Kongregesen Ena Buka Stadi
Kahana 3: Haroro Gaukara Totona Idia Hebou Gabuna
1 Kongregesen Buka Stadi gabuna dekenai, buka stadi sibona idia karaia lasi to danu haroro gaukara ena hebou idia karaia diba. Namona be unai hebou edia nega be pablisa taudia momo dekenai idia hegeregere, bona namona be unai hebou dekenai tadikaka idia haroro gabuna bona dalana idia hegaegaelaia namonamo.
2 Bema grup taudia edia dala idia hegaegaelaia namonamo edia stadi totona bona haroro gaukara totona, lauma dalanai do idia goada. Ita ibounai ese heduru ita abia badina buka stadi dekenai iseda lalona idia hagoadaia bona sisiba be ita idia henia. Unai ese ita ia durua ruma tauna ena dadaraia herevana ita hanaia totona, bona ruma tauna dekenai kiki hamatamaia dalana bona Bible stadi hamatamaia dalana eiava lou henia karana dekenai dahaka ita hereva ita diba totona danu. Haroro gaukara ena hebou dekenai pablisa bona pioneer taudia idia noho neganai, unai heduru idia henia diba.—Gal. 6:9, 10.
3 Buka Stadi Naria Tauna Ena Gaukara: Kongregesen Buka Stadi naria tauna ese grup taudia ia hakaua, bona ia be mai ena maduna edia haroro gaukara ia naria. Nega ibounai ia be pablisa taudia danu haroro gaukara idia karaia hebou. (1 Pet. 5:2, 3) Bema haroro gaukara edia hebou ia hegaegaelaia namonamo, grup taudia dekenai Bible ena sisiba bona ma sisiba namodia do ia henidia, bona unai ese do ia durudia edia haroro gaukara lalonai. Nega momo, dala namona be buka stadi grup ta ta be sibona edia gabu dekenai haroro edia hebou idia karaia; namo lasi grup iboudiai be gabu tamona dekenai idia hebou. To, reana grup maragidia rua be gabu tamona dekenai haroro gaukara ena hebou idia karaia diba. Haroro gaukara be Gima Kohorona stadi murinai idia karaia neganai, namona be buka stadi naria taudia ta ta ese sibona edia grup idia naria.
4 Bema wiki ibounai haroro gaukara ena hebou idia karaia, pablisa taudia do idia haroro nega ibounai. Bema haroro gaukara ena hebou idia karaia nega korikori ai bona edia gabu korikori dekenai, edia sediual hegeregerena, pablisa taudia ese palani idia karaia diba, bona idia lalo-goada badina idia diba teritori idia hegaegaelaia vadaeni bona ma pablisa haida do idia noho, haroro gaukara lalonai idia bamoa totona. (Luka 10:1) Bema buka stadi naria tauna ia noho diba lasi, ia ese teritori bona grup taudia edia gaukara ia hegaegaelaia. (om MO rau 44, 45) Bema haroro gaukara ena hebou ia naria totona ia hegeregere tadikakana ta ia noho lasi, buka stadi naria tauna ese taihu ta ia abia hidi diba unai do ia karaia totona. (om MO rau 77, 78) Namona be grup taudia be nega ibounai gabu tamona bona nega tamona dekenai idia hebou, haroro gaukara totona, unai dala amo pablisa taudia do idia daradara lasi. Bema nega haida dekenai haroro totona idia hebou gabuna o negana idia ura haidaua, namona be kongregesen idia hadibaia guna, wiki tamona idia do haidaua lasi neganai.
5 Idia Gaukara Hebou Namonamo be Gau Badana: Namona be tadikaka taihu iboudiai ese dala idia tahua haroro gaukara idauidau idia karaia namonamo totona. Pablisa idia hegaegae hebou diba bona unai negai haroro hereva haida idia karaia loulou diba, ela bona idia manadalaia. Idia hegaegae neganai, ruma taudia edia dadaraia herevadia idia gwauraia diba, bona kongregesen ena teritori dekenai nega momo idia vara karadia idia haheitalaia diba.—Her. 27:17.
6 Oi ura ia diba momo pablisa ta ese oi do ia durua, oi be hahediba taudia karaia gaukarana dekenai do oi manada totona, a? Bema oibe, emu Kongregesen Buka Stadi naria tauna oi hadibaia. Reana ia ese dala ia hegaegaelaia diba, bona diba momo pablisa tauna ta ese oi do ia durua. Heduru do oi abia totona, sisiba oi badinaia namonamo bona umui gwauraia hidi negadia bona gabudia dekenai nega korikori ai oi ginidae, haroro gaukara umui karaia hebou totona.
7 Namona be ita ibounai ita durua heheni, sivarai namona harorolaia bona hahediba taudia havaraia gaukarana do ita karaia namonamo totona. Tanobada lalonai idia vara gaudia idia dika idia lao dainai, idia hamomokania unai gaukara ita karaia be gau badana. Unai gaukara amo taunimanima ita hamauria diba, bona Iehova ese taunimanima haboua gaukarana ia haharagaia. (Isa. 60:22) Iehova be ita dekenai ia henia hesiai gaukarana ita laloatao neganai, iseda Kongregesen Buka Stadi grup danu do ita gaukara hebou namonamo iseda maduna ita karaia guguru totona, bona do ita hagoadaia heheni.—Roma 12:6-8; 2 Tim. 4:1, 2, 5.