Haroro Grup Ena Hebou ese Namo Ia Havaraia
1. Dahaka dainai haroro grup ena hebou ita karaia?
1 Nega ta Iesu be ena hahediba taudia 70 ida ia hebou, unai murinai haroro totona ia siaidia. (Luka 10:1-11) Iesu ese idia ia hagoadaia idia be sibona idia noho lasi, to “gogoa gaukara ena Biaguna,” Iehova be idia do ia durua. Danu, haroro gaukara idia karaia namonamo totona, hadibaia hereva ia henidia bena “rua rua” ia siaidia. Unai hegeregerena, hari haroro grup ena hebou ese ita ia hagoadaia, durua bona hahegaegaea.
2. Haroro grup ena hebou be miniti hida lalonai do idia karaia?
2 Hari, haroro grup ena hebou be miniti 10 ia lao 15 lalonai idia karaia, anina be grup idia haria, teritori idia makaia bona guriguri idia gwauraia. To unai do ia idau. April ia matamaia neganai, haroro grup ena hebou be miniti 5 ia lao 7 lalonai do idia karaia. To, bema kongrigeisen heboudia murinai do idia karaia, vadaeni idia hakwadogia be namo, badina momo be Baibel ena hereva namodia idia kamonai vadaeni. Haroro grup ena hebou ia kwadogi neganai, nega bada ia noho ibounai idia haroro totona. Danu, bema painia o pablisa haida be haroro grup ena hebou ia do matamaia lasi lalonai idia haroro, vadaeni edia haroro idia hadokoa sisina bona unai hebou idia lao.
3. Edena dala ai grup naria tauna ese haroro grup ena hebou do ia hegaegaelaia, unai amo pablisa ia durua?
3 Grup naria tauna ese haroro grup ena hebou do ia hegaegaelaia, unai amo pablisa ia durua diba. Kongrigeisen momo ai grup ta ta ese edia haroro hebouna idia karaia be mai ena namo. Unai amo pablisa be haroro grup ena hebou bona teritori idia lao haraga diba. Danu, grup naria taudia ese pablisa do idia haria haraga, bona do ia auka lasi edia grup idia naria totona. Elda oreana ese pablisa edia noho dalana idia laloa danu be namo. Haroro hebouna be guriguri amo idia do koua lasi neganai, namona be ibounai idia diba edeseni do idia haroro bona daika ida do idia gaukara.
4. Dahaka dainai haroro grup ena hebou be mai anina bada?
4 Haroro Grup Ena Hebouna be mai Anina Bada: Haroro grup ena hebou be idia haroro taudia durua totona idia karaia, bona reana kongrigeisen taudia haida sibona be unai hebou lalonai do idia vareai. To, haroro grup ena hebou be mai anina bada. Iseda kongrigeisen heboudia bamona, haroro grup ena hebou be Iehova ena harihari gauna ta, ita ia durua ita lalokau heheni bona kara namodia ita karaia totona. (Heb. 10:24, 25) Unai dainai, grup naria tauna ia hegaegae namonamo, unai amo ia herevalaia gaudia ese Iehova do ia hanamoa bona ibounai ese namo do idia abia. Bema hegeregere, do idia haroro pablisa ibounai ese haroro hebouna idia reaia lasi be namo.
Haroro grup heboudia be mai anina bada bona ia be kongrigeisen heboudia bamona ita laloa
5. (a)Haroro naria tauna ese haroro hebouna ia hegaegaelaia neganai dahaka ia karaia be namo? (b)Taihu ese haroro hebouna be edena dala ai ia hakaua diba?
