maumauraia lasi, to hebou lao henia ena moale be idia danu ita herevalaia, unai amo idia do ita hagoadaia hebou idia lao henia totona.—Heb. 10:24, 25.
5 Unai mai anina bada gauna, ta ta hagoadaia heheni karana, ita dadaraia lasi be namo. (Roma 1:11, 12) Bema mai eda lalona ibounai ida ita hekwarahi, ita ibounai be Keristani heboudia amo moale do ita abia.