Edena Nega be Nega Maorona Oi Hereva Totona?

1. Hadibaia Tauna 3:1, 7 ena hereva amo dahaka ita dibaia?

ITA HAIDA be hereva momo taudia. Ma haida be idia hereva momo lasi. Inai atikol ena siri badana ese ia hahedinaraia bamona, herevahereva be mai ena nega bona regerege lasi be mai ena nega. (Hadibaia Tauna 3:1, 7 duahia.) To, ita ura iseda tadikaka bona taihu ese hereva haida idia gwauraia be namo. Bona reana ita ura idia haida idia hereva momo lasi.

2. Daika be mai ena maoro edena negai bona edena dala ai do ita hereva karana ai hakaua herevadia ia henia totona?

² Herevahereva karana be Iehova ena harihari gauna ta. (Eso. 4:10, 11; Apok. 4:11) Baibel amo ita ia durua, unai harihari gauna ita gaukaralaia namonamo dalana ita dibaia totona. Inai atikol ai, Baibel lalonai idia noho haheitalai haida do ita herevalaia, unai ese ita do ia durua edena negai ita hereva bona edena negai ita hereva lasi totona. Danu Iehova ese ma haida dekenai ita gwauraia herevadia ia laloa dalana do ita herevalaia. Ginigunana, edena negai ita hereva be namo mani ita herevalaia.

EDENA NEGAI ITA HEREVA BE NAMO?

3. Roma 10:14 ena hereva bamona, edena negai do ita hereva be namo?

³ Namona be hanaihanai ita noho hegaegae Iehova bona ena Basileia ita herevalaia totona. (Mat. 24:14; Roma 10:14 duahia.) Bema unai bamona ita karaia, ita be Iesu ita tohotohoa. Iesu be tanobada dekenai ia mai ena badina ta be ma haida dekenai ena Tamana ia herevalaia totona. (Ioa. 18:37) To namona be ita laloatao iseda hereva dalana be mai anina bada. Unai dainai ma haida dekenai Iehova ita herevalaia neganai, namona be “mai manau bona hemataurai bada ida” ita hereva, bona ma ta ena hemami bona ia abia dae gaudia ita laloa danu. (1 Pet. 3:15) Bena do ita hereva sibona lasi, to ta ita hadibaia diba bona ena lalona do ita veria.

4. Aonega Herevadia 9:9 ena hereva bamona, edena dala ai iseda hereva ese ma haida ia durua diba?

⁴ Bema elda taudia idia itaia tadikaka eiava taihu ta be dala kererena ia badinaia, sisiba idia henia be namo. To, namona be nega maorona idia abia hidi idia hereva totona, unai amo ta ena hemami idia hadikaia lasi. Namona be ma haida idia noho lasi neganai unai idia karaia. Bona elda taudia be ta idia hereva henia neganai, hanaihanai hemataurai karana idia hahedinaraia be namo. To danu, idia ese Baibel ena hakaua herevadia amo ma haida idia durua diba dala maorona idia badinaia totona. (Aonega Herevadia 9:9) Ma haida be dala kererena idia badinaia neganai, dahaka dainai mai gari lasi ida ita hereva be namo? Mani inai haheitalai rua oi laloa; Haheitalai ta lalonai, tau ta be ena natudia memero do ia sisiba henia, bona haheitalai ma ta ai, hahine ta be vaira negai king ai do ia lao tauna ta ia hereva henia.

5. Edena dala ai Hahelaga Tauna Badana Eli be dala maorona ai ena natudia ia hereva henia lasi?

⁵ Hahelaga Tauna Badana Eli be mai ena natuna memero rua bona idia ia lalokau henia bada. To, unai natudia memero ese Iehova idia matauraia lasi. Idia be dubu helaga ai hahelaga taudia edia gaukara idia karaia, bona unai be mai anina bada. To, idia ese edia siahu idia gaukaralaia kerere, Iehova totona idia henia boubou gaudia idia matauraia lasi, bona mai ura ida matabodaga karadia idia karaia. (1 Sam. 2:12-17, 22) Mose ena Taravatu hegeregerena, Eli ena natudia be edia kara dainai idia hamasedia be namo, to Eli ese ena natudia ia sisiba henidia sibona bona idia ia koua lasi dubu helaga ai idia gaukara noho totona. (Deu. 21:18-21) Iehova ese Eli ena kara be edena bamona ia laloa? Ia ese Eli ia hamaoroa, ia gwau: “Badina dahaka oi ese oiemu natuna oi matauraia bada, to lau oi matauraia maragi?” Iehova be ena lalona ia hadaia unai tau dikadia rua ia hamasea totona.​—1 Sam. 2:29, 34.

