Iehova ese Ita Ia Hakaua Dalana
“Dala maoromaoro dekenai lau do oi hakaua.”— SALAMO 27:11.
1, 2. (a) Iehova ese hari inai negai ena taunimanima ia hakaua dalana be dahaka? (b) Hebou amo namo bada ita abia totona dahaka ita karaia be namo?
IEHOVA be diari bona hereva momokani edia Badina, hereva ginigunana ai ita davaria bamona. Dala maoromaoro dekenai ita raka noho lalonai, iena hereva ese iseda raka dalana ia hadiaria. Iehova ese ita ia hakaua dalana be ia ese ena dala be ita ia hadibaia. (Salamo 119:105) Idaunegai salamo torea tauna bamona, Dirava ena hakaua dalana ita abia dae mai eda moale ida bona ita guriguri: “Lohiabada e, oiemu kara be lau dekenai do oi hadibaia. Dala maoromaoro dekenai lau do oi hakaua.”—Salamo 27:11.
2 Hari inai negai Iehova ese ita ia hadibaia dalana ta be Keristani heboudia. Unai lalokau dalana amo namo bada ita abia totona (1) hanaihanai ita lao, (2) hereva ita kamonai namonamo, bona (3) helai taudia idia haere diba neganai mai iseda ura ida haere ita henia, a? Danu, “dala maoromaoro dekenai” do ita raka noho totona heduru herevadia ita abia neganai, mai moale ida ita badinaia, a?
Oiemu Hebou Lao Henia Karana be Edena Bamona?
3. Ful-taim hesiai gaukara ia karaia taihuna ta be edena dala ai hebou lao henia karana namona ia habadaia?
3 Basileia harorolaia taudia haida be idia maragi negana amo hebou dekenai idia lao hanaihanai. Ful-taim hesiai gaukara ia karaia Iehova ena Witnes taihuna ta ia gwau: “Lau bona egu kakana kekenidia be lagani 1930 bona 1940 huanai ai tubu daekau neganai, hebou do ai lao eiava do ai lao lasi totona emai tama sina ai nanadaia lasi. Ai diba do ai lao, ai gorere neganai sibona ai lao lasi. Aiemai ruma bese taudia ese hebou idia reaia lasi.” Peroveta hahinena Ana bamona, unai taihu ese Iehova tomadiho henia gabuna ia “rakatania lasi.”—Luka 2:36, 37.
4-6. (a) Dahaka dainai Basileia harorolaia taudia haida ese hebou idia reaia? (b) Dahaka dainai hebou ita lao henidia be mai anina bada?
4 Oi be Keristani heboudia dekenai idia lao hanaihanai taudia ta, eiava oi be nega ta ta sibona unai oi karaia, a? Keristani taudia haida, idia laloa hebou lao henia karana dekenai idia hegeregere taudia, idia ura unai do idia hamomokania. Pura haida lalodiai, idia lao henia heboudia idia torea. Idia abia hidi negana ia ore neganai idia ese idia torea gaudia idia itaia lou, bena idia reaia hebou edia momo dainai idia hoa.
5 Reana ta ia gwau, ‘Unai dainai ita hoa lasi, badina hari inai negai taunimanima be hekwakwanai momo idia davaria dainai hebou idia lao hanaihanai be auka.’ Momokani ita be lalo-metau negana lalonai ita noho. Danu, ita daradara lasi hekwakwanai do idia bada idia lao noho. (2 Timoteo 3:13) To unai dainai hebou lao henia hanaihanai karana be mai anina bada, ani? Bema ita ia hagoadaia lauma aniani ita abia hanaihanai lasi, ita laloa diba lasi ita ese inai tanobada ia mailaia metau idauidau do ita haheaukalaia diba. Oibe, reana hebou ita lao henia hanaihanai lasi neganai gau ta ese ita do ia veria “kara maoromaoro taudia idia raka noho dalana” ita rakatania vaitani totona! (Aonega Herevadia 4:18) Momokani, dina aukana ta dokonai ruma dekenai ita giroa lou neganai, reana hanaihanai do ita ura lasi hebou ita lao. To, bema ita lao, ena be ita hesiku bada to namo do ita davaria, bona Kingdom Hall dekenai iseda Keristani tadikaka do ita hagoadaia.
