Sisiba Henia Dala Namodia

1. Daika ese sisiba ia henia be namo, bona dahaka dainai?

SISIBA oi henia totona emu hemami be edena bamona? Haida be sisiba idia henia neganai, idia moale. Haida be idia gari eiava idia laloa idia hegeregere lasi dainai, idia ura lasi sisiba idia henia. To ita ibounai be nega ta ta ai sisiba ita henia diba. Dahaka dainai? Badina Iesu ia gwau, ia idia badinaia taudia korikoridia be ta ta do idia lalokau henia. (Ioa. 13:35) Bona iseda tadikaka bona taihu dekenai sisiba ita henia karana amo unai lalokau ita hahedinaraia. Baibel ia gwau: “Mai momokani ida sisiba henia karana ese hetura karana namona ia havaraia.”—Aon. 27:9.

2. Elda taudia be dahaka idia karaia be namo, bona dahaka dainai? (Maua ladana “Midwik Hebou ai Sisiba Henia” itaia.)

² Elda taudia be ma haida dekenai sisiba namona henia karana idia diba be namo. Iehova be Iesu amo unai tatau ia abia hidi kongrigeisen idia naria totona. (1 Pet. 5:2, 3) Unai idia karaia dalana ta be kongrigeisen ai tok idia henia neganai, Baibel amo sisiba idia henia. Danu idia ese ita ta ta dekenai sisiba idia henia bona kongrigeisen idia rakatania taudia idia durua Iehova dekenai idia giroa totona. Edena dala ai elda taudia bona ita ibounai ese sisiba namona ita henia diba?

3. (a) Edena dala ai sisiba henia tauna namona ai ita lao diba? (Isaia 9:6; maua ladana “Sisiba Henia Karana Dekenai Iesu Tohotohoa” itaia.) (b) Inai atikol ai dahaka henanadai do ita haerelaia?

³ Sisiba henia tauna namona ai ita lao totona, Baibel ai idia noho haheitalai namodia ita stadilaia diba. Haheitalai namo hereana be Iesu. Ia ese ia abia dagi ladana ta be “Sisiba Henia Tauna Hereadaena.” (Isaia 9:6 duahia.) Inai atikol ai, inai henanadai do ita haerelaia: Bema ta be ita ia noia sisiba ita henia totona, edena bamona ia do ita durua? Bona bema ta be ita ia noia lasi bona sisiba ita henia, edena bamona ia do ita durua? Danu dahaka dainai sisiba be nega bona dala maorona ai ita henia be mai anina bada?

BEMA TA ESE ITA IA NOIA SISIBA TOTONA

4-5. Bema ta be ita ia noia sisiba ita henia totona, ita sibona dekenai dahaka henanadai ita henia diba? Haheitalai ta gwauraia.

⁴ Bema ta be ita ia noia sisiba ita henia totona, dahaka ita karaia guna be namo? Reana do ita moale bona ita ura maoromaoro ia ita durua. To namona be sibona ita nanadaia guna, ‘Lau be lau hegeregere inai sisiba lau henia totona, a?’ Nega haida dala namona be sisiba ita henia lasi, to unai tauna ita hamaoroa diba ia lao ia do ia durua diba tauna ia itaia.

⁵ Mani inai haheitalai ita laloa. Bema emu turana namona be gorere badana ta ia davaria. Bona ia ese oi ia hamaoroa ia be ena gorere hanamoa daladia haida ia tahua noho, bena emu lalohadai totona oi ia nanadaia. Reana oi be mai emu lalohadai namodia haida, to oi be doketa lasi bona unai gorere hanamoa dalana oi diba lasi. Unai dainai dala namona be ia oi durua unai gorere ena doketa namona ta ia davaria totona.

6. Dahaka dainai sisiba ita do henia lasi neganai, ita naria sisina?

⁶ Ena be gau haida dekenai ita hegeregere sisiba ita henia totona, to namona be nega sisina ita naria gabeai tau ta dekenai sisiba ita henia. Dahaka dainai? Badina Aonega Herevadia 15:28 ia gwau: “Kara maoromaoro tauna be ia laloa dobu guna bena ia haere.” To bema ita laloa unai henanadai ena haere ita diba, dahaka do ita karaia? Unai nega danu namona be nega ita atoa tahua gaukara ita karaia, ita guriguri, bona ita laloa dobu totona. Unai amo do ita diba momokani iseda haere be Iehova ena lalohadai ida ia hegeregere. Mani peroveta tauna Natana ena haheitalai ita laloa.

