Kongregesen Idia Hakaua Taudia—Buka Stadi Naria Tauna
1 Elda tauna eiava hesiai tauna ta be Kongregesen Buka Stadi naria tauna ena gaukara ia karaia neganai, unai be hahenamo badana ta. Iena maduna badana be ena buka stadi dekenai idia noho taudia be lauma dalanai ia naria. Iena gaukara ena kahana be toi.
2 Hadibaia Tauna Namona: Kongregesen Buka Stadi naria tauna ese do idia stadilaia gauna ia hegaegaelaia namonamo, ia ura buka stadi dekenai idia noho taudia ia durua lalo-parara idia abia totona. Ia ura tadikaka be idia stadilaia gaudia idia laloa bada. Stadi lalonai do ia hereva momo lasi, to hereva badadia do idia hedinarai goevagoeva totona, reana henanadai namodia ma haida do ia henia. Ia hekwarahi tadikaka iboudiai be stadi do idia moalelaia, idia do ia hadibaia, bona iboudiai be haere do idia henia. Iena tahua gauna be lauma dalanai iboudiai do ia hagoadaia, stadi ena namo edia mauri lalonai do ia hahedinaraia, bona tadikaka edia lalona bona kudouna do ia hamarerea.—1 Tes. 2:13.
3 Mamoe Taudia Ia Durua: Kongregesen Buka Stadi naria tauna be ‘lai koua gabuna bona guba bada ia toa neganai, ia be hunia gabuna namona’ bamona. (Isa. 32:2) Iena buka stadi dekenai idia noho taudia ibounai ia naria bona lauma dalanai heduru ia henia bema ta ena lalona ia manoka.—Esek. 34:15, 16; 1 Tes. 2:7, 8.
4 Ia Haroro mai Ena Goada Ida: Kongregesen Buka Stadi naria tauna be mai ena momokani ida haroro negana namona do ia hegaegaelaia, ena buka stadi taudia ibounai do idia haroro goadagoada diba totona. Haroro gaukara do ia gunalaia, badina ia diba bema ia lao hanaihanai bona mai ena ura ida ia karaia, ena buka stadi taudia ese ena haheitalai namona do idia tohotohoa. (Kol. 4:17; 2 Tes. 3:9) Iena ura be idia ta ta be haroro gaukara lalonai do ia bamoa. Bema ita ura iseda haroro bona hadibaia daladia ita hanamoa, buka stadi naria tauna ese ita ia durua unai tahua gauna ita davaria totona.—1 Tim. 4:16; 2 Tim. 4:5.
5 Unai tatau, harihari gaudia taunimanima dekenai, be hahenamo badana ta ita dekenai, badina idia gini hegaegae noho lauma dalanai ita do idia durua mai edia lalokau ida. (1 Tes. 5:14) Namona be buka stadi dekenai haere ita henia hanaihanai karana amo bona haroro gaukara ita karaia mai abidadama ida karana amo ita hahedinaraia Iehova ese ia henia gauna namo hereana ta ita laloa bada.—Heb. 10:25.