Anina Ia Havaraia Gaukarana

Hebouhebou ia kahirakahira neganai, wiki toi idia do noho lalonai, kongrigeisen taudia be edia teritori ai kamonai taudia do idia boiria lou hebouhebou idia mai totona. Lagani ta ta ai, unai gaukara ita karaia ena badina namona ia noho. Nega momo iseda invateisen pepana idia abia dae bona hebouhebou idia mai taudia be tok idauidau, dipatmen idauidau idia durua volantia taudia edia gaukara namona, bona eda kara namodia bona lalotamona karana dainai, idia hoa. (Sal. 110:3; 133:1; Isa. 65:13, 14) Anina be, taunimanima be invateisen pepana idia abia dae bena hebouhebou idia mai, a? Daudau gabudiai idia noho kamonai taudia be hebouhebou idia mai danu, a?

Lagani 2011 distrik hebouhebou murinai, hahine ta be brens ofesi ta dekenai revareva ta ia siaia​—⁠ia be ena iduara badinai iseda invateisen pepana ia davaria. Iehova ena Witnes taudia be iena iduara ai idia pidipidi neganai, ia be nega momo ia komu. Ia gwau: “Lau be ruma namona ai lau noho, tau namona lau adavaia, bona lau laloa gau momo idia noho dainai, lau moale. To, lau moale lasi, bona egu mauri be anina lasi. Unai dainai, egu motuka amo kilomita 320 lau heau, Saturday ena distrik hebouhebou lau lao.” Ia be hebouhebou ia moalelaia bada dainai, ena adavana ia rini henia, ia hamaoroa ia be hebouhebou idia karaia gabunai do ia mahuta, badina ia ura Sunday ena program ia kamonai danu. “Tok idauidau lau kamonai bona Iehova ena Witnes taudia momo lau hedavari henia dainai, lau ura lau noho ela bona hebouhebou ia ore.” Ruma dekenai ia giroa neganai, Baibel stadi ia abia dae bona hua foa murinai bapatiso lasi pablisa ai ia lao. “Lau moale bada badina egu iduara badinai emui invateisen pepana lau davaria, bona hari egu mauri be mai anina!”

Invateisen pepana idia abia taudia haida be hebouhebou do idia mai. Unai dainai, inai gaukara badana ita durua be namo. Pepa oredia be hebouhebou dekenai oi abia lao, unai amo nega bona gabu idauidau ai oi hariharilaia diba.

[Box on page 5]

Invateisen Pepana Hariharilaia Dalana

Eda teritori ibounai dekenai pepapepa ita hariharilaia totona, eda hereva ia kwadogi be namo. Reana ita gwau: “Namo. Tanobada ibounai dekenai, Iehova ena Witnes taudia be inai invateisen pepana idia hariharilaia. Inai be oiemu. Hereva ma haida be inai pepa ai idia noho.” Inai gaukara ita moalelaia. Wikeni ai, unai pepa be magasin ida ita hariharilaia diba.