Tadikaka Lasi Gabunai Lau Noho to Egu Mauri be Mai Ena Anina

LAU BE January 1927 ai, Spain ena gabu ta, ladana Málaga, dekenai lau vara, emai bese natudia be 7, lau be natu namba 6 bona ai be ogogami Katolik taudia. Lagani 1936 ia lao 1939 lalodiai, Spain ai tuari ia vara neganai bomu amo ai heau mauri bona ami ese idia haria aniani ai ania. To nega ibounai egu mauri lau moalelaia, ane abia kara lau ura henia bada bona taunimanima huanai lau noho neganai lau moale.

To gau ta ese lau ia hagaria hanaihanai​—⁠hel ena lahi ese lau do ia araia hahedibana. Unai bamona lau gari dainai egu lagani be 12 neganai convent ta ai lau vareai. Unuseniai, kahirakahira lagani toi lalonai lau ese marble nadi amo idia karaia vadavada lau hagoevaia, bona lau guriguri, bona ma lau hagoevaia loulou, to egu lalona be ia hegeregere lasi. Lagani 1941 ia ginidae neganai mai moale danu unai gabu lau rakatania.

Lagani haida muridiai lau ese ane abia momo turana ta lau davaria, bona ia laloa lauegu gadona amo moni momo do lau davaria diba dainai lau ia hagoadaia ane abi bona piano gadaralaia sikuli lau lao henia. Tanobada Ibounai Tuarina Iharuana be lagani 1945 ai ia doko neganai, lau be Morocco ena gabu ladadia Casablanca bona Tangier dekenai pati bona mavaru gabudiai ane lau abia. Lagani 18 bamona ia abia kekenina dekenai unai be mauri dala namona. To nega ibounai gadara ta ta murinai lau lao dubu dekenai bona Virgin Mary lau noia egu dika ia gwauatao badina lau ura lasi hel ena lahi ai do lau mase.

Unai pati bona mavaru klab dekenai lagani 9 lau gaukara murinai, America tau ta, ladana Jack Abernathy, danu lau hedavari. Ia be ena ruma haginia kampani ena gaukara ia karaia Morocco dekenai. Unai lagani lalonai ai headava bona unai neganai danu ane abia karana lau hadokoa. Morocco ai rakatania bona ai lao Spain ena gabu ta, ladana Seville, dekenai bona unuseni ai noho ia lao bona lagani 1960. Unai murinai California, U.S.A. ai, gabu ta ladana Lodi, dekenai ai lao​—⁠unai gabu dekenai egu mauri do ia haidaua vaitani gauna ta ia vara.

Iehova Lau Dibaia

Lagani 1961 ai Iehova ena Witness hahine rua ese ai idia vadivadi henia bena Gima Kohorona bona Noga! magasin haida idia henia ai dekenai. Gabeai idia giroa mai neganai idia ura lau idia durua Baibel stadilaia totona, bena lau hadibadia lau ura. Unai murinai lau ese eda lalokau guba Tamana, Dirava momokani, Iehova, lau dibaia. (Salamo 83:18) Bona lau davaria hel be lahi gabuna lasi, to mauri hanaihanai be paradaiso lalonai do lau abia diba, unai neganai lau lalo-hekwarahi lasi bona lau moale bada herea!​—⁠Salamo 37:​9-11, 29; Apokalupo 21:​3, 4.

Egu tadina kekeni, Paquita, ena noho gabu be ia daudau lasi aiemai gabu amo, danu ese stadi ia hamatamaia. Guna, kuku lau ania bona lau ura dikadika lau pati hanaihanai. Bona lau badu kava badu kava momo! To egu mauri lau haidaua bona October 17, 1962 ai, Paquita bona lau be Sacramento, California, dekenai bapatiso amo emai gwauhamata Iehova dekenai ai hamomokania.

Spain amo Thailand Dekenai Ai Lao

Nega sisina lalonai adavagu ena kampani ese idia siaia lao Thailand dekenai gaukara totona, bona lau danu ia abia lao. Spain dekenai ai lao guna, bona lau ginidae neganai egu bese taudia dekenai lau abia dae hereva lau kikilaia. Egu taihuna adavana, Pura, be ia kamonai namonamo bona Witness ta ai ia lao.