6. Eli amo dahaka ita dibaia?

⁶ Eli amo mai anina bada gauna ta ita dibaia. Bema ita itaia iseda turana ta eiava varavara ta be Dirava ena taravatu ia utua, namona be ita hereva henia Iehova ena taravatu ia laloa bada totona. Bona ita durua Iehova ese ia abia hidi elda taudia amo heduru ia abia. (Iam. 5:14) Namo lasi Eli ita tohotohoa, iseda turana eiava varavara ita matauraia bada, to Iehova ita matauraia lasi. Nega haida ia auka mai gari lasi ida kerere tauna ta ita durua totona, to unai bamona ita karaia neganai anina namona ia havaraia diba. Eli ena haheitalai bona Israela hahinena Abigaila edia haheitalai ena idau mani ita herevalaia.

7. Dahaka dainai Abigaila ese Davida ia hereva henia?

⁷ Abigaila be tano biaguna bona taga tauna Nabala ena adavana. Davida bona ena tuari taudia be King Saulo amo idia heau neganai, Nabala ena mamoe naria taudia ida idia noho bona Nabala ena mamoe idia naria henaohenao taudia ese idia abia lasi totona. Nabala be edia heduru dainai ia moale, a? Lasi. Davida bona ena tuari taudia be Nabala dekenai aniani sisina bona ranu idia noia neganai, Nabala ia badu dikadika bona mai boiboi ida idia ia gwauraia dika. (1 Sam. 25:5-8, 10-12, 14) Unai kara dainai Davida be lalona ia hadaia Nabala bona ena ruma taudia ibounai do ia hamasea totona. (1 Sam. 25:13, 22) Edena dala ai unai dika badana idia hanaia? Abigaila ia laloparara ia hereva be namo, unai dainai ia be mai gari lasi ida ia lao, idia hitolo bona idia badu tuari taudia 400 bona Davida ia hereva henia totona.

8. Abigaila ena haheitalai amo dahaka ita dibaia?

⁸ Abigaila be Davida ia hedavari henia neganai, ia gari lasi bona mai hemataurai ida bona lalona veria dalanai ia hereva. Ena be ia vara hekwakwanai be Abigaila ese ia karaia lasi, to ia ese Davida dekenai sori herevana ia gwauraia. Abigaila be Davida ena kara namodia ia diba bona Iehova ena heduru dekenai ia tabekau. (1 Sam. 25:24, 26, 28, 33, 34) Abigaila bamona, bema ita itaia ta be dala kererena ia badinaia noho, namona be mai gari lasi ida ia ita hereva henia. (Sal. 141:5) Namona be mai hemataurai ida ita hereva bona ita gari lasi. Bema ta be dala kererena ia badinaia bona mai lalokau ida ita sisiba henia, ita hahedinaraia ita be tura korikorina.​—Aon. 27:17.

9-10. Elda taudia ese ma haida idia sisiba henia neganai dahaka idia laloatao be namo?

⁹ Elda taudia ese mai gari lasi ida kongrigeisen lalonai dala kererena idia badinaia taudia idia sisiba henia be namo. (Gal. 6:1) Elda taudia idia laloparara idia danu be goevadae lasi taudia bona nega ta sisiba idia abia diba. To, unai ese elda taudia ia koua lasi ma haida idia sisiba henia totona. (2 Tim. 4:2; Tito 1:9) Elda taudia ese ta idia sisiba henia neganai, idia ese mai aonega bona manau ida idia hereva henia. Momokani, idia ese edia tadikaka taihu idia lalokau henia bona unai lalokau ese idia ia durua kara ta idia karaia totona. (Aon. 13:24) To, idia ese Iehova matauraia karana idia laloa bada, unai dainai iena taravatu idia badinaia bona kongrigeisen taudia idia gimaia.​—⁠Kara 20:28.

