Ura Dikadia Dadaraia Dalana

1. Ita ibounai be dahaka ita davaria?

NEGA ta oi ura bada Iehova ese ia ura henia lasi gauna oi karaia, a? Bema oibe, namo lasi oi laloa oi davaria hahetoho be ma haida edia ia hereaia. Baibel ia gwau: “Umui davaria hedibagani be vaia taunimanima ibounai ese idia davaria hedibagani bamona.” (1 Kor. 10:13) Unai ena anina be oi davaria hahetoho be ma haida ese idia davaria danu. Iehova ese oi ia durua diba unai hahetoho oi hanaia totona.

2. Keristani taudia bona Baibel stiuden haida be dahaka hahetoho idauidau idia haheaukalaia? (Laulau itaia danu.)

² Danu Baibel ia gwau: “Ta be sibona ena ura ese ia tohoa, unai ura ese ena lalona ia veria bona ia koia.” (Iam. 1:14) Reana ta ese ia davaria hahetoho be ma ta amo ia idau. Hegeregere Keristani tauna ta ese ia davaria hahetoho be kekeni ta ida do ia mahuta hebou eiava tau ta be ia ura tau ma ta ida do ia mahuta hebou. Haida be laulau dikadia itaia karana idia rakatania vadaeni, to idia itaia lou totona hahetoho idia davaria diba. Drag ania karana eiava inuinu kekero karana idia rakatania taudia momo be unai hahetoho idia davaria danu. Unai be Keristani taudia bona Baibel stiuden taudia haida ese idia davaria hahetoho haida sibona. Nega ta ta ai ita be aposetolo Paulo bamona ita mamia diba, ia gwau: “Lau ura kara namona lau karaia neganai, kara dika be lau ida ia noho.”—Roma 7:21.

3. Bema ta be ura dikadia ia abia loulou, unai ese ia dekenai dahaka ia havaraia diba ?

³ Bema oi be nega momo oi hekwarahi emu ura dikadia oi dadaraia totona, reana do oi laloa emu goada ia ore unai hahetoho oi haheaukalaia totona. Reana do oi laloa Iehova be oi ia abia dae lasi badina oi be ura dikadia oi abia noho. To unai lalohadai rua be momokani lasi! Unai ena badina ita hahedinaraia totona inai atikol ai henanadai rua do ita haerelaia: (1) Unai bamona lalohadai eiava hemami be edeseni amo ia mai? (2) Edena dala ai ura dikadia oi dadaraia diba?

SATANI IA URA DAHAKA ITA LALOA

4. (a) Dahaka dainai Satani ia ura hahetoho ita davaria neganai, ita mamia ita be goada lasi? (b) Dahaka dainai hahetoho ita dadaraia totona goada ita abia diba?

⁴ Hahetoho ita davaria neganai, Satani ia ura do ita laloa ita be goada lasi unai ita dadaraia totona. Iesu be ena hahediba taudia dekenai guriguri dalana ia hadibaia neganai, ia gwau: “Ai oi durua hedibagani lalonai do ai moru lasi, to Satani amo ai oi hamauria.” (Mat. 6:13) Tau ta be hahetoho ia davaria neganai, Satani ia gwau unai tauna be mai ura ida Iehova do ia badinaia lasi. (Iobu 2:4, 5) Dahaka dainai Satani be unai bamona ia laloa? Badina Satani be ena ura dikadia dainai, ia ura lasi Iehova do ia badinaia noho. Unai dainai ia abia dae ita be ia bamona, bema hahetoho ita davaria Iehova do ita rakatania. Danu Satani ia laloa Dirava ena natuna goevadaena be hahetoho lalonai ia moru diba! (Mat. 4:8, 9) To mani oi laloa: Ita be goada lasi ura dikadia ita dadaraia totona, a? Lasi! Ita be aposetolo Paulo ena hereva dekenai ita lalotamona, ia gwau: “Lau dekenai siahu ia henia tauna amo goada lau abia gau ibounai lau karaia totona.”—Fili. 4:13.