Unai nega lalonai Spain tano ai Iehova ena Witness taudia edia gaukara ai be taravatu idia atoa. To hehuni dala ai daiutu maragi ta lalonai ai hebou, helai gaudia be lasi to teibol tamona sibona. Hebou taudia 20 ibounai be hanaihanai ai gini. Unai be idau momokani emai hebou karana California amo. Egu tano taudia ese hebou idia atoa guna edia namo be gabeai lau itaia neganai, lau lalo-parara momokani Keristen hebou be anina bada gauna ta, bona unai kara ese lau ia hahegaegaea Bangkok bona Thailand totona.

Bangkok dekenai ai ginidae dinanai Jack ese lau ia hamaoroa, “Bema haroro gaukara oi karaia lalonai lau davarimu, oi do lau rakatania.” Dina iharuanai ia lao gaukara gabuna, unai be gunika gabu ta dekenai, ruma dekenai be lau bona ruma ai ia gaukara kekeni sibona ai noho, bona unai kekeni be edia gado sibona ia diba. Vadaeni, nega bada ia noho kava dainai Baibel ena buka bona magasin lau stadilaia loulou.

September 1963 dinana ta ai, ruma dekenai lau giroa mai neganai hahine ta ena tamaka lau itaia iduara badinai. Ruma lalonai hui kurokuro nao hahine ta be lau ia naria noho. Ia lau nanadaia, “Edena bamona?”

Ia gwau, “Lau be Watch Tower Society totona lau gaukara.”

Mai moale danu lau roho bona lau rosia bena lau harahua. Eva Hiebert be Canada amo idia siaia misinari ta. Ena be PMV idaudia toi dekenai ia guia, to unai dina amo Eva be nega ibounai ia mai ai dekenai. Unai PMV lalonai taunimanima momo idia guia gwarume be tin lalonai idia guia bamona bona lau gari, to lau loaloa dala tamona be unai. Eva ese lau ia hamaoroa: “Bema unai PMV ai oi guia lasi neganai Iehova ena ura do oi karaia diba lasi.” Vadaeni, ia ese hebou lao henia totona PMV abia dalana lau ia hadibaia.

Gado lau diba lasi dainai haroro gaukara be lau daradaralaia sisina. Lau be mai gari danu Eva ena imana, basket, o dabua lau dogoatao bona ia be inai bamona lau ia hereva henia, “Inai dala amo Iehova ena ura do oi hagugurua diba lasi.”

Lau boiboi: “To gado lau diba lasi.”

Eva ese magasin 10 ia atoa egu imana ai bona sibogu ia rakatania maketi lalonai. Mai gari danu China hahine ta dekenai magasin lau hahedinaraia bona ia abia.

Gabeai mai moale danu lau boiboi, “Eva, magasin 10 ibounai lau hariharilaidia.” Bena ia gwau, “Iehova ese oi bamona taudia ia ura henia. Unai bamona oi karaia hanaihanai.” Unai murinai Thailand gado ai hahenamo herevadia lau gwauraia, bona idia karaia bamona lau danu tano dekenai lau helai diho. Bona lau sibona lau loaloa gabu idauidau dekenai. Egu adavana ena lalohadai be dahaka? Guna lauegu tomadiho ia ura lasi to gabeai ena lalona ia haidaua; nega ta, ena turadia haida idia vadivadi bona ia hamaorodia, ia gwau: “Pepita ese umui do ia loalaia. Ena haroro gaukara amo gabu momo ia diba.”

Ai Lao Australia Dekenai

Eva be mai ena lalokau bada danu lau ia hadibaia dainai unai ese lau ia hahegaegaea Iehova ena orea ai do lau gaukara goadagoada egu adavana ena gaukara gabu matamata, northwest Australia dekenai. Lagani 1965 huanai unai gabu dekenai ai ginidae, bona Jack ena kampani be tano gagaena ai train edia heau dala idia karaia bona ai be gaukara taudia edia kamepa dekenai ai noho. Dina ena siahu be bada herea, 43 degrees Celsius ia hanaia, bona emai aniani be peleini amo idia mailaia. Kamepa lalonai North America amo idia mai ruma bese ibounai be 21 bona idia dekenai Basileia sivaraina lau harorolaia hamatamaia. Train ena heau dala idia karaia bena taunimanima idia lao lasi gabudia dekenai ia vareai ia lao neganai kamepa danu nega tamona ia lao.

