Mase Taitailaia Karana be Ia Kerere, A? — Gima Kohorona INTANET LAIBRI

Baibel Ena Haere

Mase Taitailaia Karana be Ia Kerere, A?

“LAU ESE TOREISI LOU HELARONA LAU ABIDADAMA HENIA MOMOKANI, BONA LAU LALOA BEMA TAUNIMANIMA VAIRANAI EGU LALOHISIHISI DO LAU HAHEDINARAIA DO LAU KERERE, BADINA DO IDIA LALOA HELARO GOADANA LAU ABIA LASI. LAU LALOA BEMA TOREISI LOU DEKENAI LAU ABIDADAMA MOMOKANI EGU LALOHISIHISI DO IA HAMARAGIA.”—CHARLENE, LAGANI 21 GUNANAI IA BAPATISO KERISTEN TA.

OI LALOKAU henia tauna ta ia mase neganai, ena be guna oi laloa reana oi davaria lasi, to madi emu mamina bona kara idaudia haida—gari, badu, hemarai, bona lalo-metau do idia hedinarai. Mase taudia be do idia toreisi lou bona Dirava ena Basileia lohia siahuna henunai idia be tanobada paradaisona lalonai do idia noho Baibel ese ia gwauhamatalaia, bona unai ese Keristen tauna ia hamoalea bona ia durua mase ia havaraia hisihisina mamina ia hamaragia totona. (Ioane 5:28, 29; Kara 24:15; Apokalupo 21:1-4) To Charlene ena hereva ese idia hahedinaraia hegeregerena, edia lalokau tauna ta ia mase neganai, ena be ia maoro lasi to Keristen taudia haida be metau bada idia huaia—idia laloa idia ta be ia kerere, bona idia laloa bema idia lalohisihisi unai ese ia hahedinaraia Baibel ena gwauhamata toreisi lou dekenai idia abidadama henia lasi.

To, mase taitailaia karana dekenai Baibel be dahaka ia hereva? Emu lalokau tauna ta ia mase neganai oi taitailaia be ia kerere, a?

Mase Dainai Idia Tai

Taunimanima momo be Abraham ena abidadama karana idia diba. Hetoho ia davaria neganai, Abraham ese “iena natuna Isako ia abia, boubou gauna bamona Dirava dekenai.” (Heberu 11:17; Genese 22:9-13) Reana, ema bona iena negai tau ta lasi be mase amo ia toreisi lou, to Abraham be mai ena abidadama, ia diba “bema Isako ia mase Dirava be mai ena siahu do ia hatorea isi lou.” (Heberu 11:19) Abraham ena abidadama ia tohoa ena lagani 12 murinai, ena adavana Sara ia mase. Unai abidadama tauna be dahaka ia karaia? Baibel ese ia hahedinaraia “ruma dekenai ia raka vareai, Sara totona ia tai-tai.”a (Genese 23:2) Oibe, unai tau be mai ena abidadama, ia diba Dirava ese mase taudia ia hatoredia isi lou diba, to taunimanima vairanai ia taitai. Abraham be abidadama bada tauna idia gwauraia, ita tohotohoa totona.—Heberu 11:8-10.

Kudou ia hamarerea haheitalai ta be Iesu Keriso, ia ese taunimanima vairanai ia lalokau henia tauna ia mase neganai ia taitailaia. Iesu ena turana namona, Lasaro, ia mase neganai sivarai ia gwau: “Maria be Iesu ia noho gabuna dekenai ia ginidae, ia itaia, vadaeni ena aena badinai ena kwarana ia atoa diho, ia gwau, ‘Lohiabada e, iniseni bema oi noho be egu taihuna ia mase lasi.’ Maria bona inai Iuda taudia ia danu idia raka hebou be idia taitai, vadaeni Iesu ese idia ia itaia, iena lalona ia metau bona ia hisihisi bada, mamina ia abia momokani. Vadaeni, ia henanadai, ia gwau, ‘Edeseni umui atoa?’ Idia haere, idia gwau, ‘Lohiabada e, oi mai, oi itaia.’ Iesu ia tai.”—Ioane 11:32-35.

Dirava ena goevadae Natuna be taunimanima vairanai ia tai hemaraina ia hemarai lasi, unai ita diba dainai ita moale. Gado gunana momokanina dekenai “ia tai” be (da·kryʹo) bona ena anina be “rege lasi dekenai matana ranu idia diho.” Danu gau namona be inai, guna Iesu ese taunimanima rua ia hatoredia isi lou—vabu ta ena natuna Nain dekenai bona Iairo ena natuna kekeni—bona Lasaro ia hatorea isi lou gwauraia danu. (Luka 7:11-15; 8:41, 42, 49-55; Ioane 11:11 itaia danu.) Miniti haida gunana ia ese Mareta ia hamaoroa, ia gwau: “Toreisi lou be lau inai, mauri danu be lau. Lau dekenai ia abidadama henia tauna, ia be do ia mase, to do ia mauri lou.” (Ioane 11:25) To, ia hebogahisi bada dainai Iesu ena matana ranudia idia bada bona idia diho.

