Ita be Sibona Ita Noho Lasi

1-2. (a) Hekwakwanai ita davaria neganai, dahaka dainai ita gwau lasi ita be sibona ita noho? (b) Inai atikol ai dahaka do ita herevalaia?

ITA BE hekwakwanai badadia ita davaria neganai, unai be hegeregere uda badana ta lalonai sibona ita noho bona dala ita davaria diba lasi bamona. To unai hekwakwanai badadia lalonai, heduru ita abia diba. Iseda lalokau guba Tamana be iseda hekwakwanai ia itaia sibona lasi, to ia gwauhamata ita do ia durua. Iehova be mai lalokau ida ena kamonai hesiai taudia ia hamaoroa: “Oi do lau durua.”—Isa. 41:10.

² Inai atikol ai, Iehova ese (1) ita ia hakaua dalana, (2) iseda dabu gaudia ia henia dalana, (3) ita ia gimaia dalana, bona (4) ita ia hagoadaia dalana do ita herevalaia. Iehova ese ita ia hadibaia, ena be dahaka hekwakwanai do ita davaria, to ia ese ita do ia laloaboio lasi. Ia be ita do ia rakatania lasi. Unai dainai ita be sibona ita noho lasi.

IEHOVA ESE ITA IA HAKAUA

3-4. Edena dala ai Iehova ese ita ia hakaua? (Salamo 48:14)

³ Salamo 48:14 duahia. Iehova ia diba ita be sibona ita hakaua diba lasi. Hari, edena dala ai Iehova be ia idia tomadiho henia taudia ia hakaua? Idia ia hakaua dalana ta be Baibel ena hereva amo. (Sal. 119:105) Iehova be ena hereva Baibel amo ita ia durua, abia hidi namodia bona kara namodia ita karaia totona, unai amo hari iseda mauri ita moalelaia diba, bona vaira nega ai mauri hanaihanai do ita abia.a Hegeregere, ita ia hadibaia ma haida edia dika ita gwauatao, do ita badu noho lasi, gau ibounai lalonai ita kara momokani bona mai kudouna ibounai ida ma haida do ita lalokau henia. (Sal. 37:8; Heb. 13:18; 1 Pet. 1:22) Unai bamona kara namodia ita hahedinaraia neganai, ita be tama eiava sina namona, adavana namona, bona tura namona ai ita lao diba.

⁴ Baibel ai Iehova ese taunimanima haida edia sivarai ia atoa, bona idia davaria hekwakwanai be iseda hegeregerena danu. (1 Kor. 10:13; Iam. 5:17) Unai sivarai ita duahia bona ita dibaia gaudia ita badinaia neganai, dala rua ai namo do ita davaria. Ginigunana be, ita laloparara ita davaria hekwakwanai be ma haida ese idia davaria danu, bona Iehova ena heduru dainai idia haheauka. (1 Pet. 5:9) Bona iharuana be, iseda hekwakwanai haheaukalaia dalana ita diba.—Roma 15:4.

5. Iehova ese daidia ia gaukaralaia mauri dalana ai ita idia hakaua totona?

⁵ Danu Iehova ese tadikaka taihu ia gaukaralaia ita idia hakaua totona.b Hegeregere, sekit naria taudia be hanaihanai kongrigeisen idia vadivadi henia ita idia hagoadaia totona. Edia tok ese iseda abidadama ia hagoadaia bona ita idia durua lalotamona ai ita noho totona. (Kara 15:40–16:5) Danu elda taudia idia gaukara goada ita ta ta idia durua ita goada noho totona. (1 Pet. 5:2, 3) Tama sina ese edia natudia idia hadibaia Iehova idia lalokau henia totona. Bona idia durua abia hidi namodia idia karaia bona kara namodia idia hahedinaraia totona. (Aon. 22:6) Danu lo Keristani taihudia ese edia haheitalai namodia, sisiba namodia, bona hagoadaia herevadia amo taihu matamata idia durua diba.—Tito 2:3-5.

6. Iehova ena hakaua dalana amo namo ita davaria totona dahaka ita karaia be namo?

⁶ Iehova ese ita dekenai hakaua daladia ibounai ia henia vadaeni. Edena dala ai ita hahedinaraia diba unai gaudia ita laloa bada? Aonega Herevadia 3:5, 6 ia gwau: “Mai emu kudouna ibounai ida Iehova oi abidadama henia, bona sibona emu diba dekenai oi tabekau lasi.” Unai bamona ita karaia neganai, “ia ese [iseda] raka dalana do ia hamaoromaoroa.” Unai ena anina be, ita do ia durua hekwakwanai momo do ita davaria lasi bona mauri ita moalelaia diba. Ita moale bada, badina Iehova be ita ia diba namonamo bona sisiba maorodia ia henia!—Sal. 32:8.

