Hereva Momokani ese Lau Ia Ruhaia

EGU TAMANA ia mase neganai egu lagani be 7 sibona, bona lauegu sinana madi, ese ai ibounai 6 ia naria. Johannesburg ena siti, South Africa dekenai ai tubu daekau. Lau mero neganai, lau ura lasi memero kekeni haida ida lau hebamo. Lau hemarai bada badina, egu malana ia metau dainai lau hereva namonamo diba lasi.

To unai ese lau ia durua ma gau haida lau karaia namonamo diba totona. Sikuli dekenai sivarai torea karana dekenai aiemai klas dekenai namba wan gabuna lau abia. Bona ena be egu malana ia metau, to ane lau abia namonamo diba. Ruma dekenai, nega bada lau haorea egu daiutu ai gitara lau hataia bona ane lau abia totona.

Daudau lasi murinai, miusik lau ura henia bada. Lau ura dikadika rok miusik idia karaia taudia danu lau gadara, bona unai ese egu sikuli gaukara ia hadikaia. Vadaeni, egu sikuli kosi lau haorea lasi, sikuli lau rakatania. Miusik gadaralaia orea ta lau haginia bona kahirakahira Saturday bona Sunday iboudiai Johannesburg ena siti ena gabu idauidau dekenai miusik ai gadaralaia. Nega daudau lasi murinai, egu huina ia lata, bona kekero muramura lau inua momo.

Lau laloatao wiki haida lalonai, Johannesburg ena inuinu bona mavaru gabuna ta dekenai miusik ai gadaralaia. Unuseniai ia gaukara hahine ta, mai ena hairai danu ese lau ia ura henia bona nega ibounai kekero muramura ia hoia lau totona. Toana be ia be hahine badina hahine edia dabua ia karaia, to lau davaria ia be tau neganai egu hemami be ia dika! Oibe, tatau ese tatau ida idia mahuta hebou taudia be unai gabu dekenai idia mai. Unai gabu dekenai ai gaukara ena nega be 9 okoloko hanuaboi ia lao 5 okoloko dabai, wiki ta ta iboudiai dina 6 ai gaukara totona ai ese drag dikadia ai ania.

Lagani ima idia lao vadaeni miusik orea ida lau gadara, to gau ta ia vara dainai lau ese tomadiho karana lau lalohadailaia bada. Katolik fada ta ese ai ia boiria dubu dekenai memero kekeni edia orea ta totona ai gadara. Memero kekeni 500 idia mai, bona unai Katolik fada ese vareai monina ia gogoa. Ai ese miusik dikadia ai gadaralaia, bona memero kekeni momo be idia inuinu kekero. To memero kekeni haida ese egu lalona idia veria. Idia ese mavaru gabuna ena foloa latanai idia helai hegege bona drag idia hariharilaidia. Unai lau itaia neganai, Dirava be momokani ia noho eiava lasi lau daradaralaia hamatamaia.

Dirava ia Noho, A?

Unai hereva ena haere lau tahua totona, lau ese Seventh-Day Adventist dubu dekenai lau lao, Metodist dubu, Katolik, bona ma dubu haida dekenai lau lao. To lau idia durua lasi dainai idia lau rakatania. Sunday hanuaboi ta disko gabuna dekenai ia vara gauna ese egu daradara ia hamomokania. Unai gabu dekenai diari idia hamaragia, bona miusik ena regena be bada herea, muramura auka hoia gabuna dekenai ia gaukara tauna lau itaia, ia be Katolik fada tauna. Ia ese piripou aukana (jeans) ia karaia, sieti ia karaia lasi to singlesi bamona dabua ia atoa bona ena kemena ia hedinarai bona korosi badana ena aiona dekenai ia atoa danu, Iesu ena laulau danu ia karaia ena aiona dekenai. Ai laloa ia be ai bamona, bona ai boiria hippie fada.

Buddha tomadiho lau ura henia bona Buddha ena kaivakuku maragina ta lau hoia, bona egu daiutu lalonai, bedi kahirakahira dekenai lau atoa. Dina ibounai ia varanai lau tui diho bona lau gwau, “Buddha e, mani emu kara lau oi durua.” Lau abia dae gauna ta be, taunimanima be mai edia lauma ta, ia mase diba lasi bona ia be siliva varona ta amo taunimanima edia tauanina dekenai idia kwatua, bona unai mase diba lasi laumana amo, ena ura hegeregerena gabu ibounai dekenai ia roho lao diba.

