Baibel Stadi Hamatamaia Dala Matamatana
1. Dahaka kahana matamatana be pablik Watchtower ai do ia noho, bona idia karaia ena badina be dahaka?
1 Inai hua amo, pablik Watchtower ai kahana matamatana ta do ia noho, unai kahana ese ita do ia durua Baibel stadi ita hamatamaia totona. Unai kahana be gabeai do idia halasia pablik Gima Kohorona ai do ia noho danu. Ena ladana be “Learn From God’s Word.” Iseda teritori ai momo ese unai kahana ta ta duahia karana do idia moalelaia, inai kahana ta ta idia karaia ena badina be ma haida ida ita herevalaia totona.
2. Inai kahana matamata ena kahana ma haida be dahaka?
2 Kahana Ma Haida: Inai kahana ena hereva kwarana badana bona maragidia be henanadai bamona idia torea, ruma tauna ida ita herevahereva neganai, unai ita gaukaralaia diba. Siri badadia be idia gwauraia sibona, to idia torea hanai lasi, unai dala amo ruma tauna be mai moale ida Dirava ena Hereva amo diba ia abia. Paragraf be idia kwadogi dainai, maoromaoro ruma tauna dekenai ita herevalaia diba. Unai kahana ta ta be Baibel Hadibaia bukana idia herevalaia, unai ese ita do ia durua unai buka amo stadi ita hamatamaia totona, bema hegeregere.
3. Ruma-ta-ruma-ta gaukara ita karaia neganai, edena dala ai magasin ena kahana matamatana amo Baibel stadi ita hamatamaia diba?
3 Gaukaralaia Dalana: Magasin oi hariharilaia neganai, reana magasin ese ia herevalaia gauna dekenai lalona veria henanadai ta oi henia diba. Hegeregere, January 1 ena magasin ese Baibel ena namo ia herevalaia. Reana oi henanadai: “Oi laloa Baibel be Dirava ena Hereva o buka namona ta sibona? [Haere naria.] Lau ura oi dekenai mai anina bada herevana ta lau gwauraia.” Henanadai ginigunana oi hahedinaraia, paragraf ginigunana oi duahia, bona idia gwauraia siri oi duahia. Henanadai oi duahia lou, bona ruma tauna oi nanadaia ena lalohadai ia gwauraia totona. Bema ia hegeregere, ruma tauna ida idia makaia henanadai ma haida oi herevalaia diba. Ruma tauna oi do rakatania lasi neganai, ia dekenai henanadai ma ta oi henia bona dala oi karaia oi lou henia bona unai oi herevalaia totona. Namona be wiki ta ta ai, ia oi lou henia bona kahana ma haida oi herevalaia ela bona magasin matamatana ia abia. Dala ma ta be maoromaoro Baibel stadi hamatamaia dalana oi gaukaralaia bona ruma tauna dekenai Baibel stadi oi herevalaia toho. Bena magasin ena kahana matamatana amo stadi karaia dalana oi hahedinaraia.
4. Lou henia ita karaia neganai, edena bamona inai kahana matamatana ita gaukaralaia diba?
4 Magasin rut bona lou henia oi karaia neganai, inai kahana matamatana oi gaukaralaia diba. Reana oi gwau diba: “Inai Watchtower magasin ai kahana matamatana ta ia noho. Mani oi dekenai lau hahedinaraia edena bamona oi gaukaralaia.” Emai guriguri be, inai kahana matamatana ese taunimanima momo do ia durua “hereva momokani do idia diba.”—1 Tim. 2:4.