MATAMATA TAUDIA EDIA HENANADAI
Tatau Rua (o Hahine Rua) Idia Mahuta Hebou Karana be Kerere, A?
“Lau be mero neganai, lau davaria hekwakwanai badana ta be lau ura memero ida lau mahuta hebou. Lau laloa unai hemami be nega sisina sibona bona do ia ore, to ia goada.”—David, 23.
David be Keristani tauna ta bona ia ura Dirava ia hamoalea. To unai ia karaia diba bema ia be unai hemami kererena ia abia noho, a? Tatau (o hahine) idia mahuta hebou karana dekenai Dirava ena lalohadai be dahaka?
Baibel be dahaka ia hereva?
Bese idauidau taudia be lagani idia hanaia lalonai, tatau rua (o hahine rua) idia mahuta hebou karana dekenai edia lalohadai ia idau ia lao. To, Keristani taudia be taunimanima edia lalohadai eiava ‘hadibaia hereva ese idia doria lao doria mai’ lasi. (Efeso 4:14) To, tatau (o hahine) idia mahuta hebou karana dekenai (bona kara ma haida dekenai danu), Keristani taudia be Baibel ena kara maoromaoro taravatu idia badinaia.
Baibel ena taravatu be ia hedinarai goevagoeva, ia gwau:
“Namo lasi tau ta ida oi mahuta hebou, hahine ida oi mahuta hebou hegeregerena.”—Levitiko 18:22.
“Edia kudouna ena ura hegeregerena, . . . Dirava ese idia ia rakatania, hemarai kara dikadia idia karaia edia matabodaga urana idia hagugurua totona. Edia hahine be tatau ida mahuta hebou karana idia laloa lasi, to idia ura hahine ida hemarai karadia idia karaia.”—Roma 1:24, 26.
“Umui sibona do umui koia lasi: Matabodaga taudia, kaivakuku tomadiho henia taudia, heudahanai taudia, hahine edia kara bamona idia karaia tatau, tatau ida idia mahuta hebou tatau, henaohenao taudia, mataganigani taudia, kekero momo taudia, hereva dika taudia, bona koikoi dalanai kohu idia abia taudia be Dirava ena Basileia do idia abia lasi.”—1 Korinto 6:9, 10.
Momokani, Dirava ena kara maoromaoro taravatu be taunimanima ibounai ese idia badinaia be namo, herevana tau ena ura be hahine ida ia mahuta hebou, eiava tatau ida ia mahuta hebou urana ia abia. Hereva badana be inai: Ibounai ese Dirava ia inai henia karadia dekenai edia ura idia biagua be namo.—Kolose 3:5.
Unai ena anina be . . . ?
Unai ena anina be Baibel ia gwau tatau be tatau ida idia mahuta hebou taudia ita inai henia, a?
Lasi. Hereva badana be inai, Baibel ese tatau ida ia mahuta hebou tauna, o hahine ida ia mahuta hebou tauna inai henia karana ia gwauraia lasi. Baibel ia gwau, herevana taunimanima be edena mauri dalana idia badinaia, to namona be ita “gaukara goada taunimanima ibounai ida maino ai [ita] noho totona.” (Heberu 12:14) Unai dainai, tatau be tatau ida ia mahuta hebou tauna gwauraia dika, kara dika henia, eiava hadikaia karana be taravatu.
Unai ena anina be Keristani taudia ese tatau rua (o hahine rua) idia headava ena taravatu idia koua be maoro, a?
Baibel ia hahedinaraia Dirava ena taravatu ia gwau headava lalonai be tau tamona bona hahine tamona do idia noho. (Mataio 19:4-6) To, taunimanima idia hebou bona tatau rua (o hahine rua) idia headava totona gavamani amo gwaumaoro taravatu idia noia karana be politikol karana ta. Unai hebou ai idia ese taunimanima idia doria lasi kara maoromaoro taravatu idia badinaia totona. Baibel ese Keristani taudia ia hamaoroa politikol karadia lalonai do idia vareai lasi. (Ioane 18:36) Unai dainai, gavamani ese tatau rua (o hahine rua) idia headava totona gwaumaoro taravatu idia karaia neganai, Keristani taudia be unai idia abia dae lasi, to idia koua lasi danu.
To edena bamona bema . . . ?
To edena bamona bema hari tau ta be tatau ida ia mahuta hebou? Iena kara ia haidaua diba, a?
Oibe, apostolo edia negai unai bamona idia karaia! Baibel ia gwau tatau rua idia mahuta hebou taudia be Dirava ena Basileia lalonai do idia vareai lasi murinai, ia gwau: “Guna umui haida be unai bamona.”—1 Korinto 6:11.
Unai ena anina be guna tatau be tatau ida idia mahuta hebou taudia be unai ura do idia abia lou lasi, a? Lasi. Baibel ia gwau: “Mauri matamata be dabua bamona do umui atoa, ia be diba maoromaoro amo ia vara bona ia matamata ia lao noho.” (Kolose 3:10) Senisi be hanaihanai do ita karaia noho.
To edena bamona bema ia ura Dirava ena taravatu ia badinaia tauna be tatau ida mahuta hebou urana ia do abia noho?
Ita abia ura ma haida hegeregerena, tau ta be disisen ia karaia diba unai ura ia koua totona. Edena dala ai? Baibel ia gwau: “Lauma helaga ena dala hegeregerena umui raka noho, vadaeni tauanina ena ura karana ta do umui karaia lasi.”—Galatia 5:16.
Ita itaia unai siri ia gwau lasi tau ta be tauanina ena ura do ia mamia lasi. Lasi, to Baibel ia stadilaia bona ia guriguri hanaihanai neganai, ia be goada do ia abia unai ura ia koua totona.
David, matamanai ita herevalaia tauna dekenai unai ia vara. Ia gwau iena Keristani tama sina dekenai iena hekwakwanai ia gwauraia hedinarai murinai, ia davaria unai ura ia koua diba. Ia gwau: “Unai be hegeregere egu pagana amo metau badana ta lau kokia bamona, bona lau laloa bema idia lau hamaoroa haraga, sedira egu mero negana be lau moalelaia.”
Dokonai, iseda mauri ita senisia bona Dirava ena taravatu ita badinaia neganai, do ita moale. Ita abia dae unai taravatu ‘be maoromaoro, bona ta ena kudouna ia hamoalea,’ danu ita “badinaia neganai, ahuna namona [ita] abia.”—Salamo 19:8, 11.