5 Grup Naria Tauna Ia Hegaegae: Bema ta be tok ta do ia henia, namona be asainmen ia abia guna, unai amo ia hegaegae namonamo diba. Haroro grup ena hebou totona unai bamona ita karaia be namo. Momokani, grup ta ta be haroro totona idia hebou neganai, grup naria tadikaka o ena durua tauna ese hebou ia hakaua. To, grup ibounai idia hebou neganai, haroro naria tauna ese ta ia abia hidi diba unai hebou ia hakaua totona. Haroro naria taudia haida be grup naria tadikaka ibounai dekenai sediual idia henia bona kopi ta be notisbod dekenai idia atoa. Haroro naria tauna be grup naria tadikaka ta ia abia hidi neganai, namona be ia laloatao, unai tadikaka be hadibaia tauna namona bona hegaegae karana ia diba. Nega haida bema elda, hesiai taudia o ia hegeregere bapatiso tadikaka ma ta ia noho lasi, vadaeni haroro naria tauna ese bapatiso taihu ta ia abia hidi diba.—Inai kahana ladana, “Bema Taihu ese Haroro Grup Ena Hebou Ia Naria” itaia.
6. Dahaka dainai grup naria tauna ia hegaegae namonamo be gau badana?
6 Tiokratik Haroro Sikuli o Hesiai Hebou ai kahana ta ita abia neganai, ita laloa bada bona hegaegaelaia namonamo. Ita haida be Kingdom Hall ita lao lalonai, do ita herevalaia gaudia ita lalohadailaia. Haroro grup hakaua totona unai bamona ita karaia danu be namo. Hari haroro grup hebouna ia kwadogi dainai, hegaegae namonamo karana be mai anina bada, unai amo hebou be nega korikori ai do ia ore. Danu, hegaegae namonamo karana ta be, teritori oi diba guna be namo.
7. Grup naria tauna ese dahaka gaudia ia herevalaia diba?
7 Do Oi Herevalaia Gaudia: Teritori ta ta ai, taunimanima edia noho daladia be idauidau dainai, igui hesiai tauna mai ena kamonai ese haroro hebou ta ta totona autlain ia hegaegaelaia lasi. Maua ladana, “Haroro Grup Hebouna ai Do Oi Laloa Gaudia,” ese dala haida ia herevalaia. Haroro grup ena hebou be henanadai bona haere dalanai do idia karaia. Nega haida haheitalai haida karaia eiava jw.org ai idia noho vidio ta hahedinaraia. Grup naria tauna be haroro hebouna totona ia hegaegae neganai, namona be pablisa do ia hagoadaia bona durua gaudia ia laloa.
Grup naria tadikaka be haroro grup ena hebou totona ia hegaegae neganai, namona be haroro gaukara totona idia lao pablisa do ia hagoadaia herevadia ia laloa
8. Saturday bona Sunday ena haroro grup hebouna ai, dahaka gaudia ita herevalaia diba?
8 Hegeregere Saturday ai, pablisa momo be The Watchtower bona Awake! idia hariharilaia. Saturday ai, idia haroro taudia momo be wiki ai idia haroro lasi, unai dainai reana edia Ruma Bese Tomadiho lalonai idia tohoa haroro herevadia idia laloatao be auka. Unai dainai, grup naria tauna ese Iseda Basileia Gaukara pepana ena murina kahanai idia noho haroro herevadia ia riviulaia diba. Ia herevalaia gaudia ma haida be inai: Edena dala ai nius, o holidei ta idia herevalaia murinai magasin idia hariharilaia, eiava edena dala ai magasin ia abia tauna dekenai lou henia do idia karaia. Bema pablisa haida be unai magasin idia hariharilaia vadaeni, haroro hebouna ai, grup naria tauna ese idia ia noia magasin hariharilaia dalana o ekspiriens idia gwauraia. Sunday ai, grup naria tauna ese hua ena henia gauna ia herevalaia neganai, reana unai dala ia badinaia diba. Stadi pablikeisen hegeregere, Sivarai Namona bona Dirava Oi Kamonai Henia buklet bona Baibel Hadibaia buka idia hariharilaia diba, reana grup naria tauna ese unai pablikeisen hariharilaia dalana do ia herevalaia sisina.
9. Bema kongrigeisen ese wikeni ai spesel kempein do idia karaia, dahaka idia herevalaia diba?
9 Bema kongrigeisen ese wikeni ai spesel kempein do idia karaia, grup naria tauna ese magasin matamata be invateisen o pepapepa ida hariharilaia dalana ia herevalaia, eiava kamonai tauna hereva henia dalana ia herevalaia diba. Dala ta be unai bamona kempein gaukara ai idia vara ekspiriens herevalaia.
