Iakobo Ena Hereva Dokodia amo Ita Dibaia Gaudia—Kahana 1

1-2. Iakobo be ia mase gwauraia neganai dahaka ia karaia, bona dahaka dainai? ( ena laulau itaia danu.)

LAGANI 17 bamona gunanai, Iehova ena hesiai tauna Iakobo be ena ruma bese ida Kanana idia rakatania bona Aigupito dekenai idia lao. (Gen. 47:28) Unai nega ai, Iakobo be ena lalokau natuna Iosepa ida ia hedavari lou bona ena ruma bese taudia ibounai idia haboua dainai ia moale bada. To, Iakobo ia diba kahirakahira do ia mase. Unai dainai ena natudia memero ia boiria mai, badina ia ura mai anina bada gaudia do ia herevalaia.—Gen. 49:28.

² Unai negadia ai, nega momo ruma bese kwarana ta ia mase gwauraia neganai, ena ruma bese taudia do ia boiria, bona ena hereva dokodia do ia gwauraia. (Isa. 38:1) Reana unai hebou lalonai ena gabu do ia abia tauna ia gwauraia.

3. Genese 49:1, 2 amo dahaka ita dibaia?

³ Genese 49:1, 2 duahia. Iakobo ese ena ruma bese ida ia karaia hebouna be mai anina bada. Iakobo be peroveta tauna. Unai hebou lalonai, Iehova ese ena lauma helaga amo Iakobo ia hasiahua dainai, ena natudia bona edia ruma bese dekenai do idia vara mai anina bada gaudia ia gwauraia. Unai dainai Iakobo ese ena natudia dekenai ia gwauraia herevadia be peroveta herevadia.

4. Iakobo be dahaka herevadia ia gwauraia, bona ena hereva amo dahaka ia dibaia? (Maua ladana “Iakobo Ena Ruma Bese” itaia danu.)

⁴ Inai atikol ai, Iakobo ese ena natudia memero foa, Rubena, Simeona, Levi, bona Iuda dekenai ia gwauraia herevadia do ita stadilaia. Atikol gabena ai, Iakobo ese ena natudia memero ma 8 dekenai ia gwauraia herevadia do ita stadilaia. Iakobo be ena natudia memero bona edia ruma bese dekenai do idia vara gaudia ia perovetalaia. Idia be Israela ena bese badana ai do idia lao. Guna Israela besena dekenai idia vara gaudia ita stadilaia neganai, Iakobo ena peroveta herevadia idia guguru dalana do ita lalopararalaia. Bona Iakobo ena hereva ita stadilaia karana amo iseda guba Tamana Iehova ita hamoalea daladia do ita diba.

RUBENA

5. Rubena ia laloa ena tamana amo dahaka hahenamo do ia abia?

⁵ Iakobo be Rubena ia hereva henia guna, ia gwau: “Oi be egu vara guna natuna.” (Gen. 49:3) Rubena ia laloa ia be vara guna natuna dainai, ena tamana ena kohu momo do ia abia. Danu ia laloa ena tamana ia mase murinai, ia be ruma bese kwarana ai do ia lao bona idia do ia gunalaia. Bona ia laloa unai hahenamo be ena natudia bona tubudia ese do idia abia.

6. Dahaka dainai Rubena be ena vara guna ahuna ia abia lasi? (Genese 49:3, 4)

⁶ To, Rubena be ena vara guna ahuna ia abia lasi. (1 Siv. 5:1) Dahaka dainai? Lagani haida gunanai, ia be ena tamana Iakobo ena hahine ma ta ladana Bileha ida ia mahuta hebou. Ia be Iakobo ena lalokau adavana, ia mase vadaeni hahine Rahela, ena hesiai hahinena ta. (Gen. 35:19, 22) Rubena be Iakobo ena adavana ta Lea ena natuna. Reana Rubena be matabodaga urana ia abia dainai unai kara ia karaia. Eiava reana Bileha ida ia mahuta hebou badina ia ura Iakobo ese Bileha do ia inai henia bona ena sinana Lea do ia lalokau henia bada. To Rubena ese ia karaia karana be ena tamana Iakobo bona Iehova ese idia moalelaia lasi.—Genese 49:3, 4 duahia.

