Hereva Momokani Idia Harorolaia Magasin Hariharilaia
1 Gima Kohorona—Iehova Ena Basileia Ia Harorolaia bona Awake! be hanaihanai Basileia harorolaia bona hahediba taudia halaoa gaukaradia ai ita hariharilaidia. (Mat. 24:14; 28:19, 20) Dala idauidau ai Basileia ena hesiai gaukara ita karaia neganai, ita be mai moale ida magasin rua ita hariharilaia.
2 Idia hanaia laganidia lalonai, Gima Kohorona bona Awake! edia toana, idia torea sivaraidia bona hariharilaia daladia idia haidaua. Unai idia karaia ena badina badana be taunimanima edia lalona do ita veria bona ita hadibadia namonamo totona, unai amo “taunimanima ibounai ese mauri do idia davaria, bona hereva momokani do idia diba.”—1 Tim. 2:4.
3 January 2006 amo, ita be hua ta ta dekenai idia halasia Awake! hariharilaia daladia ita dibaia. Unai hegeregerena, hua tamona lalonai ita be The Watchtower Announcing Jehovah’s Kingdom rua do ita abia, to pablik magasin sibona be haroro gaukara ai do ita hariharilaia. Danu, pablik Gima Kohorona be lagani tamona lalonai nega foa do ita abia bona do ita hariharilaia. Iseda Basileia Gaukara edia rau ginigabedia ai Awake! bona Gima Kohorona herevalaia daladia idia noho. Nega momo, unuseniai be magasin ena rau ginigunadia ai idia noho herevadia idia atoa, to nega haida lalona veria herevadia do idia atoa. Iseda Basileia Gaukara ai idia torea magasin herevalaia daladia do ita gaukaralaia namonamo diba bema magasin ena hereva ibounai ita diba namonamo eiava magasin herevalaia daladia be ita sibona eda hereva dalanai ita herevalaia.
4 Ena be Iseda Basileia Gaukara dekenai, Gima Kohorona bona Awake! magasin herevalaia daladia rua idia atoa, to kiki herevana ma ta oi gaukaralaia diba. Unai bamona ita karaia ena badina be inai: Reana magasin ena hereva ma ta be emu teritori dekenai idia noho taudia ese idia laloa bada gauna. Eiava magasin dekenai ia noho kahana ta be oi ura henia bada bona oi laloa emu teritori dekenai oi herevalaia namonamo diba.
5 Emu Hamatamaia Herevana Oi Hegaegaelaia Dalana: Gau ginigunana be, magasin dekenai do oi herevalaia kahana oi diba namonamo be namo. Reana haroro gaukara lalonai do oi hariharilaia magasin ena sivarai ibounai do oi laloatao lasi. To, namona be oi abia hidi kahana be mai ura bada ida bona moale ida oi herevalaia. Unai bamona oi karaia diba bema magasin dekenai do oi herevalaia kahana oi duahia namonamo.
6 Emu hamatamaia herevadia oi hegaegaelaia neganai, namona be hamatamaia hereva gwauraia daladia idauidau oi gaukaralaia. Reana oi duahia gauna dekenai ta ena lalona ia veria henanadai ta oi hegaegaelaia diba, emu herevahereva hamatamaia totona. Nega ibounai Dirava ena Hereva oi gaukaralaia taunimanima edia kudouna oi veria totona. (Heb. 4:12) Siri maorona ta oi abia hidi be namo, reana unai siri be oi herevalaia magasin dekenai idia gwauraia eiava idia torea hanai. Danu, unai siri bona magasin ena hereva hakapua dalana oi lalohadailaia.
7 Nega Bona Gabu Idauidau Ai: Oi hegaegaelaia kiki herevana oi gaukaralaia be namo. Saturday ai emu kongrigeisen ida oi gaukara hebou magasin umui hariharilaia totona. Hanaihanai iseda buka bona magasin idia abia dae taudia dekenai magasin ita henidia. Nega ibounai emu Baibel stiuden bona lou henia taudia dekenai magasin oi hariharilaia danu. Maketi dekenai, PMV dekenai, eiava hospital ai oi davaria taudia dekenai magasin oi henidia. Hua ta ta lalonai do oi herevalaia magasin herevalaia daladia oi haidaua loulou.
8 Gima Kohorona bona Awake! be magasin namo hereadia. Unai magasin rua ese guba bona tanobada edia Lohia Badana, Iehova, ena ladana idia abia isi. (Kara 4:24) Bona magasin lalonai idia torea Dirava ena Basileia ena sivarai namona ese taunimanima edia lalona ia hagoadaia bona idia ia durua Iesu Keriso idia abidadama henia totona. (Mat. 24:14; Kara 10:43) Ma danu, Baibel ena peroveta herevadia hamomokania gaudia idia gwauraia hedinarai noho. (Mat. 25:13) Bema magasin hariharilaia dala namodia ita hegaegaelaia, vadaeni, iseda teritori ai idia noho taudia be unai magasin amo heduru do idia abia!
9 Bema ta dekenai magasin oi henia eiava Baibel ena hereva ta oi herevalaia, namona be oi hegaegae henanadai ta eiava lalona veria herevana ta oi gwauraia totona, unai ese dala do ia kehoa lou henia oi karaia eiava haroro herevana oi habadaia totona. Hereva momokani ena uhe hadoa gaukarana ita karaia goadagoada neganai, ita diba momokani Iehova ese kudou-maoro taudia edia lalona do ia kehoa Ia idia dibaia bona hesiai henia totona.—1 Kor. 3:6.
[Study Questions]
1. Gima Kohorona bona Awake! edia gaukara be dahaka?
2. Gima Kohorona bona Awake! dekenai dahaka gaudia idia haidaua, bona dahaka dainai?
3. Haroro gaukara ai, iseda magasin be edena bamona ita gaukaralaidia diba?
4. Dahaka dainai Iseda Basileia Gaukara dekenai idia noho magasin herevalaia daladia sibona lasi, to ma haida ita gaukaralaia diba?
5. Magasin oi do hariharilaia lasi neganai, dahaka oi karaia guna be namo?
6. Hamatamaia herevadia be edena bamona ita hegaegaelaia diba?
7. Edena dala ai iseda kiki herevadia ita haidaua loulou?
8. Dahaka dainai Gima Kohorona bona Awake! magasin be namo herea?
9. Lou henia ita karaia eiava haroro herevana ita habadaia totona, dahaka ita karaia diba?