Sekit Hebouhebou Ena Program Matamatana

Tomadiho momokani idia dagedage henia taudia huanai ita gini goada diba, a? Edena dala ai Satani ena hahetoho idauidau ita halusia diba? Lagani 2009 ena sekit hebouhebou ena program ese unai henanadai badadia do ia haerelaia. Ena sinado be, ‘Kara Namo amo Dika Umui Halusia Noho.’ (Roma 12:21) Mani hebouhebou ena program lalonai do idia herevalaia gaudia haida ita itaia.

Distrik naria tauna ese inai tok idauidau do ia henia: “Goada Ita Abia, Dika Ita Halusia Totona,” “Namo Lasi Oi Laloa Oi be mai Emu Goada!,” “Kahirakahira Dika Ibounai Do Ia Ore!,” bona “Eda Abidadama Ita Hagoadaia Tanobada Ita Halusia Totona,” do ia henia. Sekit naria tauna be Roma 13:​11-​13 amo idia abia herevana ena ladana, “Hari be Ita Noga Negana!” bona Aonega Herevadia 24:10 amo idia abia herevana ena ladana, “Hekwakwanai Negadiai Oi Goada Noho be Namo,” do ia henia. Danu, sekit naria tauna ese “Sekit Durua Daladia” ena kahana do ia henia. Tok namona ma ta ena ladana be, “Painia Gaukara amo​​—Ma Haida Oi ‘Hadibaia’ Diba, A?” Saturday ai, hereva ta mai ena kahana foa edia sinado be, “Umui Gini Goada Noho Bona Satani Ena Koikoi Karadia Dadaraia.” Unai kahana foa ese ita do ia durua Satani ese hehuni dalanai kompiuta kohu matamatadia, moale karadia, bona edukeisen amo ia halasia gaudia ita dibaia bona dadaraia totona. Sunday ai, hereva ta mai ena kahana foa edia sinado be, “Goada Oi Abia, Satani Dadaraia Totona” bona unai kahana ese do ia hahedinaraia edena dala ai ita ese Efeso 6:​10-​18 ena sisiba ita badinaia totona.

Basileia sivaraina ita harorolaia namonamo totona, namona be Satani bona ia gaukaralaia gaudia ita halusia. (Apok. 12:17) Oibe, Satani be ia laga-ani lasi, to hanaihanai Iehova ena Witnes taudia ia tuari henidia! (Isa. 43:​10, 12) To Satani be do ia kwalimu lasi, badina ita be eda lalona ita hadaia ‘kara namo amo dika ita halusia noho’ totona. Namona be palani oi karaia unai sekit hebouhebou ena program ibounai oi reaia lasi totona.