Emai miusik lalonai ia mase diba lasi soulina ena koikoi herevana ai anelaia danu. (Kohelete 9:​5,10; Esekiel 18:⁠4 itaia danu.) Drag lau ania lalonai miusik lau torea hamatamaia. Miusik orea taudia ese egu miusik idia dibaia, bena ai ese unai miusik be kaset dekenai ai rekodi. Unai kaset ia heau ena nega be hora rua bona ena ane momo ese ia mase diba lasi soulina ia loaloa karana idia herevalaia. Ane ta be Satana ia gwauraia; unai ane lalonai idia gwau Diabolo ena siahu be Dirava ena siahu ia hanaia.

Lau ese babalau karana lau laloa momo bona drag dikana lau ania dainai lau nihi momo bona unai ese lau ia hadikaia momokani. Hanuaboi lalonai lau noga bona dibura gaudia haida lau itadia idia loaloa egu daiutu lalonai. Hanuaboi ta lau gari bada herea dainai egu imana idia mase bamona, bona gau dikana ta be lau dekenai ia mai noho to lau marere diba lasi. Ma nega ta, bedi dekenai lau hekure noho lalonai gau idauidau be egu daiutu lalonai idia hedinarai kava. Lau ura dikadika unai kara amo lau heau oho.

Lauegu Mauri Ia Haidaua Dinana

Unai nega lalonai, egu kakana Charles bona ena adavana, Lorraine, be Iehova ena Witness taudia ai idia lao. Friday hanuaboi momo lau inuinu kekero dainai Saturday dabai mai kwara hisihisi danu lau noga neganai, nega momo pepapepa maragina ta lau davaria egu bedi badinai. Unai pepapepa dekenai Charles ese, egu mauri idia herevalaia dika Bible siri haida ia toredia.

Bena Sunday ta ai, Charles bona Lorraine ese lau idia boiria idia danu Bible drama ta ai lao itaia totona, unai drama be Iehova ena Witness taudia ese idia gadaralaia edia distrik hebouhebou Pretoria dekenai. Unai drama lau ura itaia dainai, lau lao. Lau hoa bada miro lasi taudia hutuma bada herea lau itaia dainai! Ena be idia herevalaia gaudia momo herea lau lalo-pararalaidia lasi, to unai dina lau moalelaia bada. Charles ena turadia lau hedavari henia neganai, ena be lauegu huina be lata bona lau hahedokilaia dabua be namo lasi, to lau idia abia dae karana ese lauegu lalona ia veria Witness tauna ta ida Bible stadi do ai karaia totona.

Murina wiki ai, miusik praktis totona lau lao lasi, to Iehova ena Witness taudia edia Kingdom Hall dekenai lau lao hebou totona. Unai wiki dokonai, lauegu lalona lau hadaia dainai miusik orea lau rakatania bona egu miusik gadaralaia kohu lau hoihoilaia. Miusik orea ai hadokoa murinai, hereva ai hatamonaia lau ese ai rekodi kaset teipi do lau abia, badina ane momo be lau ese lau toredia dainai. Lau ura dikadika unai ane edia kaset lau dogoatao noho. Unai neganai, egu acoustic gitara lau dogoatao bona hahediba koikoi herevadia ena miusik, drag lau ania lalonai lau torea gauna, lau do gadaralaia noho.

Bible lau stadilaia noho bona Keristen heboudia ai lau lao neganai, Dirava ena ura lau lalo-pararalaia noho. Lau lalo-parara Dirava hamoalea totona, hebou dekenai lau haere bona Iehova ena Witness tauna ta bamona sivarai namona harorolaia totona ruma ta ruma ta gaukara lalonai do lau vareai. (Kara 5:42; Roma 10:10) Unai gaukara lau laloa neganai, lau gari dikadika. Lauegu malana be ia metau bada dainai lau hereva diba lasi, bona haida ese lau totona idia hereva.