5. Edena bamona ita diba Iehova ia abia dae momokani ita ese ura dikadia ita dadaraia diba?

⁵ To Iehova be Satani amo ia idau momokani, badina Iehova ia diba iseda ura dikadia ita dadaraia diba. Edena bamona unai ita diba? Badina Iehova ia peroveta, kara maoromaoro hutuma bada taudia be hisihisi badana amo do idia roho mauri. Unai hereva ena anina mani ita laloa. Ia koikoi diba lasi Diravana Iehova ia gwau, hutuma bada be tanobada matamata lalonai do idia vareai. Idia be “Mamoe Natuna ena rara lalonai edia dabua idia huria bona idia kurokuro vadaeni.” (Apok. 7:9, 13, 14) Ia hedinarai Iehova ia diba ita be mai eda goada iseda ura dikadia ita dadaraia totona.

6-7. Dahaka dainai Satani ia ura ita laloa Iehova ese ita ia abia dae lasi?

⁶ Danu Satani ia ura do oi abia dae Iehova ese oi ia laloa lasi. Dahaka dainai Satani ia ura unai bamona ita laloa? Badina Satani be Iehova ese ia abia dae lasi bona mauri hanaihanai ia abia diba lasi. (Gen. 3:15; Apok. 20:10) Unai dainai Satani ia ura do ita laloa Iehova ese ita ia abia dae lasi, badina ita abia hahenamo be do ia abia lasi. To ita be Iehova ese ia abia dae. Momokani Baibel ese ita ia hadibaia Iehova “ia ura lasi tau ta ia mase, to ia ura taunimanima ibounai be do idia helalo-kerehai.”—2 Pet. 3:9.

⁷ Momokani, bema ita abia dae ita be goada lasi ura dikadia ita dadaraia totona eiava Iehova ese ita ia abia dae lasi, ita be Satani ena lalohadai hegeregerena ita laloa. Unai ita lalopararalaia neganai, ita do ia durua diba Satani ita dadaraia totona.—1 Pet. 5:8, 9.

ITA BE KARA DIKA TAUDIA DAINAI ITA ABIA HEMAMI

8. Kara dika be ita karaia kereredia sibona lasi, to Baibel ai ena anina ma ta be dahaka? (Salamo 51:5) (“Hereva Ena Anina” itaia danu.)

⁸ Gau ma ta dainai ita laloa diba, ita be goada lasi ura dikadia ita dadaraia totona bona do ita mamia Iehova ese ita ia abia dae lasi. Unai gauna be dahaka? Unai be iseda tama sina ginigunadia amo ita abia kara dika.a—Iobu 14:4; Salamo 51:5 duahia.

9-10. (a) Adamu bona Heva idia kara dika murinai dahaka idia laloa? (Laulau itaia danu.) (b) Ita be kara dika ita abia dainai, ita dekenai dahaka ia vara?

⁹ Adamu bona Heva idia kara dika dainai, idia dekenai ia vara gauna mani ita laloa. Idia be Iehova dekenai idia gwau-edeede murinai, Iehova amo idia hunia bona idia ura edia tauanina idia koua danu. Insight on the Scriptures be unai kara ia herevalaia neganai, ia gwau: “Kara dika dainai idia mamia idia kerere, idia lalometau bona idia hemarai.” Adamu bona Heva be edia hetura karana Iehova ida idia haboioa. Ena be dahaka idia karaia, to idia be nega ibounai idia mamia idia kerere, idia hemarai bona idia lalometau, badina idia be kara dika taudia.

¹⁰ Oibe, ita be Adamu bona Heva hegeregerena lasi. Badina mauri davalaia boubouna be idia totona lasi. Mauri davalaia boubouna ese iseda kara dika amo ita ia hagoevaia bona iseda hetura karana Dirava ida ia hanamoa. (1 Kor. 6:11) To ita be Adamu bona Heva amo kara dika ita abia. Unai dainai nega haida ita kerere ena hemami ita abia, ita lalometau bona ita hemarai. Baibel ia hahedinaraia kara dika ena ura dikadia ese taunimanima ia biagua bona “Adamu ia karaia kara dikana idia karaia lasi taudia be mase ese ia lohiaia danu.” (Roma 5:14) To namo lasi inai bamona ita laloa, ita be kara dika taudia dainai ita be goada lasi ura dikadia ita dadaraia totona bona Iehova ese ita do ia abia dae lasi. Unai bamona lalohadai kereredia ita dadaraia diba. Edena dala ai?

