Henia Karana Dekenai Baibel be Dahaka ia gwau?

Baibel ena haere

Baibel ese ita ia hagoadaia mai ura ida ma haida dekenai gau haida ita henia bona badina maorona dainai unai ita karaia be namo. Unai bamona henia karana ese ia hahedinaraia, henia tauna bona harihari gauna ia abia tauna idia moale. (Aonega Herevadia 11:25; Luka 6:38) Iesu ia gwau: “Henia kara ena moale be bada, to abia kara ena moale be maragi.”—Kara 20:35.

Edena nega ai henia karana be mai ena namo?

Henia karana be mai ena namo bema mai ura ida unai ita karaia. Baibel ia gwau: “Namona be ta ta ese edia kudouna ai idia laloa vadaeni gauna hegeregerena do idia henia. Namo lasi mai lalohisihisi ida eiava ta ese ia doria dainai idia henia, badina mai moale ida ia henia tauna be Dirava ese ia lalokau henia.”—2 Korinto 9:7.

Mai kudouna ibounai ida henia karana be iseda“tomadiho dalana” ta bona Dirava ese ia abia dae. (Iamesi 1:27) Dabu taudia dekenai heduru ia henia tauna be Dirava ia hamoalea, mai ura ida hariharibada karana ia hahedinaraia neganai, ia be Dirava dekenai ia henitorehai bamona. (Aonega Herevadia 19:17) Baibel ese ia hahedinaraia Dirava sibona ese unai tauna ena davana do ia henia.—Luka 14:12-14.

Edena nega ai henia karana ese Dirava ia hamoalea lasi?

Bema badina kererena dainai unai ita karaia. Haheitalai haida be:

Ma haida ese ita idia hanamoa totona.—Mataio 6:2.
Davana abia lou totona.—Luka 14:12-14.
Mauri hanaihanai abia totona moni idia henia.—Salamo 49:6, 7.

Bema ita karaia gaudia eiava kara be Dirava ia inai henia. Hegeregere, ta dekenai moni ita henia kasi gadara, drag abia karana eiava alkahol inua totona, be kerere. (1 Korinto 6:9, 10; 2 Korinto 7:1) Unai hegeregerena, bema ta be ia gaukara diba sibona ia naria totona, to ia ura lasi unai ia karaia—ia maoro lasi moni ita henia.—2 Tesalonika 3:10.

Bema haida ita durua totona nega bada ita henia, to iseda ruma bese taudia ita laloa lasi. Baibel ese ia hahedinaraia ruma bese kwarana ese ena ruma bese taudia ia naria be namo. (1 Timoteo 5:8) Namo lasi ruma bese kwarana be ena nega bada ia henia haida durua totona, to ena ruma bese taudia ia durua lasi. Unai hegeregerena, ena tama sina burukadia ia durua lasi tauna be Iesu ese ia gwauraia dika, badina ia gwau ia dekenai idia noho gaudia be “Dirava dekenai ia gwauhamatalaia vadaeni harihari gauna.”—Mareko 7:9-13.

Henia karana idia herevalaia Baibel siridia

Aonega Herevadia 11:25: “Hariharibada tauna ena gaudia be do idia momo, bona ma haida dekenai ranu ia henia tauna dekenai ranu do idia henia.”

Anina be: Henia karana ese abia tauna bona henia tauna dekenai namo do ia havaraia.

Aonega Herevadia 19:17: “Dabu tauna dekenai hebogahisi ia hahedinaraia tauna be Iehova dekenai ia henitorehai, bona ia karaia gaudia dainai Dirava ese davana namona do ia henia.”

Anina be: Dirava ia gwauhamata, dabu taudia ia durua tauna ena davana do ia henia.

Mataio 6:2: “Harihari gaudia umui henia neganai, namo lasi kibi umui hiriria guna, koikoi taudia ese . . . idia karaia bamona, unai amo taunimanima ese do idia hanamodia.”

Anina be: Namo lasi haida dekenai harihari gaudia ita henia ita idia hanamoa totona.

Kara 20:35: “Henia kara ena moale be bada, to abia kara ena moale be maragi.”

Anina be: Mai kudouna ibounai ida henia karana ese moale ia havaraia.

2 Korinto 9:7: “Namona be ta ta ese edia kudouna ai idia laloa vadaeni gauna hegeregerena do idia henia. Namo lasi mai lalohisihisi ida eiava ta ese ia doria dainai idia henia, badina mai moale ida ia henia tauna be Dirava ese ia lalokau henia.”

Anina be: Mai ura ida henia karana ese Dirava ia hamoalea.