Emu “Harihari Gauna” Gaukaralaia

Iseda tadikaka bona taihu ida ita hebou negadia ai ta ta ita hagoadaia. To gau ma haida ita karaia danu be namo. Baibel ia hahedinaraia ta ita hagoadaia karana be “harihari gauna.” (Roma 1:​11, 12) Unai dainai edena dala ai unai harihari gauna ita gaukaralaia namonamo diba?

Hereva namodia oi gaukaralaia. Hegeregere, hebou ai haere ita henia neganai, namo lasi iseda lalohadai eiava iseda mauri ai idia vara gaudia ita herevalaia momo. To, Iehova, Baibel, bona ena abidadama hesiai taudia amo ita dibaia gaudia ita herevalaia. Iseda tadikaka taihu ida ita herevahereva neganai, hereva namodia ita gwauraia diba, ta ta ita hagoadaia totona.

Emu abia hidi bona oi karaia hesiai gaukara amo haida oi hagoadaia. Hegeregere, ena be haida be edia mauri ai hekwakwanai idia davaria, to ful-taim hesiai gaukara idia karaia noho. Haida be moni gaukara idia karaia eiava idia gorere, to hanaihanai midwik ena hebou dekenai edia kahana idia karaia.

Emu hereva bona kara amo emu tadikaka bona taihu oi hagoadaia, a? Bona emu tadikaka eiava taihu edia hereva ta oi kamonai eiava edia kara ta oi itaia, unai ese oi ia hagoadaia, a?