Dina Tamona Hebouhebou Ena Program Matamatana

Lagani 2009 ena dina tamona hebouhebou ena sinado be, “Hesiai ‘Gaukara be Do Oi Karaia Haorea Momokani,’ ” unai be Kolose 4:​17 amo idia abia. Ita be Keristani taudia dainai, unai sisiba ita laloa bada be namo. Ita ura mai eda abidadama ida iseda haroro gaukara do ita karaia guguru, Iesu ia karaia bamona. (Ioa. 17:14) Danu, haroro gaukara dekenai aposetolo Paulo ena haheitalai namona ita tohotohoa be namo. Ia be ena lalona ia hadaia haroro gaukara ia karaia haorea totona.​​—Kara 20:24.

Sekit naria tauna ena tok ese do ia hahedinaraia edena dala ai pablisa ta ta be edia haroro gaukara idia koua hekwakwanai idia hanaia. Tok ta ladana, “Oi Hadoa Gauna Oi Naria Namonamo” ese “mauri hanaihanai idia ura kudou-maoro taudia” ita durua dalana do ia hahedinaraia. (Kara 13:​48, NW ) Vadivadi tauna ese tok ladana, “Edena Dala ai Ita Hahedinaraia Ita be Dirava Ena Hesiai Taudia?” ia henia neganai, ia ese 2 Korinto 6:​1-​10 ena siri ta ta do ia herevalaia guna. Bena adorahi kahanai, ia ese tok ladana, “Emu Haroro Gaukara Oi Laloa Bada,” amo helai taudia do ia hereva henia. Tok rua edia ladana be, “Matamata Bona Buruka Taudia be Haroro Gaukara Idia Moalelaia” bona “Hesiai Gaukara Idia Karaia Matamata Taudia,” bona unai ese oi do ia hagoadaia bada. Bema ta ia ura dina tamona hebouhebou (o sekit hebouhebou) ai bapatiso ia abia, hakaua naria tauna idia hadibaia haraga be namo. Iseda hebouhebou ena kahana badana ta be Gima Kohorona herevalaia karana. Emui Gima Kohorona umui abia lao be namo, dina tamona ena pura totona idia makaia kahana umui stadilaia totona.

Bema eda haroro gaukara ita sekea bona hagugurua, vadaeni do ita gaukara goada bona ita ura lasi gau ta ese Iehova ia henia gaukarana ia koua. Namona be dina tamona hebouhebou ena hagoadaia herevadia ese ita ibounai do ia durua ita laloparara dahaka lalohadai maorona ita dogoatao be namo, bona edena dala ai haroro gaukara ita karaia guguru totona.