6 Heberu 10:25 ese hebou ita lao hanaihanai ena badina badana ma ta ia gwauraia. Unuseniai aposetolo Paulo ese ena Keristani tadikaka ia hamaorodia do idia hebou bona ‘unai kara do idia habadaia badina Lohiabada ena dina be kahirakahira.’ Oibe, namona be ita laloaboio lasi, “Iehova ena dina” be momokani ia kahirakahira noho. (2 Petero 3:12, NW ) Bema ita laloa inai tanobada dikana ena dokona ia do daudau, reana ita ese sibona iseda ura gaudia do ita laloa momo bena mai anina bada lauma gaukara, hegeregere hebou lao henia karana, do ita laloa bada lasi. Bena, Iesu ena sisiba hegeregerena, ‘unai dina do ia mai haraga bona ita hegaegae lasi.’—Luka 21:34.
Oi Kamonai Namonamo
7. Dahaka dainai hebou lalodiai natudia idia kamonai namonamo be mai anina bada?
7 Hebou ita lao sibona be hegeregere lasi. Namona be ita kamonai namonamo, unuseniai idia gwauraia gaudia ita laloa namonamo. (Aonega Herevadia 7:24) Unai be mai anina iseda natudia dekenai danu. Natuna ta be sikuli dekenai ia lao neganai, namona be ia ese tisa ena hereva ia laloa namonamo, ena be unai hereva ia ura henia lasi, eiava ia lalo-pararalaia namonamo lasi. Tisa tauna ia diba bema unai natuna ia laloa namonamo toho, unai hereva amo namo do ia davaria diba. Vadaeni, badina namona dainai, sikuli natudia ese kongregesen heboudia dekenai idia henia hadibaia herevadia idia laloa namonamo be namo, to hebou ia matamaia murinai maoromaoro idia mahuta be namo lasi, ani? Momokani, nega haida Baibel lalonai ita davaria hereva momokani huanai “hereva haida edia anina davaria be auka.” (2 Petero 3:16) To namo lasi ita laloa natuna ia hegeregere lasi diba do ia abia. Dirava be unai bamona ia laloa lasi. Baibel negadia ai, ia ese ena matamata hesiai taudia ia hagania ‘do idia kamonai, edia lalona do idia kehoa bona Lohiabada edia Dirava do idia gari henia, bona taravatu ena hereva ibounai do idia badinaia,’ to ita daradara lasi unai taravatu haida be natudia ese idia lalo-paralaia be auka. (Deuteronomi 31:12; mani Levitiko 18:1-30 itaia.) Hari inai negai, Iehova ena ura natudia dekenai be unai bamona danu, ani?
8. Tama sina haida be dahaka idia karaia edia natudia idia durua hebou lalodiai idia kamonai namonamo totona?
8 Keristani tama sina idia lalo-parara, edia natudia be lauma dalanai idia dabu gaudia haida be hebou dekenai idia dibaia gaudia ese idia durua. Unai dainai, tama sina haida be dala idia karaia hebou vairanai edia natudia idia mahuta sisina totona, unai amo idia be hebou dekenai idia ginidae neganai idia hegeregere bona hegaegae, diba idia abia totona. Tama sina haida be hebou dinadia edia adorahi ai edia natudia edia televisen itaia karana idia hamaragia eiava mai aonega ida idia koua momokani. (Efeso 5:15, 16) Bona unai bamona tama sina ese edia natuna edia kamonai karana idia hadikaia gaudia idia hamaragia, bona edia natudia idia hagoadaia idia kamonai bona diba idia abia totona, edia lagani bona diba hegeregerena.—Aonega Herevadia 8:32.
9. Dahaka ese ita ia durua diba iseda kamonai karana ita hanamoa totona?
9 Iesu be taunimanima badadia ia hereva henidia neganai, ia gwau: “Emui kamonai do umui naria namonamo.” (Luka 8:18) Hari inai negai, nega momo unai ita gwauraia be haraga to ita karaia be auka. Momokani, kamonai namonamo karana be mai ena hekwarahi, to kamonai karana ita habadaia diba. Baibel hereva ta o hebou ena hereva ta oi kamonai noho lalonai, hereva badadia oi laloa toho. Hereva henia tauna be ma dahaka do ia gwauraia oi laloa guna. Emu haroro gaukara lalonai oi gaukaralaia diba gaudia eiava emu mauri lalonai oi badinaia diba gaudia oi laloa. Emu lalona dekenai ia herevalaia gaudia oi laloa lou. Hereva kwadogidia oi torea.