11. Bema ita laloa ita hegeregere lasi, dahaka ita karaia be namo bona dahaka dainai? (Roma 6:12)

¹¹ Bema ita laloa ura dikadia ita dadaraia totona ita hegeregere lasi, ita diba unai be iseda kara dika lalohadaina ia “hereva” noho bona unai ita kamonai lasi be namo. Dahaka dainai? Badina Baibel ese ita ia hadibaia namo lasi kara dika be “king bamona” ita do ia lohia noho. (Roma 6:12 duahia.) Unai ena anina be iseda ura dikadia do ita badinaia lasi. (Gal. 5:16) Iehova ia diba ita ese hahetoho ita davaria diba. (Deu. 30:11-14; Roma 6:6; 1 Tes. 4:3) Momokani ita ese iseda ura dikadia ita dadaraia diba.

12. Bema ita abia dae lasi Iehova ese ita ia lalokau henia, dahaka ita karaia be namo bona dahaka dainai?

¹² Unai hegeregerena bema ita abia dae lasi Iehova ese ita do ia durua, unai be iseda lalona ai ia noho gadona ia “hereva” noho bona namona be ita dadaraia. Dahaka dainai? Badina Baibel ese ita ia hadibaia Iehova be iseda goevadae lasi maurina ia lalopararalaia. (Sal. 103:13, 14) Iehova be ita ia diba namonamo hegeregere ia diba ita be kara dika taudia bona nega haida ita kerere diba. (1 Ioa. 3:19, 20) Bema iseda ura dikadia ita badinaia lasi, Iehova vairanai ita goeva diba. Dahaka dainai unai ita abia dae?

13-14. Ura dikadia ita abia dainai, unai ese ia hahedinaraia Iehova ese ita ia abia dae lasi, a? Gwauraia hedinarai.

¹³ Baibel ese ita badinaia ura dikana bona ita lalohadailaia ura dikana ena idau ia hahedinaraia. Hegeregere Korinto ai Keristani taudia ginigunadia be guna homosexual karadia idia karaia. Paulo ia gwau: “Guna umui haida be unai bamona.” Unai ena anina be homosexual karadia ena ura idia abia lou lasi, a? Badina unai bamona ura be do ia ore haraga lasi. To sibona edia ura idia biagua bona unai kara idia karaia lasi Keristani taudia be Iehova ese ia abia dae. Ia ese idia ia “hagoevaia” vadaeni. (1 Kor. 6:9-11) Bona Iehova ese oi dekenai unai bamona ia karaia danu.

¹⁴ Ena be edena bamona ura dikadia oi haheaukalaia noho, to oi ese unai ura dikadia oi dadaraia diba. Ena be unai ura dikadia oi kokia momokani diba lasi, to sibona oi biagua diba bona “iseda tauanina bona eda lalohadai edia ura hegeregerena ita kara” lasi. (Efe. 2:3) Edena bamona unai ita karaia diba unai amo iseda ura dikadia ita dadaraia diba?

KWALIMU DALANA

15. Bema ita ura iseda ura dikadia dadaraia karana dekenai ita kwalimu, dahaka dainai iseda manoka gaudia ita gwauraia hedinarai be namo?

¹⁵ Ura dikadia ita dadaraia totona, namona be sibona iseda manoka gaudia ita gwauraia hedinarai. “Lalohadai koikoidia” oi dadaraia be namo. (Iam. 1:22) Bema unai hekwakwanai ita laloa maragi, unai ese dala do ia kehoa unai hahetoho lalonai ita vareai totona. Hegeregere, bema ta ia gwau, ‘haida be idia inuinu momo to lau be sisina sibona lau inua’ eiava haida idia bleim bona idia gwau, ‘lau be ponografi do lau itaia lasi bema egu adavana be lau ia lalokau henia.’ Unai dainai dala kererena oi badinaia ena lalohadai oi abia lasi be namo. Oi karaia gauna ena davana be oi sibona do oi abia.—Gal. 6:7.

16. Edena dala ai emu lalona oi hadaia diba kara maorona oi karaia totona?

¹⁶ Sibona iseda manoka gaudia ita gwauraia hedinarai sibona lasi to namona be iseda lalona ita hadaia unai ura dikadia do ita badinaia lasi totona. (1 Kor. 9:26, 27; 1 Tes. 4:4; 1 Pet. 1:15, 16) Nega momo oi davaria hahetoho bona unai hahetoho oi davaria negadia oi laloa. Reana ia be oi davaria hahetoho ta eiava nega ta ai unai hahetoho oi davaria. Hegeregere, oi hesiku neganai eiava hanuaboi momokani ai unai hahetoho oi davaria, a? Namona be unai hahetoho totona oi hegaegae bona oi laloa unai nega ai dahaka do oi karaia. Namona be hahetoho ia vara lasi neganai unai oi karaia.—Aon. 22:3.

