“Dahaka Do Lau Karaia be Namo?”
1 Hari oi be matamata bona gabeai tau eiava hahine badana ai do oi lao dainai, oi sibona oi nanadaia, ‘Egu mauri lalonai dahaka do lau karaia be namo?’ Keristani matamata taudia idia ura Iehova hesiai henia karana idia habadaia. To edena dala ai unai oi karaia diba bema tau o hahine badana edia maduna haida oi huaia matamaia, hegeregere oi sibona emu tauanina durua gaudia oi tahua? Reana unai henanadai ena haere oi davaria be ia auka. Danu, Papua New Guinea lalonai, reana haida be oi dekenai maduna do idia henia, emu tama sina idia buruka neganai oi naridia bona edia tauanina durua gaudia oi henia totona.
2 Matamata taudia haida idia itaia tanobada ena bisinesi momo idia dika bona vaira negana idia laloa neganai, idia lalohekwarahi. Idia henanadai: ‘Edukeisen o kosi ma haida lau abia be namo, a? Maoromaoro ful-taim hesiai gaukara o painia gaukara lau hamatamaia be namo, a?’ Ta ese abia hidi maorona ia karaia totona, namona be mai momokani ida inai henanadai ia haerelaia, ‘Egu mauri dekenai dahaka be gau badana?’ Namona be iena lalona ia tahua namonamo.
3 Oi matamata neganai, oi bona emu tama sina ese umui laloa bada gauna be dahaka? Oi ura bada moni gaukara namona ta oi tahua, o oi ura emu mauri oi gaukaralaia Basileia gaukaradia oi karaia totona, a? Ena be ta be iunivesiti ena digri pepana ia abia, to ita gwau diba lasi moni gaukara do ia davaria. Momo be vokeisenel sikuli, teknikol sikuli, o kosi ma haida idia karaia bona gaukara namona ta idia dibaia, unai amo nega bada idia henia ful-taim hesiai gaukara idia karaia totona.
4 Iehova Ena Gwauhamata Oi Abidadama Henia: Gau badana be inai ita laloatao: Iehova Dirava ia gwauhamata, ia be Basileia idia tahua guna taudia do ia naridia. (Mat. 6:33) Unai be gwauhamata momokanina. Hesiai Gaukara Hadibaia Sikulina (eiava MTS) idia lao tadikakadia momo be hereva momokani idia do dibaia lasi neganai, iunivesiti ena digri pepadia idia abia. Ena be unai digri idia abia to edena moni gaukara idia karaia? Idia haida sibona be iunivesiti ai idia dibaia gaukarana idia karaia noho. To momo be moni gaukara idauidau idia karaia, unai amo idia abia monina ia hegeregere sibona edia tauanina durua gaudia idia hoia bona painia gaukara idia durua totona. Edia hesiai gaukara idia habadaia dainai hahenamo bada idia abia noho, bona unai ese moni ena namo ia hanaia.
5 Sikuli ma haida do oi abia o lasi ena abia hidi oi karaia gwauraia neganai, gau ibounai oi laloa o tahua namonamo guna be namo. Namona be March 8, 1998, Awake!, rau 19-21 ai idia noho herevadia oi itaia, unai ese oi do ia durua abia hidi maorona oi karaia totona. Emu tama sina, elda taudia, emu sekit naria tauna, bona emu kongrigeisen ai lagani momo idia painia taudia ida oi herevahereva. Unai ese oi do ia durua mai aonega ida inai henanadai do oi haerelaia: ‘Egu mauri lalonai dahaka do lau karaia be namo?—Had. 12:1, 13.
This is a repeat of article in km 4/99 taken from km-E “What Should I Do?”