Lau mai guna neganai Iehova ena Witness taudia edia branch opesi Australia dekenai revareva ta lau siaia bona lau moale dikadika edia haere lau davaria neganai, ia gwau: “Emai lalokau bona hahenamo ai siaia . . . Vaira huadia lalodiai ai be oi danu lauma dalanai, bona oi totona do ai guriguri hanaihanai.” Egu adavana ia gaukara loaloa gabudiai, hegeregere taunimanima idia lao lasi gabudia dekenai, Iehova ena orea amo unai bamona revareva lau davaria neganai goada bada lau abia. Io, ena be nega momo gabu momo ai Witness tauna be lau sibona bona unai dainai lau moale lasi, to unai bamona revareva lau duahidia neganai lau ia hagoadaia do lau lao haroro totona.

Australia ena branch opesi ese Witness tadikaka ta mai adavana danu idia siaia pura ta do idia noho aiemai kamepa dekenai. Haroro gaukara lalonai ai ese gabu daudau dekenai ia noho hahine ta ai davaria bona pura tamona lalonai nega rua aena amo lau raka lao iena gabu ai, bona unai gabu be gaigai bona ariha ese ia hahonua. Dalai lau raka lao neganai Basileia ane ta, “Iehova ena/kahai oi gini/ena diari ai/raka goada” lau abia. Hua ibounai 11 lalonai ai stadi.

Melbourne dekenai lagani ta ai noho murinai adavagu idia siaia lao northwest Australia ena gabu ta ladana Port Hedland badinai kamepana ta dekenai. Dina 5 murinai emai vadivadi taudia idia ginidae. Branch opesi ese tadikaka idia hadibadia lauegu noho gabuna. Lau idia rakatania murinai lau sibona ese Buka Stadi, Haroro Sikuli, Hesiai Hebou bona Gima Kohorona heboudia lau hakaudia. Ane lau abia, guriguri lau karaia, haere lau henia bena murinai hebou koua ane lau abia bona guriguri lau karaia. Hebou dekenai lao taudia duahia be auka lasi​—⁠nega ibounai lau sibona. Ena be gabu daudau dekenai lau noho to unai bamona pura ta ta ena hebou karana ese lau ia hagoadaia Iehova ena ura do lau karaia totona.

Bougainville Dekenai

Lagani hani Australia ena siahu ai mamia murinai, lagani 1969 ai, egu adavana be idia siaia lao copper mine ena dala do idia karaia Bougainville motumotu dekenai. Adorahi ta ai, ta ia pidipidi iduara dekenai. Jack ese iduara ia kehoa bona ia gwau: “Witness tauna ta mai adavana bona edia natudia hani danu idia mai.” Unai bese be kone kahanai idia noho. Pura ta ta iboudiai lalonai dina ta lau vadivadi henidia bona Gima Kohorona stadi ai abia edia hanua sikuli dekenai.

Ma nega ta ai Papua New Guinea amo Witness taudia toi ese lau idia vadivadi henia. Egu adavana be mai heagi danu ena turadia ia hamaorodia: “Egu advana ia lao gabudia iboudiai dekenai ena Witness turadia be ia idia naria.”

Ai Lao Africa

Lagani 1972 ai North Africa ena gabu ta, ladana Algeria, dekenai ai lao, badina Jack ena kampani be biru durua totona ranu do ia heau namonamo dala idia karaia. Unai gaukara ena daudau be lagani hani. France ena branch opesi lau tore henidia haroro gaukara totona neganai idia be inai bamona idia haere: ‘Iseda gaukara idia taravatua dainai gau badana be oi naria namonamo.’ Society ese lau idia durua lauma dalanai idia manoka taihu rua lau davaria bona stadi grup ta ai karaia.

