Haroro Grup Ena Hebou

1. Dahaka dainai haroro gaukara karaia namonamo dalana ita laloa be namo?

¹ Iesu be Basileia harorolaia gaukarana haria bona naria namonamo karana dekenai haheitalai namona ia hahedinaraia. Unai hegeregerena, hari inai negai, tanobada hegegemadai haroro gaukara idia naria tadikaka be idia ura Iesu ena haheitalai idia tohotohoa. Unai dainai tanobada hegegemadai, kongrigeisen iboudiai be haroro grup ena hebou idia karaia, unai amo pablisa taudia be haroro gaukara idia karaia namonamo diba.​​—Mat. 24:​45-​47; 25:21; Luka 10:​1-7.

2. Haroro grup ena hebou idia karaia ena badina be dahaka?

² Dala Namona Ta: Haroro grup ena hebou idia karaia ena badina be pablisa taudia idia hagoadaia, heduru herevadia idia henia, bona pablisa taudia dekenai teritori idia hadibaia. Unai hebou ai, dina ena siri idia kikilaia diba bema dina ena siri be haroro gaukara ia herevalaia. Nega haida, Iseda Basileia Gaukara, Herevalaia bukana eiava Haroro Sikuli bukana amo haroro ai idia gaukaralaia diba gaudia idia herevalaia. Do idia hariharilaia buka eiava magasin idia haheitalaia diba. Guriguri do lasi neganai, namona be haroro taudia ibounai idia diba haroro gaukara ai edena grup ida do idia gaukara, daika do idia bamoa, bona edena teritori do idia karaia. Haroro grup ena hebou be miniti 15 ia hanaia lasi be namo, unai amo ibounai be teritori dekenai idia lao diba.

3. Haroro grup ena hebou be daidia ese idia hegaegaelaia?

³ Edena Bamona Idia Hegaegae? Haroro naria tauna be kongrigeisen ena haroro teritori idia hegaegaelaia. Haroro grup naria taudia bona edia durua taudia be wikeni ai haroro gaukara idia gunalaia. Elda bona hesiai taudia haida ese wiki lalonai haroro grup idia bamoa diba. Haroro grup idia naria taudia be haroro naria tauna ida teritori idia makaia hebou, unai amo wikeni ai grup be ruma-ta-ruma-ta haroro gaukara idia karaia diba. Wiki lalonai, haroro naria tauna ese haroro grup do ia naria tadikaka ia abia hidi.

4-6. (a) Haroro grup ena hebou ena badina be dahaka? (b) Haroro naria tauna ese dahaka henanadai haida ia laloa be namo?

⁴ Edeseniai Bona Edena Nega ai Idia Hebou Diba? Namo lasi gabu tamona sibona dekenai haroro ena hebou ita karaia, to namona be pablisa ibounai idia hedavari diba gabuna ta ita abia hidi, eiava tadikaka ta ena ruma, eiava teritori ai ita hebou, unai amo teritori ibounai ita karaia namonamo diba. Kingdom Hall ita gaukaralaia diba danu haroro grup ena hebou ita karaia totona. Kongrigeisen momo be Sunday ena hebou murinai haroro grup ena hebou idia karaia. To namona be haroro grup ena hebou be teritori kahirakahira ita karaia, teritori dekenai ita lao haraga totona. Papua New Guinea dekenai, nega momo teritori dekenai haroro grup ena hebou idia karaia. Bema unai ita karaia, taunimanima momo idia noho gabudiai unai hebou ita karaia lasi. To haroro naria tauna ese kongrigeisen ena teritori ia sekea loulou bona ia hegaegaelaia be namo, unai amo teritori idia karaia namonamo diba.

⁵ Teritori ena bada hegeregerena, namona be haroro naria tauna ese haroro grup do idia hebou ena nega bona gabu, bona wiki lalonai teritori hida do idia karaia ia abia hidi. Paragraf 6 ai idia noho henanadai ese haroro naria tauna ia durua haroro grup ena hebou gabuna bona nega ia abia hidi totona.

⁶ Edena teritori ita karaia loulou be namo? Edena nega be nega namona ruma-ta-ruma-ta gaukara ita karaia totona? Adorahi kahanai ruma-ta-ruma-ta haroro gaukara eiava lou henia ita karaia diba, a? Kongrigeisen ena notisbod dekenai haroro gaukara ena sediual ia noho be namo. Danu, Basileia harorolaia pablisa ibounai edia tahua gauna be, kongrigeisen ena teritori ibounai dekenai kamonai taudia momo ita durudia, vadaeni Paulo ena hereva bamona ita gwau diba, “harihari egu gaukara inai kahana dekenai be ia ore vadaeni.”​​—Roma 15:23.

