Iehova Ena Hoa Kara Badadia Gwauraia Hedinarai
1 “Lohiabada e, goada bona siahu bona hairai bona kwalimu, bona King ena toana be oiemu. Guba bona tanobada dekenai idia noho gaudia ibounai be oiemu.” (1 Siv. 29:11) Iehova ita lalokau henia bona ita ura ia ita tanikiu henia dainai, dahaka ita karaia? Namona be Dirava ‘ena hoa kara badadia ita gwauraia hedinarai. Badina be ia ese dibura amo ita ia boiria, vadaeni iena diari namo bada herea lalonai ita noho.’ (1 Pet. 2:9) Ita ura ma haida dekenai iseda Dirava badana ena sivarai ita gwauraia noho! March, April, bona May be nega namona Iehova ena hoa karadia ita harorolaia totona.
2 Memorial Ena Boiboi Pepana Hariharilaia: Monday, April 2 ai, Lohiabada Ena Anibou ita karaia neganai, Iehova ena hoa karadia do ita laloa. March 17 ia lao April 2 ai, tanobada hegegemadai Memorial pepana do idia hariharilaia. Ibounai ai hagoadaia unai gaukara idia karaia totona. Unai be nega namona kamonai matamata taudia ese sivarai namona idia harorolaia. Bema emu Baibel stiuden taudia eiava natudia idia hegeregere, vadaeni elda taudia oi hereva henia diba.
3 Unai boiboi pepana hariharilaia gaukarana, be vanegai “Hahemauri be Kahirakahira!” Distrik Hebouhebou totona ita karaia gaukarana bamona. Kongrigeisen dekenai unai pepapepa do ai siaia, unai amo pablisa ta ta be kopi 50 bona painia ta ta be kopi 150 ia abia diba. Emu hamatamaia herevana ia kwadogi be namo, reana oi gwau: “Oi ai boiria lagani ta ta dekenai ai karaia mai anina bada hebouna dekenai oi mai totona. Inai boiboi pepana lalonai hereva ma haida oi davaria diba.” To bema ruma tauna be mai ena henanadai, namona be iena henanadai oi haerelaia. Baibel Hadibaia bukana ena rau 206 ai ia noho herevana, Lohiabada Ena Anibou, oi gaukaralaia diba Memorial oi herevalaia totona. Wikeni ai, magasin matamatadia bona unai boiboi pepana be nega tamona do ita hariharilaia. Bema kamonai taudia oi davaria, namona be idia oi lou henia.
4 Namona be ruma taudia ta ta dekenai boiboi pepadia ita henia. To taunimanima idia noho lasi rumadia dekenai pepapepa ita rakatania lasi, to edia noho gabuna ita torea bona gabeai ita giroa lou diba. To bema March ena wiki dokonai pepapepa momo idia do noho kongrigeisen dekenai, unai nega ai taunimanima idia noho lasi rumadia dekenai pepapepa ita rakatania diba. Iseda Baibel stiuden, varavara, gaukara turadia, dekena taudia bona ma haida dekenai unai pepapepa ita henia be namo.
5 Heduru Painia: Iehova ena hoa karadia gwauraia hedinarai totona, March, April, bona May lalonai, heduru painia gaukara oi karaia diba, a? Unai oi karaia totona, emu sediual ai gau haida oi haidaua be namo. (Efe. 5:15-17) Namona be oi diba, bema oi hekwarahi emu hesiai gaukara Iehova dekenai oi habadaia, do oi moale bona Iehova ese oi do ia hanamoa. (Aon. 10:22) Memorial ia mai kahirakahira dainai, hari be nega namona palani ita karaia.—Aon. 21:5, NW.
