Oi Kamonai Namonamo
1 Ita kamonai namonamo totona, iseda kara ita biagua be namo. Danu, kamonai tauna ia ura ia kamonai gaudia amo diba ia abia bona namo ia davaria. Unai dainai, Iesu ia gwau “umui emui kamonai do umui naria namonamo.”—Luka 8:18.
2 Kongrigeisen heboudia bona hebouhebou ma haida ita lao henia neganai, Iesu ena hereva be mai anina bada. Unai hebou dekenai idia henia hereva ita kamonai namonamo be gau badana. (Heb. 2:1) Henunai idia noho point haida ese oi do idia durua, Keristani heboudia dekenai oi kamonai namonamo totona.
◼ Hebou edia namo oi laloa bada. Unai Keristani heboudia dekenai ita lao neganai, Iehova be “kohu naria tauna mai ena kamonai” amo ita ia “hadibaia.”—Isa. 54:13; Luka 12:42.
◼ Hegaegae guna. Hebou dekenai do umui herevalaia bukadia oi itaia guna, bona laloaboio lasi, Baibel bona do umui stadilaia bukana oi abia mai.
◼ Hebou lalodiai, namona be oi hekwarahi idia henia herevadia oi lalohadailaia namonamo totona. Namona be emu badinai idia helai taudia oi hereva henidia lasi, bona ma haida ese idia karaia karadia oi itaia lasi. Hebou murinai dahaka do oi karaia eiava emu ura gaudia ma haida oi laloa momo lasi.
◼ Hebou dekenai idia herevalaia gaudia oi lalohadailaia namonamo. Oi sibona oi nanadaia: ‘Inai hereva ese edena bamona lau ia durua? Edena negai inai hereva lau badinaia diba?’
◼ Hereva badadia bona Baibel siridia oi torea. Unai ese oi ia durua idia herevalaia gaudia oi laloa bada bona oi laloatao totona, unai amo hereva badadia be gabeai oi gaukaralaia diba.
3 Emui Natudia Hadibaia Idia Kamonai Totona: Natudia dekenai Baibel ena hereva umui hadibaia. (Deu. 31:12) Idaunegai, ta ese Taravatu ia duahia neganai, Dirava ena taunimanima idia “kamonai namonamo” be gau badana. (Neh. 8:1-3) Bema tama sina be hebou ena kahana idauidau idia durua bona hereva idia kamonai namonamo, edia natudia be unai bamona do idia karaia danu. Natudia hamoalea totona, gadara gaudia eiava kalakala bukadia umui abia mai hebou dekenai be aonega karana lasi. Danu, toileti lao henia kava karana ese natudia edia kamonai karana ia hadikaia. “Natuna maragidia ibounai ese kavakava idia karaia noho” dainai, namona be tama sina idia itaia hebou gabudiai edia natudia idia helai namonamo bona idia kamonai namonamo.—Aon. 22:15.
4 Ita kamonai namonamo karana amo, ita hamomokania ita be aonega taudia bona ita ura iseda “diba ita habadaia.”—Aon. 1:5, BHğ.
This is a repeat of article in km 1/01 taken from km-E 1/01 “Be a Good Listener.”