Kamepa ai ia noho hahine ta, ladana Cecilia, be ia gorere bona hosipele dekenai ia vareai neganai, dina iboudiai lau vadivadi henia supu lau henia bona ena bedi lau karaia namonamo. Ia raka lasi neganai ena gaukara o ura maragimaragi ibounai lau karaia, bona danu Basileia ese do ia mailaia helaro namona lau hadibaia. Unai amo Baibel stadi ai hamatamaia bona hua 8 murinai Cecilia be lau dekenai inai bamona ia hereva: “Lau ura bapatiso lau abia.” To edeseni, bona daika ese do ia habapatisoa?

France ena branch opesi ese revareva amo ai idia hadibaia tadikaka ta, ladana François, be Algeria dekenai do ia holide nega sisina. Bema ai haraga neganai sedira do ai mailaia haraga emai hanua maragi dekenai bona bapatiso ia karaia diba bena ma ai abia lou airport dekenai. Hora 24 sibona emai gabu dekenai ia laga-ani diba bena ma ia roho siri.

François be peleini amo ia diho, motuka dekenai ia guia bona maoromaoro ai abia lao aiemai tano gagaena dekenai. Unai hanuaboi ai, Cecilia ena ruma dekenai, François be ena siedi poketi amo pepapepa ta ia abia bona tok namona ta ia henia. May 18, 1974 ena daba ai Cecilia be lauegu digu gabuna dekenai ia habapatisoa, bena unai murinai tadikaka ese ai ia rakatania.

Lagani 1975 ena dokonai, Algeria ai tuari ia vara, bona Jack bona lau be unai gabu amo ai heau siri. Lau lao Spain dekenai egu varavara lau vadivadi henidia totona. Lagani 1976 ia ginidae neganai, kohu ma lau haboua Jack ena gaukara matamata dekenai ai lao totona​—⁠gabuna be South America ai medu ia diho momo gabu, ladana Suriname.

South America Dekenai

Gaukara gabuna korikori be Suriname ena diho kahanai, bona kamepa be au huahua bona tubutubu gaudia ese idia gegea. Regerege momo manudia bona maniki be ruma bese matamata 15 idia raraia mai daradara danu, unai ruma bese momo be guna ma gabu haida dekenai ai gaukara hebou. Hua 6 murinai gaukara taudia haida idia ginidae edia ruma bese danu bona idia ta be guna Algeria dekenai ia bapatiso hahine Cecilia​—⁠lau do ia bamoa taihuna!

March 23, 1978 be ia kahirakahira bona ai laloa noho Iesu ena Mase Anibou laloatao be edena bamona do ai karaia. Siti badana, Paramaribo, dekenai ai lao dala be lasi dainai, ai hegaegae lauegu ruma dekenai do ai hebou. Kamepa ia naria tauna ese gwaumaoro ia henia Gima Kohorona ta ena murina rau dekenai anibou ia herevalaia sivaraina be masini dekenai kopi haida do ai karaia, bena kamepa ena ruma ta ta dekenai ai haridia. Hebou dekenai taunimanima ibounai 21 idia mai! Cecilia ese tok ia henia bona lau ese siri lau duahidia. Ena be ai be sibona gunika dekenai, to unai hanuaboi ai mamia ai be Iehova ena orea tanobada hegegemadai danu ai lalo-tamona.

Iehova ena Witness taudia edia Suriname branch opesi ese misinari ta mai adavana idia siaidia mai Land-Rover gunana ta amo ai idia durua totona. Idia do mai lasi neganai egu hemami be hegeregere lau noho kava bamona, to unai misinari ese lau idia hagoadaia, idia gwau: “Pepita, iniseni oi mai be mai anina.” Unai neganai edia hereva anina lau abia lasi to gabeai lau lalo-parara.

Dina ta unai misinari edia vadivadi lalonai, dala matamata ta ai itaia bona ai moale bada Amerindia hanuadia haida be 50 kilomita emai kamepa amo ai davaridia dainai. Dina haida ai haroro henidia murinai, unai manau Arawak India taudia momo danu Baibel stadi ai hamatamaia. Unai dainai, unai misinari taudia idia giroa lou edia gabu neganai, Cecilia bona lau ese pura ta ta iboudiai nega rua unai hanua taudia ai vadivadi henidia.