6 Mauri lagani 90 taihu ta be lagani gunanai heduru painia gaukara ia karaia. Ia gwau: “Ena be uma gaukara lau ura henia bada bona lau ura lau hadohado matamaia, to lau itaia egu mauri lalonai mai anina bada gaudia lau atoa guna be namo. Unai dainai March lalonai heduru painia gaukara lau karaia.” Ena hekwarahi dainai hahenamo ia abia, a? Ia gwau, “Hari lau mamia lau be kongrigeisen taudia lau hetura henia namonamo, bona unai ese lau ia durua Iehova kahirakahira lau lao totona.” Iseda mauri ita tahua namonamo bona gau haida ita haidaua diba, a?
7 Reana oi laloa heduru painia gaukara ena hora 50 oi hagugurua be ia auka, to unai be momokani lasi. Namona be mai guriguri ida dina ta ta ai oi karaia gaukara oi laloa, sediual oi karaia, bena kalenda dekenai oi torea. Oi sibona emu noho dalana be oi diba. Bema oi gorere dainai emu goada be ia hegeregere lasi, reana dina ta ta ai hora haida sibona lalonai oi haroro diba. Bema ful-taim moni gaukara oi karaia eiava oi sikuli noho, heduru painia oi karaia diba, reana haroro be adorahi eiava wikeni ai oi karaia diba.
8 Momo be edia ruma bese ida heduru painia gaukara idia karaia hebou. Lagani haida gunanai, headava tau bona hahine ta be edia noho dalana dainai, idia laloa heduru painia gaukara idia karaia diba lasi. Dahaka idia karaia? “Iehova ai guriguri henia ai do ia durua, idaunegai ai ura karaia hebou gaukarana ai karaia totona.” Idia palani namonamo dainai, edia tahua gauna idia hagugurua. Idia gwau: “Ai moale bada badina hahenamo momo ai moalelaia hebou. Emai heduru hereva be inai, oi tohoa. Bema ai karaia, oi danu oi karaia diba.”
9 Emui ruma bese stadi lalonai nega umui atoa, unai amo March bona April lalonai emui haroro gaukara umui habadaia dalana umui herevalaia diba. Ena be emu ruma bese taudia ibounai be heduru painia idia karaia diba lasi, to bema ta be unai gaukara ia karaia diba, namona be ruma bese taudia haida ese idia durua be namo. Bema lasi, reana emu ruma bese taudia be unai hua lalodiai edia haroro gaukara negana idia habadaia diba.
10 Durua Heheni: Bema oi ura heduru painia gaukara oi karaia, namona be ma haida dekenai unai oi herevalaia. Reana unai ese idia do ia hagoadaia heduru painia idia karaia totona. Ma danu, guna idia painia taudia edia heduru hereva ese oi idia durua diba gau haida oi haidaua totona, bona sediual oi karaia unai amo oi painia diba. (Aon. 15:22) Bema heduru painia oi karaia diba, reana ena noho dalana be oiemu ida ia hegeregere pablisa oi noia, umui painia hebou totona, ani?
11 Elda taudia momo be dala idia karaia heduru painia idia karaia totona. (Heb. 13:7) Unai ese kongrigeisen taudia ia hagoadaia bada! Danu, elda taudia be ma haida ida idia herevahereva neganai, namona be unai taudia edia painia urana idia habadaia. Hagoadaia hereva namodia ese ma haida edia lalona ia veria diba, heduru painia gaukara idia karaia totona. Haroro naria tauna ese haroro hebou ma haida ia hegaegaelaia diba, unai amo ibounai be grup ida idia haroro diba, hegeregere sikuli eiava gaukara murinai idia karaia diba. Bona hebou negadia do ia gwauraia be namo. Danu, namona be haroro naria tauna ese teritori ia hegaegaelaia, bona ia itaia bema buka bona magasin idia hegeregere.
12 Ena be emu noho dalana dainai oi hegeregere lasi oi painia totona, to namona be idia painia taudia oi hagoadaia bona idia totona oi guriguri. (Aon. 25:11; Kol. 4:12) Reana wiki lalonai dina ta oi abia hidi diba idia ida oi gaukara totona eiava oiemu haroro gaukara oi habadaia diba.