IEHOVA BE ISEDA DABU GAUDIA IA HENIA

7. Edena dala haida ai Iehova ese iseda dabu gaudia ia henia? (Filipi 4:19)

⁷ Filipi 4:19 duahia. Danu, Iehova be iseda hekwarahi ia hanamoa, aniani, dabua, bona noho gabuna ta ita davaria totona. (Mat. 6:33; 2 Tes. 3:12) Momokani, unai gaudia ita abia totona do ita lalohekwarahi, to Iehova ia ura lasi ita laloa momo. (Mat. 6:25) Dahaka dainai? Badina iseda Tamana be mai abidadama ida ia idia tomadiho henia taudia do ia rakatania lasi. (Mat. 6:8; Heb. 13:5) Ia gwau iseda dabu gaudia do ia henia, bona ena hereva ita abidadama henia momokani diba.

8. Iehova be Davida totona dahaka ia karaia?

⁸ Mani Iehova ese Davida ia durua dalana ita laloa. Lagani momo lalonai, Davida be king Saulo amo ia heau bona hekwakwanai momo ia davaria, unai nega lalonai Iehova ese Davida bona ena tatau dekenai edia tauanina durua gaudia ia henia. Davida be unai nega ai Iehova ese idia ia naria karana ia laloa neganai, ia gwau: “Guna lau be mero matamata, hari lau buruka vadaeni, to nega ta lau itaia lasi kara maoromaoro tauna ta be Dirava ese ia rakatania, iena natudia danu be aniani idia tahua lasi.” (Sal. 37:25) Reana oi danu be emu mauri ai oi itaia, nega aukadia lalonai Iehova ese mai lalokau ida tadikaka taihu edia dabu gaudia ia henia.

9. Hari disasta ia vara neganai, edena dala ai Iehova ese ena taunimanima ia durua? (Laulau itaia danu.)

⁹ Danu disasta negadia ai, Iehova ese ena taunimanima edia dabu gaudia ia henia. Hegeregere aposetolo edia nega ai, hitolo bada ia vara neganai, tano idauidau ai idia noho Keristani taudia be edia tadikaka taihu totona heduru gaudia idia siaia. (Kara 11:27-30; Roma 15:25, 26) Hari, Dirava ena taunimanima danu be unai bamona henia karana idia hahedinaraia. Iehova be ena taunimanima ia gaukaralaia dika idia vara gabudia ai tadikaka taihu totona, aniani, ranu, dabua bona muramura idia henia. Konstraksen grup be idia dika rumadia bona Kingdom Hall idia hanamoa. Bona Iehova ena taunimanima be edia kohu bona lalokau taudia idia haboioa taudia dekenai kara haraga Baibel amo hagoadaia herevadia idia henia.c

10-11. Borys ena sivarai amo dahaka oi dibaia?

¹⁰ Iehova ese ia idia do tomadiho henia lasi taudia ia durua danu. Unai hegeregerena, ita danu Iehova ita tohotohoa bona dala idauidau ai ia idia tomadiho henia lasi taudia ita kara namo henia. (Gal. 6:10) Unai ese dala do ia kehoa idia ita haroro henia diba. Mani Borys ena sivarai ita laloa, ia be Ukraine ai sikuli ta ena hedmasta. Ena be ia be Iehova ena Witnes tauna lasi, to hanaihanai Witnes stiuden ia kara namo henia bona idia abia dae gaudia ia matauraia. Tuari dainai Borys be ia ura tano ma ta dekenai ia lao neganai, iseda tadikaka ese ia idia durua. Gabeai, Borys be Keriso ena mase ena Memorial dekenai ia lao. Borys be ena sivarai ia laloa lou neganai, ia gwau: “Witnes taudia be lau idia kara namo henia bona lau idia naria. Iehova ena Witnes taudia lau tanikiu henia bada.”