7. Peroveta tauna Natana ena haheitalai amo dahaka oi dibaia?

⁷ King Davida be peroveta tauna Natana ia hereva henia neganai, ia gwau ia ura Iehova ena dubu helaga do ia haginia. Natana ese maoromaoro Davida ia hamaoroa unai do ia karaia. To Natana ese Iehova ena lalohadai ia tahua guna be namo. Dahaka dainai? Badina Iehova ia gwau lasi Davida ese dubu helaga do ia haginia. (1 Siv. 17:1-4) Unai sivarai ese ia hahedinaraia bema ta ese ita ia noia sisiba ita henia totona, aonega karana be do ita “hereva haraga lasi.”—Iam. 1:19.

8. Sisiba ita do henia lasi neganai, dahaka badina ma ta ita laloa guna be namo?

⁸ Sisiba ita do henia lasi neganai, do ita laloa gauna ta be inai: Bema iseda sisiba hegeregerena ta be abia hidi ia karaia bona dika ia davaria, metau do ita abia danu. Unai dainai namona be ita laloa namonamo guna, gabeai sisiba ita henia.

ITA IDIA NOIA LASI TO SISIBA ITA HENIA

9. Elda taudia be sisiba ta idia do henia lasi neganai, dahaka idia laloa be namo? (Galatia 6:1)

⁹ Tadikaka ta eiava taihu ta be “dala kererena ai ia raka” neganai, elda taudia ese sisiba idia henia be namo. (Galatia 6:1 duahia.) Unai siri ena stadi nouti ese ia hahedinaraia, unai bamona tauna be “dala kererena ai ia lao noho, to dika badana ta ia do karaia lasi.” Elda taudia edia tahua gauna be unai tauna do idia durua, mauri ena dala dekenai ia raka noho totona. (Iam. 5:19, 20) To edia sisiba amo unai tauna idia durua totona, namona be idia diba momokani unai tauna be dala kererena ai ia raka vadaeni. Iehova ese ita ia koua lasi iseda lalomamina hegeregerena abia hidi ita karaia totona. (Roma 14:1-4) To, bema tadikaka ta be dala kererena ai ia raka bona elda taudia idia laloa ia dekenai sisiba idia henia be namo be edena bamona?

10-12. Elda taudia ese sisiba idia henia neganai, dahaka idia karaia be namo? Haheitalai gwauraia. (Laulau itaia danu.)

¹⁰ Bema ta be heduru ia noia lasi, do ia auka elda taudia ese sisiba idia henia totona. Edena dala ai? Aposetolo Paulo ia gwau tau ta be dala kererena ai ia raka diba bona unai ia diba lasi. Unai dainai, bema elda taudia be ia dekenai sisiba idia henia do ia laloparara lasi dahaka dainai sisiba idia henia. Unai dainai elda taudia be gau haida idia karaia guna be namo, unai amo ia idia durua diba sisiba ia abia dae totona.

¹¹ Sisiba ia noia lasi tauna dekenai sisiba henia karana be hegeregere tano aukana ai uhe oi hadoa bamona. Biru tauna be uhe ia do hadoa lasi neganai, tano do ia hegaegaelaia guna. Unai amo tano do ia manoka bona uhe do ia hadoa diba. Bena uhe ia hadoa bona ia dairia ela bona ia tubu. Unai hegeregerena, elda tauna ese sisiba ia henia totona, namona be dala ia karaia unai tauna ia durua totona. Hegeregere, nega namona ta ai ia ese unai tadikaka ia hadibaia diba ia be ia ia laloa bada. Bema sisiba henia tauna be lalokau bona kara namodia ia hahedinaraia, do ia auka lasi ma haida ese ena sisiba idia abia dae totona.

¹² Idia herevahereva lalonai, elda tauna ese unai tadikaka do ia hamaoroa taunimanima ibounai be kerere idia karaia bona nega ta ta ai sisiba idia abia be namo. (Roma 3:23) Elda tauna be mai gado namo bona hemataurai ida Baibel amo unai tadikaka dekenai ia hahedinaraia ia badinaia dala be kerere. Unai tadikaka ia laloparara ia be dala kererena ia badinaia neganai, elda tauna ese ia dekenai do ia gwauraia hedinarai dahaka do ia karaia ena hekwakwanai ia hamaoromaoroa totona, unai be uhe ia hadoa bamona. Dokonai elda tauna be tadikaka dekenai hanamoa hereva ia gwauraia bona ia ida ia guriguri, unai be uhe ia “dairia” bamona.—Iam. 5:15.