13 April Lalonai Heduru Painia Taudia 425 Ai Tahua: Papua New Guinea brens ai, heduru painia taudia edia namba badana be 404, bona unai be April 2000 ai ita davaria. Unai dainai iseda tahua gauna be April lalonai heduru painia taudia 425 do ita abia. Unai namba ita abia diba bema kongrigeisen ena pablisa ibounai 7 7 amo, ta ta be heduru painia idia karaia. Oibe, kongrigeisen haida ai pablisa momo be edia noho dalana ia hegeregere dainai, heduru painia gaukara idia karaia diba. Unai dainai kongrigeisen momo ese unai namba idia abia diba. Mani oi laloa, unai ese emui kongrigeisen lalonai moale do ia mailaia bona emui teritori lalonai anina namona do ia havaraia!
14 Dahaka dainai April be hua namona heduru painia totona? Memorial be hua ena hamatamaia kahanai do ita karaia, unai dainai nega ia noho Memorial dekenai idia mai taudia ita vadivadi henia totona. Magasin do ita hariharilaia, to eda tahua gauna be ita lou henia taudia dekenai Baibel Hadibaia bukana ita rakatania, bona Baibel stadi ita hamatamaia. Unai dainai, April lalonai heduru painia gaukara ita karaia ese dala do ia kehoa, Baibel stadi haida ita hamatamaia totona. Ma danu, April ai Sunday ibounai be 5 bona tanobada edia holide dinana ta, unai ese dala ia kehoa idia gaukara bona sikuli taudia idia painia totona.
15 Memorial negadia ta ta ia ore neganai, anina be inai tanobada dikana ena dokona be ia kahirakahira noho. Ma haida dekenai iseda Dirava badana ita herevalaia negana be ia kwadogi. (1 Kor. 7:29) Memorial negana be nega namona iseda guba Tamana ita hanamoa totona. Unai dainai hari ita hegaegae be namo, unai amo March, April, bona May lalonai Iehova ena hoa kara badadia do ita gwauraia hedinarai!
[Study Questions]
1. Dahaka dainai Iehova ena hoa karadia ita gwauraia be namo?
2. Memorial totona dahaka do ita karaia, bona daidia be unai gaukara idia karaia diba?
3. Memorial dekenai taunimanima ita boiridia totona, dahaka ita gwau diba?
4. Memorial ena boiboi pepana be edena bamona do ita hariharilaia?
5. Dahaka dainai hari palani ita karaia be namo ita heduru painia totona?
6. Lagani gunanai heduru painia gaukara ia karaia mauri lagani 90 taihu ena ekspiriens amo dahaka ita dibaia?
7. Heduru painia gaukara karaia totona be mai ena hekwarahi, a?
8. Dahaka ese headava tau bona hahine ta ia durua heduru painia idia karaia totona?
9. Emu ruma bese stadi lalonai dahaka umui karaia diba?
10. Dahaka dainai iseda painia urana be ma haida dekenai ita herevalaia be namo?
11. Elda taudia ese edena dala ai ma haida edia ura idia habadaia diba, idia mai noho hua lalodiai idia painia totona?
12. Bema oi painia diba lasi, dahaka oi karaia diba?
13. Papua New Guinea ai, iseda tahua gauna be dahaka, bona kongrigeisen taudia ese edena bamona unai tahua gauna idia hagugurua diba?
14. Dahaka dainai April be hua namona heduru painia totona?
15. Inai Memorial negana ia mai kahirakahira neganai, dahaka dainai kara haraga lalohadaina ita hahedinaraia be namo?
[Box on page 4]
Ita Ibounai 425 be April Lalonai Heduru Painia Gaukara Ita Karaia Diba, A?
◼ Emu mauri lalonai mai anina bada gaudia oi atoa
◼ Emui ruma bese lalonai tahua gaudia umui herevalaia
◼ Emu palani be ma haida dekenai oi herevalaia