¹¹ Ita danu be iseda hebogahisi guba Tamana ita tohotohoa diba, hegeregere idia dabu taudia dekenai lalokau ita hahedinaraia, ena be idia be iseda abidadama tamona taudia eiava lasi. (Luka 6:31, 36) Ita ura taunimanima dekenai lalokau ita hahedinaraia, unai amo Keriso ena hahediba taudia ai idia lao diba. (1 Pet. 2:12) Ena be idia ese Iehova do idia hesiai henia eiava lasi, to ita moale, badina henia kara ena moale be bada.—Kara 20:35.

IEHOVA ESE ITA IA GIMAIA

12. Iehova ia gwauhamata edena dala ai ena taunimanima be orea ta bamona do ia gimaia? (Salamo 91:1, 2, 14)

¹² Salamo 91:1, 2, 14 duahia. Hari, Iehova ia gwauhamata ena taunimanima ida edia hetura karana ia goada totona idia do ia gimaia. Ia ese Satani ena dala do ia kehoa lasi, tomadiho momokani ia hadikaia totona. (Ioa. 17:15) Bona “hisihisi badana” ia vara neganai, ita diba momokani Iehova ese ena gwauhamata do ia hagugurua, unai be iseda abidadama do ia hagoadaia bona ita do ia gimaia.—Apok. 7:9, 14.

13. Edena dala ai Iehova ese ita ta ta ia gimaia?

¹³ Edena dala ai Iehova ese ita ta ta ia gimaia? Iehova ese Baibel amo ita ia durua, maoro bona kerere edia idau ita diba totona. (Heb. 5:14) Baibel amo ita dibaia gaudia ita badinaia neganai, iseda hetura karana Iehova ida do ita gimaia, bona dika gaudia amo sibona do ita gimaia. (Sal. 91:4) Danu, Iehova ese kongrigeisen ia gaukaralaia ita ia gimaia totona. (Isa. 32:1, 2) Iehova idia lalokau henia bona ena taravatu idia badinaia taudia huanai ita noho neganai, goada ita abia bona hebamo dikadia ita dadaraia diba.—Aon. 13:20.

14. (a) Dahaka dainai nega haida Dirava ese ita davaria hekwakwanai ia koua lasi? (b) Salamo 9:10 be dahaka hagoadaia hereva ia henia? (Futnout itaia danu.)

¹⁴ Guna, nega haida Iehova ese ena taunimanima ia gimaia, unai amo do idia hahisia eiava hamasedia lasi. To nega ibounai unai bamona ia karaia lasi. Nega haida ita dekenai “dika be nega idauidau ai idia vara kava.” (Had. 9:11) Danu, ena hesiai taudia dekenai idia vara dagedage karadia ia koua lasi, unai amo ia ura hamomokania Satani be koikoi tauna. (Iobu 2:4-6; Mat. 23:34) Hari iseda negai danu, ita dekenai unai gaudia idia vara diba. Ena be Iehova ese iseda hekwakwanai ia kokia lasi, to ita diba momokani ia idia lalokau henia taudia do ia rakatania lasi.d—Sal. 9:10.

IEHOVA ESE ITA IA HAGOADAIA

15. Edena dala ai guriguri, Dirava ena Hereva, bona iseda tadikaka taihu amo goada ita abia? (2 Korinto 1:3, 4)

¹⁵ Korinto Iharuana 1:3, 4 duahia. Nega haida, ita lalohisihisi, ita lalohekwarahi, eiava ita lalometau. Reana hari, oi be hekwakwanai badana ta oi davaria bona oi mamia oi be sibona oi noho. Ta be emu hemami ia lalopararalaia, a? Iehova be emu hemami ia lalopararalaia. Ia be iseda hisihisi ia mamia sibona lasi, to “iseda hisihisi ibounai lalonai ia ese ita dekenai lalogoada ia henia noho.” Edena dala ai? Guriguri amo Iehova ita noia goadagoada neganai, ia ese “Dirava ena maino, laloparara ibounai ia hereaia gauna” do ia henia. (Fili. 4:6, 7) Baibel ai Iehova ena hereva ita duahia neganai, lalogoada ita abia danu. Hegeregere, Iehova ese ita ia hamaoroa ita ia lalokau henia, aonega ita abia dalana ia hadibaia, bona helaro ia henia. Bona iseda Keristani heboudia ai Baibel amo hagoadaia herevadia ita abia, bona ita idia lalokau henia tadikaka taihu huanai ita noho.