10, 11. Edena dala ai tama sina haida ese edia natudia idia durua kamonai namonamo taudia ai idia lao totona, bona edena dala haida oi davaria be heduru gaudia?
10 Kamonai namonamo karana be maragi negana ai ita dibaia namonamo. Duahiduahi bona toretore idia do diba lasi neganai danu, idia do sikuli lasi natudia haida be edia tama sina ese idia hagoadaia hebou lalodiai “hereva” idia torea totona. Idia diba vadaeni herevadia, hegeregere “Iehova,” “Iesu,” o “Basileia” idia kamonai neganai, pepa ta dekenai maka idia atoa. Unai dala ai, natudia be platfom amo idia henia herevadia kamonai namonamo karana idia dibaia diba.
11 Nega haida idia bada vadaeni natudia danu ita hagoadaia be namo idia kamonai namonamo totona. Keristani hebouhebouna ta lalonai ruma bese kwarana ta ia itaia ena lagani 11 merona ese hereva ia kamonai lasi to gau idauidau ia laloa noho, bena ia ese unai mero dekenai Baibel ta ia henia bona ia hamaoroa hereva tauna ese ia gwauraia siridia do ia kehoa. Unai tamana, hereva ia torea noho, be ia itaia ena natuna be Baibel ia dogoatao. Unai murinai, unai mero be mai ena ura bada ida hebouhebou ena program ia kamonai.
Emu Gado Regena Idia Kamonai be Namo
12, 13. Dahaka dainai kongregesen taudia ida ane ita abia hebou be mai anina bada?
12 King Davida be ane ia abia: “Lohiabada e, . . . oiemu boubou patana lau raka hagegea noho. Unai neganai oi hanamoa totona ane lau abia.” (Salamo 26:6, 7) Iehova ena Witnes taudia edia hebou ese dala namo hereadia idia kehoa ita ese iseda abidadama ita gwauraia hedinarai totona. Unai ita karaia diba dalana ta be kongregesen ida ane ita abia hebou. Unai be iseda tomadiho karana badana ta, to unai ita laloa maragi haraga diba.
13 Duahiduahi idia do diba lasi natudia haida be pura ta ta ai hebou dekenai do ita abia Basileia anedia edia hereva idia laloatao. Taunimanima badadia ida ane idia abia hebou diba dainai idia moale. To, natudia idia bada sisina neganai, reana Basileia anedia abia karana dekenai edia ura ia maragi. Taunimanima badadia haida danu be idia hemarai hebou dekenai ane idia abia totona. To, haroro gaukara be iseda tomadiho karana ta hegeregerena, ane abia karana be iseda tomadiho karana ta. (Efeso 5:19) Ita hekwarahi bada haroro gaukara lalonai Iehova ita hanamoa totona. Unai dainai iseda gado regena—herevana ia namo eiava lasi—ita gaukaralaia be namo, ane abia karana amo mai eda kudouna ibounai ida ia ita hanamoa totona, ani?—Heberu 13:15.
14. Dahaka dainai kongregesen heboudia ai ita stadilaia herevadia ita hegaegaelaidia namonamo guna be maoro?
14 Hebou ena kahana haida ai helai taudia idia hereva diba neganai, iseda hagoadaia herevadia amo danu Dirava ita hanamoa. Unai dainai ita hegaegae be gau badana. Dirava ena hereva dobudia ita laloa namonamo totona nega bada ita henia. Aposetolo Paulo, Baibel tahua goadagoada tauna ta, ese unai ia lalo-pararalaia. Ia gwau, ‘Dirava ena namo, aonega, bona laloa dobu be edena bamona ita tahua diba?’ (Roma 11:33) Ruma bese kwaradia e, gau badana be emui ruma bese taudia ta ta umui durua, Baibel lalonai ia hedinarai Dirava ena aonega do idia tahua. Ruma bese Baibel stadi lalonai nega umui atoa hereva aukadia umui herevalaia totona bona emui ruma bese umui durua, hebou totona do idia hegaegae.
15. Dahaka hereva ese ta idia durua diba hebou dekenai ia haere totona?
15 Bema oi ura hebou lalonai haere karana oi habadaia, oi ura gwauraia gauna oi hegaegaelaia guna be namo, ani? Hereva aukadia momo ita gwauraia be anina lasi. Baibel siri maorona oi duahia mai ura goadana ida eiava oi abia hidi hereva namodia be kudouna amo oi gwauraia be moale gauna. Pablisa haida ese hakaua tauna idia nanadaia bema paragraf ta ena henanadai ginigunana be idia ese do idia haerelaia diba, unai amo idia ese edia abidadama gwauraia hedinarai karana idia reaia lasi.