7. Rubena bona ena bese taudia dekenai dahaka ia vara? (Maua ladana “Iakobo Ena Peroveta Hereva Dokodia” itaia danu.)

⁷ Iakobo ese Rubena ia hamaoroa: “Oi be haida do oi hereaia lasi.” Unai hereva be idia vara momokani. Baibel ese ia hahedinaraia lasi Rubena ena bese lalonai, ta be king, hahelaga tauna eiava peroveta tauna ai ia lao. To, Iakobo ese Rubena dekenai ahuna ta ia henia, bona ena bese taudia be Israela dekenai iduhu ta ai idia lao. (Ios. 12:6) Rubena be nega haida kara namodia ia hahedinaraia, bona toana be gabeai matabodaga karana ta ia karaia lasi.—Gen. 37:20-22; 42:37.

8. Rubena ena sivarai amo dahaka ita dibaia?

⁸ Ita dibaia gauna. Namona be ita hekwarahi ura dikadia ita dadaraia, bona iseda lalona ita hadaia matabodaga karadia ita karaia lasi totona. Bema kara dika karaia totona hahetoho ita davaria, namona be ita laloa, ‘Unai kara ita karaia neganai, edena dala ai Iehova, iseda ruma bese, bona ma haida ia hahisia diba?’ Namona be ita laloatao “tau ta ese ia hadoa gauna, unai gauna sibona do ia abia.” (Gal. 6:7) To, Rubena dekenai ia vara gauna amo Iehova ena hebogahisi karana ita dibaia. Ita karaia kara dika dainai hisihisi do ita davaria, to bema ita helalo-kerehai bona ita hekwarahi dala maorona ita badinaia, Iehova ese iseda dika do ia gwauatao bona ita do ia hanamoa.

SIMEONA BONA LEVI

9. Dahaka dainai Iakobo be Simeona bona Levi dekenai ia moale lasi? (Genese 49:5-7)

⁹ Genese 49:5-7 duahia. Gabeai, Iakobo be Simeona bona Levi ia hereva henia. To ia gwauraia herevadia amo ia hahedinaraia idia dekenai ia moale lasi. Lagani haida gunanai, Iakobo ena natuna kekeni Daina be Kanana tauna Sekema ese ia reipia. Momokani, Iakobo ena natuna memero be edia taihuna Daina dekenai ia vara gauna dainai idia badu dikadika, to Simeona bona Levi be edia badu idia biagua lasi. Idia be Sekema bona ena taunimanima idia koia, idia gwau, bema edia kopina idia utua idia bona Iakobo ena ruma bese huanai maino ia noho diba. Unai tatau idia lalotamona bona edia kopina idia utua. Unai dina ai, Simeona bona Levi be “edia tuari kaia idia abia bona siti taudia idia diba lasi negana ai idia vareai bona tatau bona memero ibounai idia alaia mase.”—Gen. 34:25-29.

10. Iakobo ese Simeona bona Levi totona ia gwauraia peroveta herevadia be edena dala ai idia guguru? (Maua ladana “Iakobo Ena Peroveta Hereva Dokodia” itaia danu.)

¹⁰ Iakobo ia badu dikadika, badina ena natuna memero rua ese taunimanima momo idia hamasea. Iakobo ia peroveta edia bese taudia be Israela ena tano idauidau dekenai do idia lao. Unai peroveta herevana be lagani 200 murinai Israela besena be Gwauhamata Tanona dekenai idia vareai neganai ia guguru. Simeona ena iduhu ena ahuna be Iuda ena teritori ai siti haida idia abia. (Ios. 19:1) Bona Levi iduhu ena ahuna be Israela tanona dekenai idia noho siti ibounai 48.—Ios. 21:41.

