Gima Kohorona Ena Kahana Ibounai Oi Gaukaralaia, A?
1 Taihu ta be January 1, 2008 ena Watchtower ia duahia murinai, ia gwau: “Lau ura bada haroro gaukara lalonai lau gaukaralaia!” Gima Kohorona, pablik gauna, ena kahana haida oi duahia bona haroro gaukara lalonai do oi hariharilaia daladia oi hegaegaelaia vadaeni, a?
2 “Iesu amo Ita Dibaia Gaudia”: Reana oi davaria inai kahana amo Baibel stadi oi hamatamaia diba. Reana ruma tauna dekenai hereva kwarana oi hahedinaraia, bona paragraf ginigunana dekenai Iesu ena hereva oi duahia. Bema ruma tauna ia kamonai, vadaeni ia dekenai hereva kwara maragidia oi herevalaia diba, idia be ruma tauna ena lalona veria henanadai. Ruma tauna oi noia unai henanadai ia haerelaia totona. Laulau oi herevalaia sisina, bona paragraf ma ta dekenai oi hanaia. Reana vadivadi ginigunana ai, paragraf ginigunadia oi herevalaia diba, bona gabeai oi giroa lou neganai, dokona kahana oi herevalaia. Namona be oi hegaegae Baibel Hadibaia bukana amo stadi oi hamatamaia totona.
3 “Famili Ena Moale Havaraia Daladia”: Tatau, hahine, bona tama sina be hekwakwanai idia davaria neganai, inai kahana ese idia ia durua edena dala ai Baibel ena hakaua herevadia idia badinaia totona, unai amo ruma bese lalonai maino do ia noho. Danu, inai kahana amo Witnes lasi taudia oi durua Baibel ena aonega herevadia idia diba totona.—2 Tim. 3:16, 17.
4 Matamata Taudia Totona. “Iseda Matamata Taudia Totona” ena kahana ese matamata taudia ia durua idia duahia gauna idia laloa namonamo, bona Baibel ena sivarai idia tahua namonamo totona. Haroro gaukara lalonai unai kahana amo matamata taudia oi durua diba, bona idia dekenai oi hahedinaraia Baibel stadi karana be mai ena namo bada. (Sal. 119:9, 105) Tama sina oi hereva henidia neganai, “Emui Natudia Hadibaia” ena kahana oi gaukaralaia diba. Unai kahana be matamata taudia ia durua diba Baibel ese ia gwauraia taudia edia haheitalai amo mai anina bada gaudia idia dibaia totona. Emui natudia ida unai kahana umui duahia hebou, a?
5 Kahana Ma Haida: “Duahia Taudia Idia Henanadai” be Witnes lasi taudia ese idia henia henanadai. Unai kahana be ruma-ta-ruma-ta gaukara ai oi gaukaralaia diba. “Revareva ta . . . Amo” be misinari taudia bona ma haida ese edia haroro gaukara lalonai idia davaria ekspiriens ia herevalaia. Unai kahana amo kamonai tauna be do ia laloparara sivarai namona be gabu ibounai dekenai idia harorolaia bona unai be Keriso ena noho ena toana ta.—Mat. 24:3, 14.
6 “Dirava Kahirakahira Oi Lao,” be Tiokratik Haroro Sikuli ena Baibel duahiduahi amo idia abia, bona kudou-maoro taudia edia lalona ia veria Iehova idia dibaia totona. Bona inai kahana, “Edia Abidadama Tohotohoa,” ese taunimanima ia durua Baibel ena sivarai be edia lalona ena matana amo idia itaia totona, bona Baibel ese ia gwauraia taudia ese idia karaia abia hidi, idia davaria hekwakwanai, bona edia abidadama ia hahedinaraia namonamo.
7 Ita moale badina lagani ta lalonai ita be Gima Kohorona, pablik gauna, be nega foa ita abia diba! Unai dainai, Gima Kohorona ena kahana ta ta ita diba be namo bona iseda haroro gaukara lalonai ita hariharilaia.