Heduru Haida Hanaihanai Emu Stadi Oi Karaia Totona
HANAIHANAI Baibel oi stadilaia be auka bona oi moalelaia lasi, a? Ita ibounai be nega haida unai ita mamia. To mani hanaihanai ita karaia gaudia haida ita laloa, hegeregere digu karana. Oi digu totona nega bona goada oi henia, to oi digu murinai emu hemami ia namo! Baibel stadilaia karana ese iseda hemami ia hanamoa danu. (Efe. 5:26) Mani heduru haida ita laloa:
Sediual ta karaia. Baibel stadilaia karana be “mai anina bada gaudia” ta, bona Keristani taudia ese unai idia karaia be namo. (Fili. 1:10) Emu stadi negana oi badinaia totona, pepa dekenai stadi ena dina bona taim oi torea, bena oi itaia diba gabuna dekenai oi atoa. Eiava heduru gauna ta be emu stadi negana be ia kahirakahira neganai, emu fon ai stadi alam oi atoa.
Emu stadi negana oi haidaua diba. Oi stadilaia gaudia oi lalopararalaia totona, emu stadi negana oi halataia eiava hakwadogia, a? Oi be emu noho dalana oi diba namonamo. Unai hegeregerena, emu stadi negana oi haidaua diba. Bema emu stadi negana ia ginidae, to stadi urana ia noho lasi, mani miniti 10 sibona lalonai oi stadi toho. Unai nega kwadogina lalonai gau momo do oi dibaia. Bona reana miniti 10 oi stadi murinai, oi stadilaia gaudia oi moalelaia dainai, do oi ura emu stadi negana oi halataia sisina.—Fili. 2:13.
Nega bada lalonai do oi stadilaia topik oi abia hidi. Bema emu stadi negana ai oi laloa noho dahaka do oi stadilaia, reana emu nega do oi haorea kava. (Efe. 5:16) Oi ura stadilaia point haida edia lista ta oi karaia. Hegeregere, gau ta oi lalopararalaia namonamo lasi, oi torea bona lista ta oi karaia. Bona emu stadi ena dokonai, reana oi laloa gaudia ma haida be lista ai oi torea.
Senisi oi karaia diba. Unai oi karaia totona, bema hegeregere emu stadi negana bona taim, stadi negana ena lata, eiava oi abia hidi topik oi haidaua. Mai anina bada gauna be wiki ta ta ai emu stadi oi karaia.
Bema wiki ta ta ai ita stadi, gau namodia do idia vara. Iehova kahirakahira ita lao, mai aonega ida do ita kara, bona goada do ita abia.—Ios. 1:8.