Gari Lasi Bona Maino Karaia
1 Ita haroro henia taudia momo ese idia gwauraia herevadia be Baibel ena hereva bamona lasi. Unai dainai mai gari lasi ida ita haroro henidia sibona lasi, to “mai maino danu” taunimanima ita hereva henidia, unai amo anina lasi hepapahuahu do idia vara lasi. (Roma 12:18; Kara 4:29) To, Basileia sivaraina ita harorolaia neganai, edena dala ai ita gari lasi bona maino ita karaia?
2 Lalotamona Havaraia Daladia Tahua: Maino tauna be hepapahuahu karana ia dadaraia. Bema ruma tauna ese ia abia dae hadibaia herevadia be ia ida ita hepapahuahulaia kava, ia ese ita abia lao sivaraina do ia abia dae lasi. Bema ruma tauna ena hereva be kerere, reana ia ese do ia abia dae point ta be dala namona ai ita gwauraia. Ita gwauraia gauna dainai lalohisihisi do ita havaraia lasi, to ruma tauna ena lalona do ita veria ia kamonai totona.
3 Bema ruma tauna ena lalohadai kererena ita hamaoromaoroa lasi, anina be hereva momokani ita laloa maragi, a? Lasi. Ita Keristani taudia eda maduna be taunimanima edia lalohadai ita gwauraia dika lasi, to idia dekenai Dirava ena Basileia ena sivarai namona ita harorolaia. (Mat. 24:14) Namo lasi ruma tauna ena lalohadai kererena dainai ita badu, to ita gwau diba unai be nega namona ruma tauna ena lalohadai ita lalopararalaia totona.—Aon. 16:23, NW.
4 Ruma Tauna Matauraia: Nega haida hahediba kereredia ita hamaoromaoroa gwauraia neganai, namona be ita gari lasi. To, ita be maino karaia taudia dainai, namo lasi hadibaia hereva kereredia idia hadibaia bona abia dae taudia ita gwauraia dika eiava kirikirilaia. Namona be idia ita hadikaia lasi, to mai hemataurai ida edia lalona ita veria hereva momokani idia ura henia totona. Bema iseda kamonai taudia bona idia abia dae gaudia ita matauraia, idia ese ita abia lao sivaraina idia abia dae diba.
5 Aposetolo Paulo be ena kamonai taudia ese idia abia dae gaudia ia laloa bona edia kudouna ia veria diba dalanai sivarai namona ia harorolaia. (Kara 17:22-31) Paulo be mai ena lalona ibounai ida ‘taunimanima idauidau ibounai edia mauri dalana ia abia dae, dala idauidau ibounai dekena amo, haida do ia veria mauri totona.’ (1 Kor. 9:22) Bema mai gari lasi bona maino dalanai sivarai namona ita harorolaia, ita be Paulo ita tohotohoa unai.