11. Simeona bona Levi edia iduhu be dahaka gau namodia idia karaia?

¹¹ Simeona bona Levi edia bese taudia be edia tubudia ese idia karaia kerere idia karaia lou lasi. Levi ena iduhu taudia momo be Iehova idia tomadiho henia bona badinaia. Mose be Sinai Ororona ai Iehova amo taravatu ia abia neganai, Israela taudia momo be kaivakuku tomadiho henia karana lalonai idia vareai. To Levi taudia ese Mose idia durua unai kaivakuku idia tomadiho henia taudia idia hamasea totona. (Eso. 32:26-29) Iehova ese Levi iduhu ena tatau ia abia hidi Israela ai hahelaga gaukara idia karaia totona. (Eso. 40:12-15; Num. 3:11, 12) Gabeai, Simeona iduhu taudia ese Iuda iduhu taudia idia durua bona Kanana taudia idia tuari henia, Gwauhamata Tanona idia abia totona.—Hah. 1:3, 17.

12. Simeona bona Levi edia sivarai amo dahaka ita dibaia?

¹² Ita dibaia gauna: Namona be iseda badu ita ia biagua. Bema haida ese oi eiava emu lalokau taudia idia kara auka henia, do oi badu diba. (Sal. 4:4) To laloatao, Iehova do ia moale lasi bema iseda hereva bona kara amo haida ita hahisia. (Iam. 1:20) Bema kongrigeisen lalonai eiava murimuri ai haida ese ita idia kara auka henia, namona be Baibel ena hakaua herevadia ita laloa, unai ese ita do ia durua iseda badu ita biagua totona. (Roma 12:17, 19; 1 Pet. 3:9) Ena be emu tama sina be Iehova ia moalelaia lasi karadia idia karaia, to namona be oi laloatao, abia hidi oi karaia diba Iehova oi hamoalea totona. Iehova ese oi do ia durua kara maorona oi karaia totona bona oi do ia hanamoa.

IUDA

13. Dahaka dainai Iuda ia lalo-hekwarahi ena tamana ena hereva ia kamonai totona?

¹³ Iakobo be hari Iuda do ia hereva henia. Reana Iuda be ena tamana ese ena kakadia dekenai ia gwauraia herevadia ia kamonai dainai ia lalo-hekwarahi. Badina Iuda danu be kerere badadia haida ia karaia. Ia be ena tadikaka ia durua Sekema siti lalonai kohu ibounai idia abia totona. (Gen. 34:27) Danu, Iuda be ena tadikaka ida Iosepa idia hoihoilaia, bena edia tamana dekenai sivarai koikoi idia gwauraia. (Gen. 37:31-33) Bona Iuda be ena natuna mero ia mase murinai, ena ravana Tamara ida ia mahuta hebou, badina ia laloa ia be ariara hahinena.—Gen. 38:15-18.

14. Iuda be dahaka kara namodia ia hahedinaraia? (Genese 49:8, 9)

¹⁴ To, Iakobo ese Iuda ia hanamoa , bona ia gwauhamata ia bona ena ruma bese dekenai gau namodia do idia vara. (Genese 49:8, 9 duahia.) Iuda ia hahedinaraia ena tamana burukana ia laloa bada. Danu, ena tadina Beniamina dekenai hebogahisi ia hahedinaraia.—Gen. 44:18, 30-34.