¹⁰ Paragraf matamana amo ita be edena negai do ita hereva karana ita herevalaia. To, nega ma haida ai hereva ta ita gwauraia lasi be namo. Unai bamona negadia ai dahaka hekwakwanai idia vara diba?

EDENA NEGAI ITA HEREVA LASI BE NAMO?

11. Iamesi be dahaka haheitalai ia gaukaralaia bona dahaka dainai ia be mai anina bada?

¹¹ Momokani, nega haida ia auka iseda hereva dalana ita biagua totona. Baibel torea tauna Iamesi be haheitalai ta amo unai ia hahedinaraia. Ia gwau: “Bema ta be ena hereva dekenai ia kerere lasi, ia be goevadae tauna, bona ia hegeregere ena tauanina ibounai ia biagua totona.” (Iam. 3:2, 3) Auri ta bridle, be hosi ena kwarana ataiai bona sisina be ena uduna lalonai idia atoa. Hosi guia tauna be hosi dekenai idia kwatua varo ia veria neganai, hosi ia heau eiava ia stop diba. Bema hosi guia tauna be varo ia dogoatao auka lasi, hosi ia dagedage diba, sibona ia haberoa bona guia tauna ia haberoa danu. Unai hegeregerena, bema iseda hereva dalana ita biagua lasi, dika bada ia havaraia diba. Edena bamona negadiai iseda hereva dalana ita biagua karana mani ita herevalaia.

12. Edena bamona negadia ai iseda hereva dalana ita biagua be namo?

¹² Edena bamona do oi kara bema oi kamonai tadikaka eiava taihu ta be hehuni o confidential herevana ta ia diba? Hegeregere, bema iseda gaukara idia taravatua tanona amo ia mai tauna ta oi hedavari henia, do oi nanadaia unai tano ai iseda gaukara idia karaia daladia ia herevalaia totona, a? Momokani, badina maorona dainai do oi henanadai. Iseda tadikaka taihu ita lalokau henidia bona ita ura idia dekenai idia vara gaudia ita diba. Danu, iseda guriguri lalonai idia ita laloa be namo. To, unai bamona negadia ai iseda hereva dalana ita biagua be namo. Bema ta ita doria confidential herevana ta ia gwauraia, anina be unai tauna bona ia idia abidadama henia dainai edia gaukara ena sivarai idia hadibaia tadikaka taihu ita lalokau henidia lasi. Momokani, ita ura lasi iseda gaukara idia taravatua tanodia ai idia noho tadikaka taihu dekenai hekwakwanai ma haida ita henia. Unai hegeregerena, unai bamona tano dekenai ia noho tadikaka eiava taihu ese Witnes taudia edia hesiai gaukara eiava Keristani gaukara ma haida do ia herevalaia lasi.

13. Aonega Herevadia 11:13 ena hereva bamona, elda taudia ese dahaka idia karaia be namo, bona dahaka dainai?

¹³ Namona be elda taudia ese Baibel ena hakaua herevana Aonega Herevadia 11:13 ai idia badinaia, bona confidential gaudia idia herevalaia lasi. (Duahia.) Nega haida unai be auka, bema elda tauna be mai ena adavana. Headava taudia be edia hetura karana idia hagoadaia totona, nega momo idia herevahereva, edia lalohadai, hemami, bona lalohekwarahi gaudia idia herevalaia. To namona be elda tauna ia laloparara, kongrigeisen taudia edia confidential eiava “hunia herevadia” ia gwauraia lasi. Bema ia gwauraia hedinarai, tadikaka taihu ese ia do idia abidadama henia lasi bona ena ladana namona ia hadikaia diba. Kongrigeisen ai maduna idia abia taudia “idia koikoi lasi” be namo. (1 Tim. 3:8) Unai ena anina be edia hereva amo ma haida idia koia lasi eiava idia maumau lasi. Bema elda tauna be ena hahine ia lalokau henia, ia dekenai hunia herevadia do ia gwauraia lasi.

14. Edena dala ai elda tauna be ena hahine ese ia durua diba?

¹⁴ Hahine ese ena adavana ia durua diba bema ia doria lasi hunia herevadia ia gwauraia totona. Hahine ese unai sisiba ia badinaia neganai, ia ese ena tau ia durua sibona lasi, to ena tau dekenai hunia hereva idia gwauraia taudia ia matauraia danu. Bona mai anina bada gauna be hahine ese Iehova ia hamoalea, badina ia ese kongrigeisen ai maino bona lalotamona ia havaraia noho.​—⁠Roma 14:19.