Aonega Lasi Tauna Do Ia Aonega
16, 17. Dahaka sisiba be elda tauna ta ese hesiai tauna ta dekenai ia henia, bona dahaka dainai unai ese namo ia havaraia?
16 Iehova ena Witnes taudia edia hebou ai, nega momo ita idia hadibaia dina iboudiai Dirava ena hereva ita duahia totona. Unai ita karaia amo goada ita davaria. Danu, ita ia durua abia hidi maorona ita karaia, eda kara kereredia ita hamaoromaoroa, hedibagani ita koua, bona iseda lauma dalana ita hanamoa bema ita be dala kererena ai ita raka matamaia.—Salamo 19:7.
17 Mai edia diba bada kongregesen elda taudia idia gini hegaegae Baibel ena sisiba be iseda dabu gauna hegeregerena idia henia totona. Ita “davaria” totona edia Baibel sisiba ita tahua be namo. (Aonega Herevadia 20:5) Dina ta, mai ena lalo-goada hesiai matamata tauna ta ese elda tauna ta ia nanadaia ia be edena dala ai kongregesen do ia durua bada. Elda tauna, unai tau matamata ia diba namonamo tauna, ese ena Baibel ia kehoa Timoteo Ginigunana 3:3 dekenai, ia gwau idia abia hidi taudia idia “laloa maoromaoro” (NW ) be namo. Mai ena manau ida unai tau matamata ia hadibaia edena dala ai ma haida ia tura henia lalonai laloa maoromaoro ia hahedinaraia diba. Unai matamata tadikaka be unai sisiba namona dainai ia lalo-hisihisi, a? Lasi vaitani! Ia gwau: “Unai elda tauna ese Baibel ia gaukaralaia, unai dainai lau lalo-parara unai sisiba be Iehova ena amo ia mai.” Unai hesiai tauna ese mai ena moale ida unai sisiba ia badinaia bona ia goada ia lao noho.
18. (a) Dahaka ese Keristani matamata kekeni ta ia durua sikuli dekenai hahetoho ia dadaraidia totona? (b) Hahetoho oi davaria neganai, edena Baibel siridia oi laloa lou?
18 Danu, Dirava ena Hereva ese matamata taudia ia durua diba, ‘uhau edia lebulebu karadia idia rakatania’ totona. (2 Timoteo 2:22) Iehova ena Witnes kekeni ta, vanegai sibona haisikuli ia rakatania, be ena sikuli laganidia ibounai lalonai ia hegeregere hahetoho ia dadaraidia, badina ia ese Baibel ena siri haida ia laloa dobu bona ia badinaia. Nega momo Aonega Herevadia 13:20 ena hereva ia laloa: “Aonega tauna danu ia raka hebou noho tauna, be do ia aonega.” Unai hegeregerena, ia naria namonamo ia ese Baibel ena hakaua herevadia idia matauraia bada taudia sibona ia bamoa totona. Ia laloa: “Lau be ma ta lau hereaia lasi. Bema taunimanima kereredia lau bamoa, do lau ura egu turadia lau hamoalea, bona unai ese hekwakwanai ia havaraia diba.” Paulo ena sisiba Timoteo Iharuana 1:8 dekenai ese ia durua danu. Ia gwau: “Iseda Lohiabada ena sivarai do oi gwauraia hedinarai, do oi hemarai lasi. . . . Sivarai Namona totona do [oi] hisihisi.” Unai sisiba hegeregerena, nega maorodia ai Baibel amo ia abia dae herevadia be ena klas turadia dekenai ia herevalaia. Klas taudia vairanai hereva ta do ia henia totona gaukara idia henia neganai, ia ese hereva ta ia abia hidi, dala namona ai Dirava ena Basileia do ia harorolaia diba totona.
19. Dahaka dainai tau matamata ta ia hegeregere lasi tanobada ena metau gaudia ia dadaraia totona, to dahaka ese ia durua lauma dalanai ia goada totona?