15. Edena dala idauidau ai Iuda be hahenamo ia abia?

¹⁵ Iakobo ia peroveta Iuda be ena tadikaka do ia gunalaia. To unai peroveta herevana be lagani 200 bamona murinai ia guguru matamaia. Israela besena be Aigupito idia rakatania bona Gwauhamata Tanona dekenai idia lao noho neganai, Iuda iduhuna ese unai bese ibounai ia gunalaia. (Num. 10:14) Lagani momo murinai, Iehova ese Iuda iduhuna ia abia hidi, Kanana taudia tuari henia karana do idia gunalaia, Gwauhamata Tanona idia abia totona. (Hah. 1:1, 2) Bona Davida be Iuda besena amo ia mai king ginigunana. To Iuda totona idia gwauraia peroveta herevana be dala ma haida ai idia guguru danu.

16. Genese 49:10 ena peroveta herevana be edena dala ai ia guguru? (Maua ladana “Iakobo Ena Peroveta Hereva Dokodia” itaia danu.)

¹⁶ Iakobo ese ia hahedinaraia, Iuda ena bese amo do ia mai King ese taunimanima do ia lohiaia ela bona hanaihanai. (Genese 49:10 bona futnout duahia.) Unai King be Iesu Keriso, Iakobo ese ia ia gwauraia Silo. Oibe, aneru ese Iesu ia herevalaia neganai, ia gwau: “Iehova Dirava ese ia dekenai ena tamana Davida ena terona do ia henia.” (Luka 1:32, 33) Danu Iesu idia gwauraia “Iuda iduhu ena Laiona.”—Apok. 5:5.

17. Ma haida ita kara henia neganai, edena dala ai Iehova ena haheitalai ita tohotohoa?

¹⁷ Ita dibaia gauna. Iehova ese Iuda ia hanamoa ena be kerere badadia haida ia karaia. Reana Iuda ena tadikaka idia laloa, dahaka dainai Iehova ese Iuda ia hanamoa? Edia lalohadai ita diba lasi, to ita dibaia gauna be, Iehova ese Iuda dekenai gau namona ia itaia. Edena dala ai Iehova ena haheitalai ita tohotohoa diba? Bema iseda tadikaka o taihu ta be mai anina bada asainmen ta ia abia, reana ena kerere haida ita diba dainai do ita laloa, ‘Dahaka dainai unai asainmen ia abia?’ To namona be ita laloatao, Iehova be unai tadikaka eiava taihu ena kara namodia dainai ia moale. Iehova be ena hesiai taudia edia kara namodia sibona ia laloa bada. Ita danu unai bamona ita karaia be namo.

18. Dahaka dainai haheauka karana ita hahedinaraia be namo?

¹⁸ Iuda amo ita dibaia kara namona ta be haheauka. Iehova be hanaihanai ena gwauhamata ia hagugurua, to nega haida ita laloa dalana eiava ita laloa negana ai ia hagugurua lasi. Unai dainai ita haheauka be namo. Hegeregere, Iuda ena bese taudia be maoromaoro Dirava ena bese taudia idia gunalaia lasi. To idia be hanaihanai Iehova ese ia abia hidi taudia, hegeregere Levi tauna Mose, Eparaima tauna Iosua, eiava Beniamina ena bese tauna King Saulo, idia durua. Ita danu be Iehova ese ia abia hidi gunalaia taudia ita durua be namo.—Heb. 6:12.

19. Iakobo ese ena natudia foa dekenai ia gwauraia peroveta herevadia ita herevalaia neganai, dahaka ita dibaia?

¹⁹ Iakobo ese ena natudia foa dekenai ia gwauraia peroveta herevadia amo dahaka ita dibaia? Ita dibaia gauna be, “Dirava be taunimanima ese idia itaia hegeregerena ia itaia lasi.” (1 Sam. 16:7) Iehova be haheauka bona dika gwauatao Diravana. Bema kara dika ita karaia Iehova ia moale lasi, to danu ia diba ita be goevadae lasi taudia. Ia ese guna kara dika badadia idia karaia taudia edia dika ia gwauatao, bona idia ia hanamoa, badina mai lalona ibounai ida idia helalo-kerehai. Atikol gabena ai, Iakobo ese ena natudia memero 8 dekenai ia gwauraia herevadia do ita stadilaia.