IEHOVA ESE ITA GWAURAIA HEREVADIA BE EDENA BAMONA IA LALOA?

15. Iehova ese Iobu ena turana toi be edena bamona ia laloa, bona dahaka dainai?

¹⁵ Baibel bukana Iobu ese ita do ia durua, edena dala ai bona edena negai ita hereva totona. Iobu be hahetoho badadia momo ia davaria murinai, tatau foa idia mai ia idia hagoadaia bona idia sisiba henia totona. Unai tatau be ia dekenai hereva ta idia gwauraia lasi. To, idia toi​—⁠Elipasa, Biledada, bona Sopara​—⁠be gabeai idia gwauraia herevadia ese ia hahedinaraia, idia be Iobu durua daladia idia lalohadailaia lasi. To, edia hereva amo idia hahedinaraia Iobu be kerere ta ia karaia. Idia gwauraia hereva haida be reana idia maoro, to Iobu bona Iehova totona idia gwauraia hereva momo be namo lasi bona koikoi. Idia ese Iobu idia gwauraia dika. (Iobu 32:1-3) Iehova be dahaka ia karaia? Ia ese unai tatau toi ia badu henia. Idia ia gwauraia kavakava taudia bona ia hadibadia Iobu idia noia idia totona do ia guriguri.​—Iobu 42:7-9.

16. Elipasa, Biledada, bona Sopara edia haheitalai dikadia amo dahaka ita dibaia?

¹⁶ Elipasa, Biledada, bona Sopara edia haheitalai dikadia amo gau momo ita dibaia. Ginigunana, iseda tadikaka taihu ita hahemaoro henidia lasi. (Mat. 7:1-5) To, namona be edia hereva ita kamonai namonamo gabeai ita hereva. Unai dala amo edia hekwakwanai do ita lalopararalaia. (1 Pet. 3:8) Iharuana, bema ita ura hereva ta ita gwauraia, namona be hereva namodia bona maorodia ita gwauraia. (Efe. 4:25) Bona ihatoina, Iehova be ma haida dekenai ita gwauraia gaudia ia laloa bada.

17. Elihu ena haheitalai amo dahaka ita dibaia?

¹⁷ Iobu ia vadivadi henia tauna namba foa be Elihu, bona ia be Aberahamo ena varavara. Iobu bona ena turadia toi idia herevahereva neganai, Elihu be ia kamonai noho. Ia hahedinaraia, Elihu be edia hereva ia kamonai namonamo dainai mai gado namo bona momokani ida Iobu ena lalohadai hamaoromaoroa totona sisiba maorona ia henia. (Iobu 33:1, 6, 17) Elihu ena ura badana be Iehova ena ladana do ia abia isi, to ia sibona eiava taunimanima ta lasi. (Iobu 32:21, 22; 37:23, 24) Elihu ena haheitalai amo ita diba, herevahereva lasi bona kamonai karana be mai ena nega. (Iam. 1:19) Danu, ita dibaia gauna ma ta be, sisiba ita henia neganai iseda ura badana be Iehova ena ladana ita abia isi, to ita sibona lasi.

18. Edena dala ai ita hahedinaraia hereva karana ita laloa bada?

¹⁸ Edena negai bona edena dala ai ita hereva karana dekenai Baibel ena hakaua herevana ita badinaia neganai, ita hahedinaraia hereva karana ita laloa bada. Aonega tauna King Solomona ia gwau: “Hereva maorona gwauraia namonamo karana, be golo herahera siliva bosea latanai bamona.” (Aon. 25:11) Bema haida edia hereva ita kamonai namonamo bona do ita gwauraia herevadia ita laloa namonamo guna, iseda hereva be golo herahera bamona​—⁠dava bada gaudia bona mai edia hairai. Bena, ena be hereva momo ita gwauraia eiava lasi, ita gwauraia herevadia ese ma haida do ia hagoadaia, bona Iehova ena lalonamo do ita abia. (Aon. 23:15; Efe. 4:29) Unai dala hereadaena amo Dirava amo ia mai harihari gauna dainai iseda tanikiu karana ita hahedinaraia diba!