Daba 4 o’clock ai noga bona Baibel stadi ginigunana be 7 o’clock ai ai hamatamaia. Adorahi ai 5 o’clock bamona ruma dekenai ai giroa vadaeni. Lagani rua lalodiai pura ta ta iboudiai stadi ibounai 30 ai hakaudia. Natudia danu idia manada dainai lau dekenai idia boiboi Lala Baibel! Momo herea ese bapatiso idia abia bona lagani haida murinai, unai hanua ai sekit hebouhebou ta idia karaia neganai taunimanima 182 idia lao. Oibe, egu misinari turana ena hereva bamona, gunika lalonai ai noho be mai ena anina!

Ai Lao Papua New Guinea Ai

Suriname ai rakatania lagani 1980 ai bona murina laganinai ai idia siaia lao Papua New Guinea dekenai. Port Moresby ai tadikaka danu hua 6 mai moale danu lau noho murinai, helicopter ta ese lau ia abia lao egu noho gabuna matamata ororo badadia lalodiai, unuseni Jack ena kampani be golo mine ai idia gaukara. Motuka edia heau dala be lasi. Taunimanima, gaukara kohudia, bona aniani ibounai be peleini amo idia mailaia. Lau loaloa gabu ibounai amo inai gabu dekenai be hegeregere sibogu lau noho bamona. Ma sibona lau henanadai, Edena gabu dekenai hereva henia taudia do lau davaridia?

Kamepa ai idia noho taudia idia diba lau bona idia ura lasi lauegu hereva idia kamonai. Vadaeni, kampani ese sitoa ta idia haginia. Gabu daudau amo hahine idauidau idia mai hoihoi totona. Nega momo lau diho lao unai sitoa dekenai. Unai dala amo huahua ia havaraia, a?

Dina ta Papua hahine ta danu ai kiki hebou. Lau ia hamaoroa ia be hahediba hahine ta. Lau gwau: “O, Lau danu be hahediba gaukara lau karaia.”

Ia henanadai: “Momokani, a?”

Lau gwau: “Oibe, lau ese Baibel lau hahedibalaia.” Bena lau nanadaia Baibel stadi totona bona ia gwau ia ura. Gabeai unai bamona hoihoi taudia ma haida lau davaridia bona idia ura. Unai golo mine badinai gabu maragi ai Baibel stadi ibounai 7 lau hakaua​—⁠oibe, lauma dalanai unai gabu be golo momo ia noho gurina ta bamona!

Unai Pacific motumotu ai lagani toi ai noho murinai, ma gaukara matamatana ta totona ai idia siaia lao Caribbean motumotu kahanai, gabu ladana Grenada dekenai. To lagani ta mai kahana ai noho murinai, egu adavana ia gorere dainai ai giroa lao United States dekenai, bena lagani 1986 ai Idaho ena gabu ta, ladana Boise dekenai emai noho ruma ai karaia.

Kongregesen Danu Gaukara Hebou Karana

Lagani momo lau sibona lau gaukara, to hari Keristen tadikaka bona taihu danu lau gaukara hebou be ia auka sisina. To Keristen elda taudia bona ma tadikaka haida ese mai lalokau danu lau idia durua ma haida danu gaukara hebou karana lau manadalaia totona. Hari lau ese unai gabu dekenai hebou lao henia bona Baibel stadi hakaua karadia lau moalelaia dikadika.

To nega haida, sibona lau helai neganai, Bangkok dekenai Eva murinai lau heau eiava Australia ena tano gagaenai Basileia ane lau abia badabada o Suriname gunika ai Amerindia taudia edia manau kara lau laloa neganai, moale ese lau ia hahonua dainai lau tai, badina ena be tano gagaena, gunika o motumotu ai, to Iehova ena gaukara lau karaia bona ia ese lau ia naria.​—⁠Josefa ‘Pepita’ Abernathy ena sivarai.

[Picture on page 15]

Melbourne dekenai, Spain gado ai egu Baibel stiuden ida, ane ai abia

[Pictures on page 16]

Papua New Guinea taudia momo lau durudia Iehova idia dibaia totona

Dirava ena Hereva lau hadibadia Suriname ai

[Picture on page 17]

Hari lau be Idaho kongregesen ai lau hesiai