10, 11. Haroro hebouna ia heau namonamo totona, dahaka dainai pablisa idia hegaegae namonamo be namo?
10 Pablisa Idia Hegaegae Dalana: Pablisa ese haroro grup ena hebou idia durua diba bona unai ese namo ia havaraia. Reana ruma bese ena tomadiho ai haroro totona idia hegaegae diba, unai amo pablisa ma haida idia durua diba. Hegaegae namonamo karana anina be, haroro grup ita do lao lasi neganai, buka o magasin ita abia hegaegae guna, unai amo nega ita haorea kava lasi bona teritori ita lao haraga diba.
11 Haroro grup ena hebou ia do matamaia lasi lalonai ita ginidae haraga be gau badana. Momokani, ita ibounai ita hekwarahi kongrigeisen heboudia ibounai totona ita ginidae haraga, ani? To, haroro hebouna totona ita leiti neganai, unai ese pablisa edia kamonai karana ia hadikaia diba. Edena dala ai? Grup naria tauna ese haroro hebouna ia hakaua neganai, gau haida ia laloa guna bena grup ia haria. Bema pablisa be momo lasi, reana idia haorea lasi teritori ai idia haroro diba. Bema haroro teritori be daudau bona pablisa haida be do idia raka, vadaeni grup naria tauna ese unai pablisa be mai edia motuka taudia ida do ia atoa hebou. Bema teritori be raskol momo gabuna, ia ese tadikaka haida do ia abia hidi taihu idia bamoa totona. Idia gorere o buruka pablisa be gabu palakadia ai, o vadavada momo lasi rumadia ai idia haroro diba. Pablisa matamatadia be ekspiriens pablisa ida idia gaukara hebou diba. To, bema pablisa idia leiti, vadaeni grup naria tauna ese grup do ia haria lou eiava senisi ma haida do ia karaia. Oibe, nega haida badina haida dainai do ita ginidae haraga lasi. To, bema nega momo ita leiti, reana sibona ita nanadaia: Haroro hebouna lau laloa bada lasi, a? Eiava do lau karaia gaudia lau palanilaia namonamo lasi, a?
12. Bema haroro totona sibona emu palani oi karaia dahaka oi laloa be namo?
12 Haroro grup ena hebou ia do matamaia lasi neganai, pablisa ese ena bamoa tauna ia abia hidi diba, o grup naria tauna ese abia hidi ia karaia diba. Bema oi sibona ese abia hidi oi karaia vadaeni, namo lasi emu turadia sibona ida oi gaukara hebou, to “lalokau” karana be pablisa idauidau ida oi gaukara hebou. (2 Kor. 6:11-13) Nega ta ta pablisa matamata ida oi gaukara hebou bona ia oi durua ena hadibaia karana ia hanamoa totona, a? (1 Kor. 10:24; 1 Tim. 4:13, 15) Grup naria tauna ena hadibaia herevadia bona haroro do ita hamatamaia gabuna ita kamonaia namonamo be namo. Haroro hebouna ia ore neganai, namo lasi hakaua tauna ese ia karaia palani ita haidaua.
13. Bema ita ibounai ese eda kahana ita karaia namonamo, edena dala ai haroro heboudia ese ita ia durua diba?
13 Iesu ese ia siaia hahediba taudia 70 be haroro murinai, “mai moale ida idia giroa.” (Luka 10:17) Momokani, Iesu be haroro totona idia ida ia hebou karana ese anina namona ia havaraia. Hari, unai bamona haroro heboudia ese anina namona ia havaraia danu. Bema ita ibounai ese eda kahana ita karaia namonamo, vadaeni haroro heboudia ese ita do ia hagoadaia, durua bona hahegaegaea eda haroro gaukara ita karaia namonamo bona sivarai namona be “bese ibounai ese idia kamonaia diba.”—Mat. 24:14..