17. Iosepa ena haheitalai amo dahaka ita dibaia? (Genese 39:7-9) (Laulau itaia danu.)

¹⁷ Potifara ena adavana ese Iosepa ia doria negana mani ita laloa. Iosepa ese karaharaga unai hahine ia dadaraia. (Genese 39:7-9 duahia.) Unai ese dahaka ia hahedinaraia? Potifara ena adavana ese ia do doria lasi neganai Iosepa be ena lalona ia hadaia tau ta ena adavana do ia ura henia lasi. Unai hegeregerena hahetoho ta ita do davaria lasi neganai, namona be iseda lalona ita hadaia guna, kara maoromaoro ita badinaia totona. Unai dala amo hahetoho oi davaria neganai, do ia auka lasi oi karaia abia hidi oi badinaia totona.

“UMUI TAHUA NOHO”

18. Edena dala ai ura dikadia dadaraia karana dekenai oi kwalimu diba? (2 Korinto 13:5)

¹⁸ Ura dikadia dadaraia karana dekenai oi kwalimu totona, namona be oi “tahua noho,” anina be hanaihanai sibona oi sekea bema oi be dala maorona oi badinaia noho. (2 Korinto 13:5 duahia.) Nega ta ta ai emu lalohadai bona kara oi sekea, bema gau haida idia maoro lasi, oi hamaoromaoroa. Hegeregere, bema hahetoho ta oi hanaia vadaeni, sibona oi nanadaia, hahetoho lau dadaraia haraga eiava lasi? Bema oi itaia oi dadaraia haraga lasi, oi lalomanoka lasi. To do oi hanamoa gaudia oi laloa. Sibona dekenai inai bamona henanadai oi henia, ‘lalohadai kereredia dadaraia totona lau haraga diba, a? Lau abia hidi moale karadia dainai ia auka hahetoho lau dadaraia totona, a? Laulau dikadia idia hedinarai neganai lau, koua haraga, a? Lau laloparara dahaka dainai hanaihanai Iehova ena taravatu lau badinaia be egu namo totona, a?’—Sal. 101:3.

19. Edena dala ai abia hidi kerere maragidia dainai do ia auka iseda ura dikadia ita dadaraia totona?

¹⁹ Sibona emu kara oi tahua noho lalonai, namo lasi emu kara kereredia dainai ekskius oi gwauraia. Baibel ia gwau: “Gau iboudiai amo, kudouna be ia koikoi momo, bona ia ura dika ia havaraia.” (Ier. 17:9) Iesu ia gwau kudouna amo “lalohadai dikadia” idia mai. (Mat. 15:19) Hegeregere, ponografi itaia karana ia rakatania tauna ta be reana gabeai do ia laloa, laulau haida itaia karana be kerere lasi, badina kopina kavakava taudia idia hedinarai lasi. Eiava reana do ia gwau, ‘ura dikadia lau lalohadailaia sibona be kerere lasi, badina do lau karaia lasi.’ Unai be hegeregere unai tauna ena kudouna ai ‘tauanina ena ura karaia totona ia palani guna.’ (Roma 13:14) Edena dala ai unai oi dadaraia diba? Bema abia hidi kerere maragidia oi karaia, abia hidi kerere badadia do oi karaia diba, bona kara dika ta do oi karaia.b Kara kerere ena ekskius ia havaraia “lalohadai dikadia” oi dadaraia.

20. Nega vaira ai dahaka hahenamo do ita abia, bona hari inai nega ai dahaka heduru ita abia diba?

²⁰ Ita herevalaia bamona Iehova ena heduru amo goada ita abia diba hahetoho ita dadaraia totona. Danu Iehova ena hebogahisi dainai ita be tanobada matamatana ai mauri hanaihanai ita abia diba. Unai nega ai, mai lalona bona kudouna goevana ida Iehova do ita hesiai henia. Ela bona unai nega namona ia vara, ita abia dae momokani ita be mai iseda goada ura dikadia ita dadaraia totona bona ita abia dae diba Iehova ese ita do ia durua. Bema ita gaukara goada iseda ura dikadia ita dadaraia totona, Iehova ese ita do ia hanamoa bona do ita kwalimu!