7. Haroro grup ena hebou do ia naria tadikaka ena maduna be dahaka?

⁷ Haroro Grup Ena Hebou Karaia Dalana: Haroro grup ena hebou do ia naria tadikaka ia hegaegae namonamo neganai, ia hahedinaraia ia be tiokratik dalana ia matauraia. Namona be nega korikori ai unai hebou ia hamatamaia, bona hebou be miniti 15 do ia hanaia lasi. Idia do hebou lasi neganai, grup ia naria tauna be teritori ia diba be namo. Ena be haida be do idia mai leiti, to namo lasi idia umui naria, hadibaia hereva ta umui rakatania diba unai amo teritori dekenai grup idia davaria haraga diba. Unai hebou ia ore murinai, maoromaoro pablisa ibounai be teritori dekenai idia lao be namo. Haroro grup ena hebou ai haroro dalana ita herevalaia namonamo karana ese unai dina ai do idia haroro taudia ibounai ia durua edia haroro gaukana idia karaia namonamo totona.​​—Aon. 11:14.

8. Edena dala ai haroro naria tauna bona haroro totona idia hebou taudia idia gaukara hebou diba?

⁸ Haroro Grup Ena Hebou Ita Lao: Gau badana be ita gaukara hebou. (Heb. 13:17) Haroro ena grup ia naria tauna ese pablisa ta ta edia bamoa taudia do ia abia hidi. Unai hebou lalonai idia manada pablisa idia noho be namo, unai amo pablisa matamatadia ida idia gaukara hebou diba. Nega haida, ma pablisa idaudia ida ita gaukara hebou diba, unai dala amo ta ta ita hagoadaia heheni. (Aon. 27:17; Roma 15:​1, 2) Namona be ita ibounai ita hekwarahi nega korikori ai ita ginidae totona. Unai tiokratik dalana bona iseda tadikaka taihu ita matauraidia dainai, ita herevalaia gaudia ita badinaia be namo.​​—2 Kor. 6:​3, 4; Fili. 2:4.

9. Edena dala ai painia taudia ese haroro grup ena hebou idia durua?

⁹ Painia Taudia Edia Heduru: Haroro grup ena hebou ai painia taudia idia noho be mai anina bada, bona idia ese ma haida idia hagoadaia. Momokani, painia taudia be mai edia maduna idauidau. Idia be Baibel stadi bona lou henia sibona idia karaia lasi, to ruma bese taudia naria karana bona moni gaukara idia karaia danu. Unai dainai, ita gwau lasi painia taudia be haroro grup ena hebou ibounai dekenai idia mai be namo. To, namona be nega idia atoa nega ta ta ai pura ena haroro grup idia bamoa totona. Haroro grup ena hebou amo diba ita abia, bona painia taudia be haroro gaukara idia manada dainai ma haida idia durua diba. Nega ibounai idia haroro dainai, taunimanima idauidau hereva henia daladia idia manadalaia. Bona unai be ma haida dekenai idia hadibaia diba. Edia haroro gaukara idia goadalaia bona haroro grup idia bamoa karana ese ita ia hagoadaia edia haheitalai namodia ita tohotohoa totona. Idia ese haroro grup ena hebou idia durua dainai, idia ita tanikiu henia be namo.

10. Dahaka dainai Basileia ena sivarai namona idia harorolaia pablisa ibounai ese haroro grup ena hebou idia laloa bada be namo?

¹⁰ Iesu bona ena hahediba taudia idia karaia bamona, iseda Basileia harorolaia gaukara ena kahana badana be ruma-ta-ruma-ta gaukara. Haroro grup ena hebou ita karaia ena badina be ta ta do ita hagoadaia heheni bona haroro gaukara ita karaia namonamo totona. Sivarai namona idia harorolaia pablisa ibounai ese unai tiokratik dalana idia badinaia bona durua be gau badana. (Kara 5:​42; 20:20) Namona be mai iseda kudouna ibounai ida haroro grup ena hebou ena dala ita badinaia. Unai ita karaia neganai, Dirava ena Basileia harorolaia gaukarana lalonai Iehova ese ita do ia hanamoa bona iseda Gunalaia Tauna, Iesu Keriso, ita hamoalea danu.​​—Mat. 25:​34-​40; 28:​19, 20.