19 Bema nega ta “kara maoromaoro taudia idia raka noho dalana” amo ita raka siri, Dirava ena Hereva ese ita ia durua diba iseda raka dalana ita hamaoromaoroa totona. (Aonega Herevadia 4:18) Africa dekenai ia noho tau matamata ta ese unai ia dibaia goevagoeva. Iehova ena Witnes tauna ta ese ia vadivadi henia neganai, ia ese Baibel stadi ia abia dae. Ia dibaia noho gaudia ia moalelaia, to daudau lasi murinai sikuli dekenai hebamo dikana lalonai ia vareai. Gabeai, metairametaira matabodaga karadia lalonai ia vareai. Ia gwau: “Egu lalona ena mamina ese lau ia hahisia, bona hebou lao henia karana lau hadokoa.” Gabeai, hebou ia lao henia matamaia lou. Unai tau matamata ese mai anina bada gauna ta ia hahedinaraia herevana ia gwauraia, ia gwau: “Lau davaria unai ibounai idia vara ena badina badana be lau be lauma dalanai lau dabu momokani. Lau ese sibona egu stadi lau karaia lasi. Unai dainai hahetoho lalonai lau gini goada lasi. Vadaeni, lau ese Gima Kohorona bona Awake! magasin lau duahia matamaia. Metairametaira, lauma dalanai goada lau abia lou bona egu mauri dalana lau hagoevaia. Unai ese lau haidaua gaudia idia itaia taudia dekenai haroro namona ia henia. Lau bapatiso bona hari lau moale.” Dahaka ese unai tau matamata ia hagoadaia, tauanina ena manoka gaudia ia hanaia totona? Lauma dalanai goada ia abia lou badina hanaihanai sibona ena stadi ia karaia.
20. Edena dala ai matamata tauna ta ese Satani ena hadikaia karadia ia koua diba?
20 Keristani matamata taudia e, hari Satani ese umui ia hadikaia gwauraia! Bema umui ura Satani ena hadikaia karadia umui koua, namona be lauma aniani umui abia hanaihanai. Salamo torea tauna, ia be tau matamata danu, ese unai ia lalo-pararalaia. Iehova ia tanikiu henia badina iena hereva ia henia, unai amo ‘uhau tauna be mai goevagoeva danu do ia noho diba.’—Salamo 119:9.
Herevana Dirava ese Edeseniai Ita Ia Hakaua, Do Ita Badinaia
21, 22. Dahaka dainai ita gwau lasi hereva momokani ena dala ia auka momokani?
21 Iehova ese Israela besena be Aigupito amo ia hakaua lao Gwauhamata Tanona dekenai. Ia abia hidi dalana ena toana taunimanima edia matana dekenai be kavakava bona auka. Dala haragana, Mediterranean Davara kahana ena dala maoromaorona, ia abia hidi lasi, to Iehova ese ena taunimanima be tano gagaena ena dala aukana dekenai ia hakaua. To, unai be Dirava ena hebogahisi karana ta. Ena be ia kwadogi, to unai davara kahana ena dala amo Israela taudia be Pilistia taudia dikadia edia tano do idia hanaia. Ma dala ta ia abia hidi amo, Iehova ese ena taunimanima ia naria, Pilistia taudia ida idia hepapahuahu haraga lasi totona.
22 Unai hegeregerena, nega haida toana be hari inai negai Iehova ese ita ia hakaua dalana ia auka. Pura ta ta iboudiai, iseda Keristani gaukara be momo herea, unai haida be kongregesen heboudia, sibona eda stadi, bona haroro gaukara. Reana dala ma haida edia toana be haraga. To, ita ura henia gabuna, ita davaria totona hari ita hekwarahi gauna, be Iehova ese ita ia hakaua dalana ita badinaia karana sibona amo ita davaria diba. Unai dainai, namona be Iehova ena amo anina bada hadibaia hereva ita abia noho bona “dala maoromaoro” dekenai ita raka noho ela bona hanaihanai!—Salamo 27:11.
Anina Oi Gwauraia Diba, A?
• Dahaka dainai Keristani heboudia ita lao henia hanaihanai be gau badana?
• Tama sina ese dahaka idia karaia diba edia natudia idia durua hebou lalodiai idia kamonai namonamo totona?
• Ita kamonai namonamo totona dahaka be mai anina?
• Dahaka ese ita ia durua diba hebou lalodiai haere ita henia totona?
[Picture on page 16, 17]
Keristani heboudia lao henia karana ese ita ia durua Iehova ena dina ita laloa totona
[Picture on page 18]
Keristani heboudia dekenai dala idauidau ai Iehova ita hanamoa diba