Egu Malana Ia Metau to Lau Ia Koua Lasi

Hebou dekenai lau lao neganai, sibogu dekenai lau hereva, ‘Haida bamona lau haere diba be namo.’ Gabeai haere lau henia, to lau hekwarahi bada momokani unai haere lau herevalaia totona! Hebou ia ore murinai, momo idia mai bona lau idia hanamoa. Egu mamina be bolo gadara lalonai ta ese golo ia atoa bamona. Lau ese lalokau momokani ena mamia lau abia matamaia, unai be Keristen korikori ena toana.​—⁠Ioane 13:35.

Lau hanaia gauna ma ta ia mai, Haroro School dekenai lau vareai, bona orea maragina vairanai Bible duahiduahi lau henia neganai, egu malana ia metau bada dainai egu hereva ena nega lau hanaia. Hebou ia ore murinai sikuli naria tauna ese sisiba namona ia henia lau dekenai. Ia gwau namona be duahiduahi lau praktis neganai namona be gado bada amo lau karaia. Unai lau karaia, dina ta ta iboudiai nega lau atoa Bible bona Gima Kohorona be gado bada amo lau duahiduahi totona. Haroro School amo goada lau abia bona unai ese lau ia durua taunimanima idauidau lau hereva henidia, ruma ta ruma ta haroro gaukara lalonai. Lagani 1973, October lalonai egu gwauhamata Iehova Dirava dekenai lau hahedinaraia bapatiso amo.

Kara Gunana Lau Rakatania Momokani

To, Keristen dalanai lau be do goada lasi. Haheitalai ta be inai, Sunday ai keru dinana lalonai, ruma ta ruma ta haroro gaukara murinai, egu motuka lalonai lau vareai bona uindo lau koudia. Dina ena siahu lau moalelaia noho lalonai, lau karaia miusik ena kaset lau kamonai henia. Unai nega lalonai, lau ese taihu namo hereana ta, ia be nega ibounai pioneer gaukara ia karaia kekenina lau tura henia, ena ladana be, Debbie. Nega ta, unai miusik kaset lau kamonai henia noho lalonai, Debbie ese motuka dekenai ia raka mai, kara haraga kaset lau koua. Lauegu kudouna lalonai, lau diba unai miusik be Keristen taudia edia lasi.

Debbie bona lau ai headava murinai, hekwakwanai idia vara. Nega momo hanuaboi lalonai lau noga, lau heudeheude bona varahu ia diho. Nihi dikadia lau abia, hegeregere, demoni ese lau idia lulua bona rara sinavai lalonai lau nahu noho. Unai demoni ese lau idia hahekwarahia huadia lalonai, madi lauegu adavana be ia moale lasi. Ena be Debbie ese egu miusik ena ania ia diba lasi, to ia diba unai miusik ese lau dekenai dika ia havaraia bona ena lalohadai be lau ia hamaoroa. To lau kamonai lasi, lau gwau: “Inai kaset teipi be lau danu do ia noho ela bona hanaihanai badina unai be guna lau gadaralaia miusik lau laloa.”

Ai be gau momo dainai ai hepapahuahu bona nega momo egu hahine lau lolo henia. Ai heai momo dainai, Debbie ese dala maoronai kongregesen ena elda taudia amo heduru ia tahua. Nega haida elda ta ese ai ia vadivadi henia ai ia durua totona, to elda ese ruma ia rakatania murinai, Debbie dekenai lau badu henia lou. Lau ura lasi heduru badina lau hekokoroku bada dainai, bona lau gwau: “Dahaka dainai elda taudia dekenai oi lao bona oi hereva henidia, a? Unai be lauegu maduna. Lau be ruma bese ena kwarana.” Oibe, egu lalohadai ruma bese kwarana ena gaukara dekenai ia kerere. Vadaeni, unai nega lalonai lau badu bona dina haida lalonai ia lau hereva henia lasi. Hari lau lalo-parara unai ia karaia badina ia ura ena headava ia namo bona ena adavana ia durua totona.

Vadaeni, hanuaboi ta Debbie ese elda ta dekenai egu gitara gadaralaia karana bona lau kamonai henia miusik ia herevalaia. Unai dainai, elda ta ia mai bona nega daudau herea ai ruaosi ai hereva hereva. Lau do laloatao, lau ia hamaoroa, ia gwau: “Oi laloa emu ruma dekenai gau ta ia noho dainai hekwakwanai umui davaria, a?” Unai neganai lau ese egu miusik kaset teipi lau herevalaia ia dekenai, bona lau hamaoroa, miusik kaset teipi lau do dogoatao noho karana ese egu lalona ena mamina ia hadikaia.​—⁠1 Timoteo 1:​5, 19.

