Edena Dala ai Witnes Lasi Adavadia Ita Durua Diba?
1 Iehova ena hesiai taudia momo edia adavadia be tadikaka idia diba namonamo bona kongrigeisen taudia idia lalonamo henidia, to idia ura lasi Dirava ena hesiai taudia ai idia lao. Taihu ta ena Witnes lasi adavana ia gwau: “Ruma-ta-ruma-ta haroro gaukara do lau karaia lalohadaina ese lau ia koua.” Ma haida be Baibel ena taravatu idia utua karadia idia rakatania be namo, eiava idia laloa edia adavana ese idia karaia tiokratik gaukara idauidau be do idia karaia diba lasi. Edena bamona idia ita durua diba?
2 Edia Namo Ita Laloa: Ma haida edia namo ita laloa bona idia lalohekwarahilaia gaudia ita diba karana ese reana dala do ia kehoa, idia ese Baibel ena hereva momokani idia abia dae totona. (Fili. 2:4) Guna edia adavadia edia tomadiho idia abia dae lasi taudia be nega momo Witnes taudia ma haida ese mai lalokau ida idia durua karana idia herevalaia. Paragraf ginigunana ai ita herevalaia taihu ena adavana, ia gwau: “Kongrigeisen ena elda ta ladana José ese lau ia durua bada. Lau laloa ia ese lau ia hagoadaia dainai, stadi lau matamaia.” Taihu ma ta ena adavana ia gwau, ia idia vadivadi henia tadikaka idia ura bada ia laloa bada gaudia idia herevalaia hebou. Ia gwau: “[Egu adavana] ena tomadiho oreana lau ura henia. Lau itaia ena turadia be diba momo taudia, gau idauidau idia kikilaia diba taudia.”—1 Kor. 9:20-23.
3 Durudia: Witnes lasi adavadia be reana idia abia heduru namona dainai, edia lalona ia veria. (Aon. 3:27; Gal. 6:10) Taihu ta ena Witnes lasi adavana ena motuka ia dika neganai, Witnes tau matamata ta ese ia durua. Ia gwau: “Unai lau moalelaia bada.” Tadikaka ma ta be dina ibounai lalonai taihu ta ena Witnes lasi adavana ia durua, magu idia haginia totona. Idia gaukara bona herevahereva hebou dainai, turana namodia ai idia lao. Pura rua murinai, unai tau be tadikaka dekenai ia lao bona ia gwau: “Hari be nega namona egu mauri lalonai gau haida lau haidaua totona. Ia namo Baibel amo lau oi stadi henia?” Haroro bona hebou lao henia karana ia goadalaia bona hari ia be bapatiso Witnes tauna ta.
4 Iseda teritori ai kamonai taudia ita tahua noho lalonai, namona be eda abidadama tamona taudia edia Witnes lasi adavadia ita durudia noho.—1 Tim. 2:1-4.
This is a repeat of article in km 2/04 taken from km-E 1/04 “How Can We Help Non-Witnes Mates?”