Kongregesen Buka Stadi be Diba Habadaia Gabuna

¹ Iehova ena orea dekenai, Kongregesen Buka Stadi be mai anina bada, badina tadikaka bona taihu edia diba ia habadaia. Teritori lalonai, buka stadi be gabu ta ta ai idia karaia, unai be namo badina ura taudia iboudiai idia lao be hekwarahi lasi. Edia hanua lalonai buka stadi idia karaia dainai, kamonai taudia idia boiridia mai neganai, reana idia ura idia lao.

² Idia ura unai grup ta ta iboudiai do idia maragi noho. Unai neganai stadi naria tadikakana be ta ta iboudiai ia durudia diba. Lauma dalanai, haida idia tubu haraga to ma haida idia tubu haraga lasi. Ena be ta ese stadi ia hegaegaelaia guna, to reana stadi ena hereva ta ia do daradaralaia, stadi ia ore murinai, stadi naria tauna be ia danu do ia kikilaia lou. Danu, grup ia maragi neganai, taunimanima idauidau momo ese haere idia henia diba bona Baibel siri idia duahia diba. Pura ta ta iboudiai, stadi durua totona, haere oi henia, a? Oi sibomu emu hereva amo haere oi henia, a? Bema haere totona oi hegaegae, unai ese oi bona ma haida ia durudia. Oi hegaegae neganai, unai stadi ena hereva be edena bamona oi badinaia diba, oi laloa namonamo.​—Heb. 5:14.

³ Buka stadi naria tauna ena hadibaia dalana oi itaia namonamo neganai, unai ese oi ia durua, bena taunimanima edia ruma dekenai Baibel stadi oi karaia neganai, ia hegeregerena edia lalona oi veria diba bona oi hadibaia namonamo diba. Duahiduahi ia diba namonamo tadikaka ta ese paragraf ta ta ia duahidia murinai, stadi naria tauna ese henanadai ia gwauraia helai taudia idia haere totona. Stadi naria tauna ese hebou taudia iboudiai ia hagoadadia idia haere neganai, do idia hereva badabada totona. Bema nega ia noho, Baibel siri dekenai henanadai ma haida ita ia henia, unai amo ita ia durua edia anina ita diba totona. (Nehemia 8:8 itaia.) Nega ta ta ai, hereva badana do ia hedinarai goevagoeva totona, hereva kwadogina ta eiava henanadai ma haida do ia henidia. Sivarai ta eiava haheitalai herevana do ia gwauraia bena unai ese ita ia hadibaia stadi herevana ena anina iseda mauri dekenai be dahaka.

⁴ Kongregesen Buka Stadi haida dekenai taunimanima haida idia mai lasi. Pura ta ta iboudiai oi lao, a? Bema lasi, oi be heduru gauna namona oi reaia. Buka stadi be Iehova ese ita ia naria dalana ta. (1 Pet. 5:7) Ia ura iseda diba bona aonega idia bada idia lao bena unai amo lauma dalanai ita goada. To, Satana ia ura lasi lauma dalanai ita goada, ia ura ita manoka bona Iehova bona Iena orea do ita durua bada lasi. Namo lasi unai ia vara! Namona be mai edia lalokau, bona mai edia hebogahisi grup taudia ese emu lalona do idia hamarerea bona oi idia hagoadaia Iehova ena ladana oi hanamoa noho totona.​—Salamo 111:1 itaia.

⁵ Buka stadi gabu momo dekenai, haroro totona idia hebou, bona pablisa iboudiai idia mai be hekwarahi lasi. Reana pura ta ta iboudiai, dina ta, Saturday bona Sunday, eiava adorahi dinana ta ai, idia hegaegae haroro lao henia totona. Buka stadi naria tauna be ia hegaegae teritori ena bada ia hegeregere totona bona grup hakaua tauna ta ia noho totona. Haroro totona idia hebou neganai, miniti 10 ia lao 15 do ia hanaia lasi. Bema daba ena siri be mai anina haroro gaukara dekenai, grup naria tauna be ia kikilaia sisina diba, bona heduru hereva tamona eiava rua do ia gwauraia eiava haheitalai maragina amo, hua ena henia gauna do idia hahedinaraia.

⁶ Buka stadi naria tauna ia hegaegae ena grup lalonai idia noho taudia ta ta iboudiai ida idia haroro hebou totona, bona idia dekenai hagoadaia bona hadibaia hereva ia henidia.​—Mareko 3:14; Luka 8:1 itaia danu.