13. Edena dala ai elda taudia do idia diba bema ta ese edia sisiba ia lalopararalaia?

¹³ Nega haida ta ese ia henia sisiba be sisiba ia abia tauna ese do ia lalopararalaia lasi. Unai ia vara lasi totona, elda taudia be dahaka idia karaia be namo? Idia ese mai hemataurai ida henanadai namodia idia henia diba, unai amo idia durua tadikaka be point badadia do ia lalopararalaia. (Had. 12:11) Tadikaka ena haere amo elda taudia do idia diba bema tadikaka be edia sisiba ia lalopararalaia.

NEGA BONA DALA MAORONA AI SISIBA ITA HENIA

14. Ita badu negana ai sisiba ita henia be namo, a? Gwauraia hedinarai.

¹⁴ Ita be goevadae lasi taudia dainai, nega ta ta ai iseda kara eiava hereva amo haida ita hahisia diba. (Kol. 3:13) Baibel ese ia hahedinaraia nega haida ita ese ma haida ita habadua diba. (Efe. 4:26) To ita badu noho lalonai namo lasi sisiba ita henia. Dahaka dainai? “Badina tau ta ena badu ese Dirava ena kara maoromaoro ia havaraia diba lasi.” (Iam. 1:20) Bema ita badu noho lalonai sisiba ita henia, unai ese ta do ia durua lasi. Ita idia habadua taudia dekenai iseda hemami bona lalohadai ita gwauraia diba. To, namona be ita naria ela bona iseda badu ia ore murinai, ia ida ita herevahereva diba. Iobu ena tura namona Elihu ena haheitalai mani ita laloa.

15. Elihu ena haheitalai amo dahaka ita dibaia? (Laulau itaia danu.)

¹⁵ Dina haida lalonai, Iobu be ena turadia koikoi ia hereva henia neganai, Elihu be ia helai bona ia kamonai noho. Elihu be Iobu dekenai ia hebogahisi. To, danu Elihu be Iobu dekenai ia badu badina Iobu be sibona ena namo ia laloa bona Iehova dekenai hereva maorodia ia gwauraia lasi. Elihu ia naria ela bona ena nega bona mai manau bona hemataurai ida Iobu ia sisiba henia. (Iobu 32:2; 33:1-7) Elihu ena haheitalai ese ita dekenai mai anina bada gauna ia hadibaia: Sisiba ita henia neganai, nega maorona bona dala maorona ai ita henia mai hemataurai bona lalokau ida.—Had. 3:1, 7.

SISIBA ITA HENIA NOHO BONA SISIBA ITA ABIA DAE

16. Salamo 32:8 amo dahaka oi dibaia?

¹⁶ Inai atikol ena siri badana ia gwau ‘Iehova ese oi dekenai sisiba ia henia neganai, ena matana be oi dekenai.’ (Salamo 32:8 duahia.) Unai siri ese ia hahedinaraia Iehova be hanaihanai ita do ia durua. Ia ese sisiba ia henia bona ita ia durua ita badinaia totona. Ia ese ita dekenai haheitalai namona ia hahedinaraia! Bema ita be ma haida dekenai sisiba ita henia, namona be Iehova ena haheitalai ita tohotohoa, anina be idia ita hagoadaia bona ita durua abia hidi maorodia idia karaia totona.

17. Elda taudia be Baibel amo sisiba namodia idia henia neganai, dahaka idia hahedinaraia? Gwauraia hedinarai. (Isaia 32:1, 2)

¹⁷ Hari inai negai, namona be haida dekenai sisiba ita henia bona bema sisiba ita abia, namona be ita abia dae. (2 Tim. 3:1) Elda taudia ese Baibel amo idia henia sisiba be hegeregere “ranu lasi tanona ai ia aru sinavai bamona.” (Isaia 32:1, 2 duahia.) Iseda turadia ese iseda namo totona idia henia sisiba namodia dainai idia ita tanikiu henia. Edia hereva be harihari gaudia namodia, “siliva disi lalonai idia noho golo apolo bamona.” (Aon. 25:11) Namona be ita ibounai be aonega ita abia dalana ita dibaia noho, unai amo sisiba henia daladia do ita dibaia bona sisiba do ita abia dae.