To mai anina bada gauna ta ese unai kara ia hanaia. Iesu ena “toana be [Iehova] ena toana hegeregerena.” (Heberu 1:3) Ena lalokau tauna ta ia mase neganai, Iesu be mai ena hebogahisi bona taunimanima laloa bada karana ia hahedinaraia, bona unai ese iseda guba Tamana, Iehova, ena kara ia hahedinaraia. Iesu ena mamina ese idia hahedinaraia Dirava be ena hesiai taudia edia lalohisihisi dainai ena kudouna be hebogahisi amo ia honu.—Salamo 56:8.

Vadaeni, ia hedinarai goevagoeva, emu lalokau tauna ta ia mase neganai emu lalohisihisi oi hahedinaraia be ia kerere lasi. Sara ia mase neganai Abraham ese ia taitailaia. Iehova Dirava ese ita “ia naria noho” dainai, iseda lalohisihisi mamina ia lalo-pararalaia.—1 Petero 5:7.

To, Keristen ena helaro be edena bamona? Ita ia durua diba, a?

‘Haida Bamona Ita Lalohisihisi Lasi’

Idaunegai Tesalonika Keristen kongregesen lalonai, haida ese edia tomadiho orea taudia idia mase dainai idia taitailaidia, bona aposetolo Paulo ese ia hagoadadia toho, ia gwau: “Aiemai varavara taudia e, ai ura lasi mase dekenai idia mahuta taudia totona umui daradara. Umui lalohisihisi lasi, ekalesia lasi taudia bamona, madi idia laloa goada diba lasi.” (1 Tesalonika 4:13) Oibe, Dirava ese mase taudia do ia hatoredia isi lou ena gwauhamata herevana idia abia dae taudia be lalo-goada idia abia, to toreisi lou ena helaro idia abia dae lasi taudia be lalo-goada idia abia lasi.b Edena bamona?

Idia mase gwauraia neganai, toreisi lou ena helaro idia abia dae lasi taudia idia dara doko. Ena be reana idia gwau mase murinai mauri ma ta do idia abia, to idia momo lasi ese unai hereva amo lalo-goada idia davaria. Taunimanima ma haida, idia lalohisihisi bada badina edia lalokau taudia be mase dekenai idia rakatanidia sibona lasi, to idia laloa do idia davaridia lou diba lasi. Toreisi lou ena sivarai idia lalo-pararalaia lasi dainai, edia lalokau taudia idia guridia neganai edia helaro idia guridia danu; Idia laloa unai taudia do idia itadia lou diba lasi.—Korinto Ginigunana 15:12-19, 32 itaia.

To, Keristen momokani taudia be unai bamona lasi. Paulo ia gwau, mase be mahuta bamona—mase tauna be gau ta ia diba lasi, ia mahuta mase bamona, to toreisi lou karana amo mase amo do ia noga diba. (Salamo 13:3; Kohelete 9:5, 10) Baibel dekena amo idia abia helarona ese ia durudia.

Ena lalokau tauna ta ia mase neganai, Keristen tauna be abidadama lasi taudia bamona ia lalohisihisi, badina ia bamoa tauna ia boio, ena vairana ia itaia lasi, bona unai lalokau tauna ena gadona ia kamonai lasi dainai. Ena be toreisi lou ena helaro oi abia dae, to unai ese emu kudouna ena hisihisi ia koua lasi. To, unai helaro ese oi ia durua emu taitai karana oi hamaragia eiava oi laloa maoromaoro totona. Oibe, unai helaro ia noho dainai, ita gwau lasi mase tauna taitailaia karana be anina lasi, to ita ia durua iseda lalohisihisi ita haheaukalaia totona.

[Footnotes]

a Heberu hereva idia hahanaia “taitailaia” ia herevalaia neganai, Theological Wordbook of the Old Testament bukana ia gwau: “Tau ta ia mase neganai taunimanima idia mai ena ruma bese taudia ida edia lalohisihisi do idia hahedinaraia totona. . . . Nega momo edia kara be idia boiboi bada eiava rege bada ida idia taitai edia lalohisihisi hahedinaraia totona.” Heberu hereva idia hahanaia “mata ranu” ia herevalaia neganai, unai buka ia gwau: “Mata ranu be matadia amo idia diho, to taitai karana be gadona amo idia karaia; Sem natuna taudia be rege lasi dekenai idia taitai lasi, to mai edia rege bada ida. . . . T[aravatu] G[unana] lalonai ia hedinarai taunimanima idia taitai badina vaia unai dala amo edia lalohisihisi mamina idia hahedinaraia.”

b Paulo ese idaunegai Keristen ginigunana taudia ia tore henidia, bona idia edia helaro be mase amo do idia toreisi lou guba dekenai bona unuseniai Keriso danu do idia lohia hebou. (1 Tesalonika 4:14-17; Luka 22:29, 30 itaia danu.) Paulo ese idia ia hagoadadia, ia gwau Keriso do ia giroa mai neganai idia huanai idia mase abidadama taudia be do idia toreisi lou bona Keriso bona idia danu do idia noho hebou lou. To, Baibel ia gwau helaro ia noho idia mase taudia momo herea do idia toreisi lou tanobada paradaisona matamatana dekenai.—Ioane 5:28, 29; Apokalupo 21:1-4.

[Picture Credit Line on page 26]