Taunimanima be Hereva Momokani Idia Laloa Bada, A?

Oi laloa hari ia auka hereva momokani bona koikoi hereva oi diba totona, a? Hari inai negai, taunimanima be edia hemami bona idia abia dae gaudia idia laloa bada, to dahaka be momokani idia laloa bada lasi. Tanobada ibounai ai taunimanima momo idia abia dae hereva momokani be anina lasi.

Unai be lalohadai matamatana lasi. Lagani 2,000 bamona gunanai, Roma ena Gavana Pontio Pilato ese Iesu dekenai inai henanadai ia henia: “Hereva momokani be dahaka?” (Ioane 18:38) Ena be Pilato be Iesu ena haere totona ia naria lasi, to iena henanadai be mai anina bada. Baibel ese unai henanadai ia haerelaia, bona inai tanobada ai taunimanima ese idia daradaralaia hereva momokani bona hereva koikoi oi diba totona Baibel ese oi do ia durua.

Hereva momokani be ia noho, a?

Oibe. Baibel ai “hereva momokani” ena anina be hereva mai ena hamomokania gaudia bona taravatu ida ia maoro gaudia. Baibel ia gwau Iehovaa Dirava be hereva momokani ibounai ena Badina, bona ia be “kara momokani Diravana.” (Salamo 31:5) Dirava ena hereva momokani be Baibel ai idia noho, bona unai hereva momokani be diari ida ia hahegeregerea, unai ese inai tanobada ai ita ia hakaua noho.​—Salamo 43:3; Ioane 17:17.

Hereva momokani be edena bamona oi davaria diba?

Dirava ia ura lasi Baibel ena hereva ita abia dae kava. To, ia ura mai laloa namonamo ida Baibel ena hereva momokani ita tahua, to iseda hemami dekenai ita tabekau lasi. (Roma 12:1) Dirava ia ura “mai [iseda] lalona ibounai ida” ia ita dibaia bona lalokau henia. Bona ita ia hagoadaia ita sibona ese Baibel amo ita dibaia gaudia ita hamomokania totona.​—Mataio 22:37, 38; Kara 17:11.

Daika ese hereva koikoi ia hamatamaia?

Baibel ia gwau hereva koikoi be Dirava ena inai tauna ese ia hamatamaia, ia be Satani Diabolo, Baibel ese ia gwauraia “koikoi ena tamana.” (Ioane 8:44) Ia ese taunimanima ginigunadia dekenai Dirava ia gwauraia koikoi. (Genese 3:1-6, 13, 17-19; 5:5) Unai nega amo Satani be hereva koikoi ia gwauraia noho bona Dirava ena hereva momokani ia hunia.​—Apokalupo 12:9.

Dahaka dainai hari taunimanima momo idia koikoi?

Baibel ia gwau ita be “dina gabedia ai” ita noho, unai dainai Satani ese taunimanima momo ia hakaua kerere. Taunimanima momo ese hereva koikoi idia gwauraia ma haida idia hakaua kerere bona idia koidia totona. (2 Timoteo 3:1, 13) Hari inai negai danu, tomadiho momo lalonai koikoi herevadia be bada herea. Baibel ia peroveta bamona, taunimanima be “hadibaia taudia do idia abia, idia ura henia gaudia sibona idia kamonai totona” bona “hereva momokani do idia kamonai henia lasi.”​—2 Timoteo 4:3, 4.

Dahaka dainai hereva momokani be mai anina bada?

Taunimanima be ta ta idia trast henia totona, hereva momokani be mai anina bada. Bema trast be lasi, taunimanima huanai hetura karana do ia noho lasi bona taunimanina edia mauri dalana do ia namo lasi. Baibel ia gwau Dirava ia ura mai momokani ida ia ita tomadiho henia. Ia gwau: “[Dirava] idia tomadiho henia taudia ese lauma ai bona momokani ai ia idia tomadiho henia be namo.” (Ioane 4:24) Tomadiho idauidau edia koikoi herevadia ese oi ia biagua lasi totona, Baibel ena hereva momokani ese oi do ia durua dalana be inai atikol ladana “Edena Koikoi Herevadia Dainai Taunimanima be Dirava amo Idia Daudau?” ai oi duahia diba.

Dahaka dainai Dirava ia ura hereva momokani lau diba?

Dirava ena diba maoromaoro oi abia be namo, badina ia ura hahemauri do oi abia. (1 Timoteo 2:4) Bema Dirava ena taravatu maoro bona kerere dekenai oi dibaia bona badinaia neganai, emu hetura karana ia ida do ia goada. (Salamo 15:1, 2) Dirava ese Iesu be tanobada dekenai ia siaia, unai amo taunimanima be hereva momokani do idia diba. Dirava ia ura Iesu ena hahediba herevadia do ita kamonai henia.​—Mataio 17:5; Ioane 18:37.

Dirava ese koikoi karana do ia haorea, a?

Oibe. Dirava ia ura lasi taunimanima ese ma haida idia koia. Dirava ia gwauhamata koikoi herevadia idia gwauraia noho taudia be tanobada amo do ia kokia. (Salamo 5:6) Dirava ese unai ia karaia neganai, ia ese ena gwauhamata do ia hagugurua, ia gwau: “Hereva momokani ia gwauraia udu bibina be hanaihanai namo ia havaraia.”​—Aonega Herevadia 12:19