16. Nathan bona Priscilla edia sivarai amo dahaka oi dibaia?

¹⁶ Iehova ese ena Hereva amo ita ia hagoadaia dalana ita dibaia totona, United States amo Nathan bona Priscilla edia sivarai mani ita laloa. Lagani haida gunanai, idia ura pablisa momo lasi gabuna ta dekenai idia lao. Nathan ia gwau, “Ai abia dae Iehova ese emai palani do ia hanamoa.” To, unai gabu dekenai idia ginidae murinai, edia helt bona moni dalanai hekwakwanai haida idia davaria. Idia ruaosi be edia gabu dekenai idia giroa lou, to moni ena hekwakwanai idia davaria noho. Nathan ma ia gwau, “Lau laloa dahaka dainai Dirava ese emai palani ia hanamoa lasi. Bena lau laloa reana kerere ta lau karaia.” To, gabeai Nathan bona Priscilla idia laloparara edia dabu negana ai Dirava be idia ia rakatania lasi. Nathan ia gwau, “Unai nega aukana lalonai, Baibel be aonega turana ta bamona ai ia hagoadaia bona ia hakaua.” Iehova ese ai ia durua emai hekwakwanai ai haheaukalaia, bona ai laloa momo lasi totona. Unai dainai, ai diba momokani vaira negai hekwakwanai ai davaria neganai Iehova ese ai do ia durua noho.”

17. Edena dala ai taihu ta ladana Helga be goada ia abia? (Laulau itaia danu.)

¹⁷ Iseda tadikaka bona taihu be dala ma haida ai ita idia hagoadaia diba. Edena dala ai? Mani Hungary ai ia noho taihu, Helga ena haheitalai ita laloa. Lagani momo lalonai, hekwakwanai badadia ia davaria, unai dainai ia lalohisihisi bada bona ia mamia ia be anina lasi. To unai nega ia laloa lou neganai, ia itaia Iehova ese tadikaka taihu ia gaukaralaia, ia idia hagoadaia totona. Ia gwau: “Moni gaukara, egu gorere natuna lau naria, bona hekwakwanai ma haida dainai egu goada ia ore neganai, Iehova be unai ia itaia bona hanaihanai lau ia durua. Lagani 30 lalonai, dina ta ta ai Iehova ese ena gwauhamata ia badinaia bona lau ia hagoadaia. Ia ese nega momo haida ia gaukaralaia lau idia kara namo henia, lau idia laloa bada, bona hagoadaia herevadia idia henia. Heduru lau ura momokani negadia ai, teks meseij, kadi ta, eiava hanamoa herevadia lau abia.”

18. Edena dala ai ma haida ita hagoadaia diba?

¹⁸ Iehova ita tohotohoa bona ma haida ita hagoadaia karana be hahenamo badana. Edena dala ai unai ita karaia diba? Edia hereva ita kamonai namonamo, mai hebogahisi ida ita hereva, bona dala idauidau ai idia ita durua. (Aon. 3:27) Idia hisihisi taudia ibounai ita hagoadaia, ena be haida ese Dirava idia do hesiai henia lasi. Iseda dekena taudia idia lalohisihisi, gorere, eiava lalometau neganai, idia ita vadivadi henia, edia hereva ita kamonai, bona Baibel siri haida amo idia ita hagoadaia. “Lalogoada ibounai ia henia Diravana,” Iehova ita tohotohoa neganai, tadikaka bona taihu do ita durua hekwakwanai idia haheaukalaia, bona danu ma haida do ita durua tomadiho momokanina idia abia dae totona.—Mat. 5:16.

IEHOVA ESE HANAIHANAI ITA DO IA DURUA

19. Iehova be ita totona dahaka ia karaia, bona edena dala ai ia ita tohotohoa diba?

¹⁹ Iehova be ia idia lalokau henia taudia ibounai ia laloa bada. Hekwakwanai ita davaria neganai, ia ese ita do ia rakatania lasi. Tama o sina ta ese mai lalokau ida ena natuna ia naria hegeregerena, Iehova ese ena abidadama hesiai taudia ia naria. Ia ese ita ia hakaua, iseda dabu gaudia ia henia, ita ia gimaia, bona ita ia hagoadaia. Hekwakwanai idia davaria taudia ita durua bona hagoadaia neganai, ita be iseda lalokau guba Tamana ita tohotohoa. Inai tanobada ai hekwakwanai bona lalohisihisi do ita davaria, to ita diba Iehova be ita ida ia noho. Ita dekenai ia gwauhamata: “Oi gari lasi, badina lau be oi ida.” (Isa. 41:10) Unai dainai ita abia dae momokani, ita be sibona ita noho lasi.