Oi Ura Sibona Emu Teritori Oi Abia, A?
1 Sibona emu teritori be oi sibona ese oi karaia diba haroro gabuna ta. Unai teritori be oiemu noho gabuna kahirakahira ai bona oi sibona eiava ma pablisa ta ida umui karaia diba. Kongrigeisen ese idia hegaegaelaia haroro grup danu ita haroro be namo, to nega haida sibona emu teritori oi karaia neganai, taunimanima momo oi haroro henidia diba. Unai be heduru namona bema oiemu kongrigeisen ena teritori be bada herea.—Kara 10:42.
2 Ena Namo: Haida idia moale badina sibona edia teritori be edia moni gaukara gabuna kahirakahira ai neganai, dina tubu ai o gaukara murinai idia haroro diba. Haida be Buka Stadi idia do karaia lasi neganai, hora tamona eiava rua lalonai edia ruma bese ida edia noho gabuna kahirakahira idia haroro bona unai idia moalelaia. Unai dainai, edia lou henia bona Baibel stadi taudia be kahirakahira, unai amo moni idia negea lasi bona edia nega idia gaukaralaia namonamo diba. Sibona iseda teritori dekenai, nega sisina lalonai taunimanima momo ita haroro henidia diba dainai, haida be nega ta ta ai heduru painia o regula painia gaukara idia karaia diba. Danu, sibona iseda teritori ita karaia bona ruma taudia ita diba namonamo neganai, do idia gari lasi ita dekenai edia hekwakwanai idia gwauraia totona, unai amo iseda haroro herevana ita haidaua bona idia ita durua diba. Unai amo iseda gaukara be anina namona do ia havaraia.
3 Sekit naria tauna ese painia ta ia durua sibona ena teritori ia abia totona bona unai painia ia gwau: “Unai sisiba lau abia dae bona daudau lasi lalonai egu teritori dekenai idia noho taudia lau diba namonamo bona lau tura henidia. Idia dekenai ia hegeregere negadia ai, lau lou henidia. Unai dainai hua tamona lalonai egu lou henia be 35 amo ia daekau lao 80 bona egu Baibel stadi ibounai be 7.”
4 Karaia Dalana: Bema oi ura sibona emu teritori mapu ta oi abia, teritori naria tadikaka oi hereva henia. Pablisa ma ta oi boiria diba umui ruaosi umui gaukara totona bona taunimanima idia noho lasi rumadia umui torea danu. Namona be hua 4 lalonai unai teritori umui karaia haorea. Bema hua 4 lalonai oi haorea diba lasi, emu Buka Stadi naria tadikaka eiava ma haida oi noia oi idia durua totona. Hua 4 dokonai, teritori mapu be tadikaka dekenai oi henia lou eiava oi noia bema unai teritori oi karaia lou diba. To, unai teritori mapu tamona oi dogoatao hanaihanai lasi, namona be oi henia lou bona haida ese idia abia diba. Bema emu kongrigeisen ena teritori be maragi, bona oi dekenai teritori ta idia henia diba lasi, reana emu buka stadi naria tauna oi noia diba teritori ena kahana maragina ta ia henia totona. Oibe, gabu haida be dika dainai pablisa haida sibona idia gaukara diba lasi, unai dainai tadikaka ese haida dekenai teritori ia henia neganai, namona be ia laloa namonamo.
5 ‘Sivarai namona be tanobada ibounai dekenai do ita harorolaia’ ena hahegani be gaukara badana. (Mat. 24:14) Unai dainai, iseda gaukara karaia dalana ita hegaegaelaia namonamo be gau badana. Haroro grup ida ita gaukara hebou bona sibona iseda teritori ai ita gaukara ese ita do ia durua sivarai namona be taunimanima momo dekenai ita harorolaia totona.
[Study Questions]
1. Sibona emu teritori be dahaka?
2. Sibona iseda teritori ita abia ena namo haida be dahaka?
3. Sibona ena teritori ia abia painia ta be dahaka ia gwau?
4. Edena dala ai sibona iseda teritori ita abia bona ita gaukaralaia diba?
5. Haroro gaukara ena hahegani hagugurua totona, dahaka ita karaia be namo?