Unai hanuaboi lalonai, elda ia lao murinai, egu lalona lau hadaia kaset teipi lau negea totona. Debbie bona lau ese ai abia lao ruma murinai, ai gabua gwauraia, to ai gabua diba lasi. Unai dainai guri ai geia bona ai guria. Egu gitara danu lau hoihoilaia. Sibogu lau laloa: ‘Bema lau ura miusik dikana amo lau siri, namona gau ibounai lau negea.’ Vadaeni hoa dalanai, nihi dikadia lau abia lou lasi. Unai nega amo, emai headava ia namo ia lao.

Pablik Tok Henia Totona Lau Hekwarahi

Ena be Haroro School amo heduru momo lau abia, to egu malana ia do metau bona lau hereva namonamo be ia do auka. Lau ura kongregesen lalonai hereva ta lau henia bona egu malana ia metau lasi. Debbie ia laloa heduru lau abia totona malana metau hanamoa toho doketa ta dekenai lau lao be namo. Ena hereva lau abia dae bena hua 4 lalonai wiki iboudiai dekenai dina ta ai doketa lau itaia. Doketa ena hereva bona sisiba namodia Iehova ena orea amo lau gaukaralaia hebou, bona unai ese lau ia durua egu pablik tok idia namo idia lao totona.

Lagani 1976 lalonai, lau idia abia hidi bona elda dagina lau abia emai kongregesen lalonai. Hua rua murinai, nega ginigunana miniti 45 pablik tok lau henia. Lagani haida murinai, sekit hebouhebou dekenai egu tok ginigunana lau henia. Vadaeni kahirakahira sekit hebouhebou iboudiai dekenai tok ta lau idia henia lau karaia totona. Ela bona December 1990 lalonai, lau be mai egu ekspiriens pablik tok lau henia totona. Lau moale bada badina Iehova ena Witness taudia edia “Gado Goevadaena” Distrik Hebouhebou Johannesburg dekenai, English ena kahana dekenai, lau ese miniti 20 lalonai Keristen ruma bese ena hereva ta lau henia taunimanima 4,000 mai kahana dekenai.

Lauegu malana ia metau dainai hereva hanamoa dalana lau do hekwarahilaia noho. Bema lau hekwarahi noho lasi, unai dika do ia vara lou, bona unai ia vara neganai, lau hekwarahi bada hanamoa totona. Nega haida, egu malana ia metau bada, to Iehova dekenai lau tabekau be heduru bada. Tok lau henia totona platfom dekenai lau raka daekau neganai, Iehova lau guriguri henia, lau ia durua lau gari lasi totona bona egu hereva lau henia namonamo totona. Nega ibounai tok lau henia murinai, mai manau ida Iehova lau tanikiu henia lau karaia diba totona.

Lau bona Debbie be hahenamo rua danu ai abia, emai natudia rua Pendray ena lagani be 15 bona Kyle ena lagani be 11. Emai ruma bese taudia be ruma ta ruma ta haroro gaukara dekenai moale bada idia davaria. Pendray bona Kyle ese unai gaukara idia goadalaia dainai lau bona Debbie ia hagoadaia bada.

Lauegu kara gunana lau laloa lou neganai, lau moale bona lau sori bada danu. Lau sori badina lauegu miusik dikana ese ma haida ia hadikaia, to lau moale badina hereva momokani lau davaria, miusik gadaralaia karana lau hadokoa, bona malana metau ena hekwakwanai lau hanaia dainai. Nega momo Iesu ena hereva ena aposetolo taudia dekenai lau laloa, ia gwau: “Hereva momokani be do umui diba, bona hereva momokani ese umui do ia ruhaia.” (Ioane 8:32) Iehova ena lalokau bada dainai unai siri be ia momokani lau dekenai, lau ese moale lau davaria egu mauri lalonai.​—⁠William Jordaan ese ena sivarai ia gwauraia.

[Pictures on page 26]

Debbie bona William Jordaan hari inai negai

Lauegu malana ia metau dainai hereva hereva dalana hanamoa totona lau do hekwarahi noho