Hegaegae—Lou Henia Gaukarana Karaia Namonamo Totona
1 Iesu be ena hahediba taudia ia hegaegaelaia, “Basileia ena Sivarai Namona” idia harorolaia namonamo totona. (Mat. 4:23; 9:35) Unai be Palestine sibona dekenai ia karaia. To, Iesu be guba ai ia do daekau lasi neganai, ia gwau haroro gaukara be do ia bada ia lao bona ‘bese ibounai be diba tahua taudia do idia halaoa.’—Mat. 28:19, 20.
2 Iesu ena hahegani ena anina ta be inai: Dirava ena Basileia ena sivarai namona ia kamonai tauna ita lou henia bona ita hadibaia Iesu ese ita dekenai ia henia hereva ibounai be do ia badinaia. To, lou henia gaukarana ita karaia namonamo totona, ita hegaegae namonamo be mai anina bada.
3 Lou Henia Dalana Kehoa Guna: Pablisa haida be vadivadi ginigunana ena dokonai, kamonai tauna ta dekenai henanadai ta idia henia bena idia gwauhamata do idia giroa lou haere idia herevalaia totona. Lou henia idia karaia neganai, Baibel Hadibaia bukana idia gaukaralaia, unai ese idia ia durua maoromaoro Baibel stadi idia hamatamaia totona.
4 Namona be Awake! bona Gima Kohorona matamatadia idia abia taudia ita lou henia; namo lasi magasin sibona ita rakatania bena ita naria ela bona magasin matamata idia ginidae bena ita giroa lou. Lasi, namona be ita lou henia bona ia abia vadaeni magasin ena kahana ta ita kikilaia, reana unai ese ena ura do ia habadaia.
5 Dahaka Gaudia Do Oi Kikilaia: Kamonai tauna oi do lou henia lasi neganai, nega sisina lalonai emu noutbuk oi itaia bona umui kikilaia vadaeni gaudia oi laloa lou. Hegeregere, reana guna oi rakatania buka o magasin o pepapepa amo point haida oi ura herevalaia. Eiava umui kikilaia gauna ena anina ia habadaia bukana oi ura rakatania. Eiava bema guna henanadai ta oi rakatania, vadaeni unai oi ura haerelaia. Danu, Baibel ena siri ta oi duahia, unai amo emu hereva oi hamomokania diba.
6 Iseda Tahua Gauna: Momokani, eda tahua gauna be Baibel stadi ta ita hamatamaia. Tadikaka ta be lou henia tauna dekenai stadi ia herevalaia, to unai tau ia ura lasi. Tadikaka be magasin matamatadia ia abia lao neganai, ia gwau, “Ai be iniseniai ai vadivadi, bona emu gabu taudia dekenai henanadai ta ena haere be Baibel amo ai haerelaia.” Unai tau be ena lalohadai ia gwauraia murinai, tadikaka be Baibel siri ta ia duahia bena Baibel stadi bukana ta ena paragraf ta ia duahia. Tadikaka be unai dala amo Baibel stadi ta ia hamatamaia bona karaia hanaihanai.
7 Bema ita hegaegae namonamo lou henia ita karaia totona, unai ese ita do ia durua Baibel stadi ta ita hamatamaia. Unai ese eda moale do ia habadaia, bona “kudou-maoro taudia” do ita durua mauri dalana ai idia raka totona.—Kara 13:48, NW.
[Study Questions]
1. Iesu ena hahediba taudia ginigunadia edia haroro gaukara ena bada be edena bamona?
2. Iesu ena hahegani ena anina ta be dahaka?
3. Vadivadi ginigunana ai, edena dala ai lou henia dalana oi kehoa diba?
4. Dahaka dainai magasin matamata idia abia taudia ita lou henia haraga?
5. Dahaka dainai do oi karaia gaudia oi laloa be namo?
6. Lou henia ita karaia neganai, iseda tahua gauna be dahaka?
7. Edena dala ai hegaegae namonamo karana ese ita ia durua Baibel stadi ta ita hamatamaia totona?