Muramura Matamatadia Tahua be Gaukara Namo Hereana

Noga! toretore tauna Britain ai ese ia torea

Raba, koko, koten, bona hisihisi koua muramuradia be edena dala amo idia tamona? Iboudiai be tubutubu gaudia amo ita abia. Fotosintisis dalana amo suga bona oksijen idia karaia, to danu grin tubutubu gaudia ese kemikal idauidau amo ma kemikal idauidau momo idia havaraia diba. Unai kemikal ma haida dainai, tubutubu gaudia edia toana be idauidau.

AVA ginigini ena hisihisi siahuna, apolo ena mamina, bona rose palaoapalaoa ena bonana namona idia idau badina tubutubu gaudia ese sibodia edia kemikal gaukaralaia daladia be idauidau. Unai dainai, ena be oi laloa gau tamona idia gaukaralaia, to lasi, gau idauidau momo be unai gau tamona lalonai idia noho.

Tubutubu Gaudia Edia Kemikal Faktori

Namona be koko ena bonana oi laloa. Ema bona hari saiens taudia be koko dekenai varahu ai idia lao kemikal idauidau 84 idia davaria, unai kemikal iboudiai haboua karana amo ena bonana ia vara; guna unai oi diba, a? Koko au huahuadia lalodiai gau idauidau momo idia noho, bona hari idia ore laganidia haida lalodiai taunimanima idia hekwarahi bada unai gau idauidau do idia diba totona. Bona unai be tubutubu gauna tamona sibona.

Kolesterol be digara ta; taunimanima idia laloa ia be kudou gorere ia havaraia. To, tubutubu gaudia haida dekenai, ia be gau badana mai anina bada kemikal haida, ladadia steroid idia karadia hamatamaia totona. Steroid lalodiai idia noho gaudia be vitamin D, homon (hegeregere kotison), bona muramura haida, hegeregere, bero ena hisihisi ia koua kemikal ta ladana betametason. Muramurana ta ladana diosjenin be uda maho amo idia karaia; ia be steroid ta bona rogorogo koua muramuradia dekenai idia gaukaralaia. To, kotison be idau, hekojenin amo idia karaia, idia be sisal rauna amo faiba idia karaia murinai unai rau ena orena momoruna amo steroid idia kokia. Hari inai negai, drag matamatadia momo idia karaia diba badina guna tubutubu gaudia amo gau haida idia kokia dainai.

Tubutubu Gaudia Bona Taunimanima

Ena be hari sibona medikal aonega dainai taunimanima ese sibodia idia karaia kemikal amo drag idia karaia diba, to lagani tausen momo lalodiai tubutubu gaudia amo idia kokia gaudia idia gaukaralaidia taunimanima edia gorere hanamodia totona. Idaunegai Asuria taudia edia toretore lalonai idia hahedinaraia palaoapalaoa ta ladana anemone idia gaukaralaia hisihisi mamina hamaragia totona. Bona idaunegai medikal revarevadia ese idia hahedinaraia Farao edia nega amo tubutubu gaudia haida idia gaukaralaidia gorere hanamoa muramura karaia totona.

Orea ta ladana The World Health Organization ese tanobada hegegemadai gorere koua totona idia gaukaralaia vadaeni tubutubu gaudia 20,000 idia toredia. Britain dekenai, lagani ta ta iboudiai, muramura karaia totona idia gaukaralaia tubutubu gaudia idauidau edia metau be 6,000 ia lao 7,000 tonne bamona bona idia gaukaralaidia muramura idauidau 5,500 bamona idia karaia totona. Bona United States dekenai, idia gwau doketa iboudiai amo 50 pesen ese muramura abia totona pepa idia torea neganai, unai muramura be tubutubu gaudia amo idia mai.

Muramura Matamatadia Davaria Dalana

Idia diba tanobada hegegemadai tubutubu gaudia idauidau be 250,000 bamona, idia ta ta iboudiai dekenai idia noho kemikal haboua daladia be idauidau momo, unai dainai saiens taudia be hanaihanai unai kemikal idauidau idia stadilaidia badina idia ura muramura namodia do idia karaia. Dala namona ta be idia ese taunimanima edia kara idia tahua, edia gabu dekenai tubutubu gaudia edena bamona idia gaukaralaia gorere hanamodia totona idia stadilaia.

Kokein muramura idia davaria dalana be idia itaia taunimanima ese edia hitolo mamina koua bona edia manoka mamina kokia totona idia ese koka raudia idia gauaia. Muramura karaia taudia ese kokein lalonai ia noho molekiul idia kokia bona idia haidaua neganai, muramura matamatana ta idia karaia. Unai muramura be tauanina ena kahana ta dekenai idia atoa neganai hisihisi mamina ia koua diba. Bema isena doketa ese oiemu aukina kahana ta dekenai muramura ia kodoa hisihisi oi mamia lasi totona bena emu isena ia tamoru bamona, vadaeni saiens taudia edia gaukara ese oi ia durua unai.

Tubutubu gaudia idia gaukaralaia daladia namodia momo be tubutubu gaudia idia stadilaia taudia edia faila dekenai idia haboudia. Saiens taudia be lagani hani bona nega ma haida Harvard University ena Gray Herbarium bona Arnold Arboretum dekenai tubutubu gaudia milion 2.5 idia stadilaidia, bona guna taunimanima idia reaia tubutubu gaudia 5,000 idia davaridia, bona idia gwau reana unai gaudia amo muramura do idia karaia diba.

Stadi karana ma ta amo idia ese tubutubu gaudia dekenai idia noho kemikal idauidau idia hahegeregeredia. Bema tubutubu gauna ta lalonai idia gaukaralaia diba gau namodia idia davaria, reana unai tubutubu gaudia edia orea lalonai tubutubu gaudia ma haida be namo danu. Saiens taudia ese not Australia ena au ta ladana Moreton Bay chestnut, idia stadilaia neganai, gau ta ladana kastanospemin idia davaria, unai be mase ia havaraia muramurana ta, to vairas ia tuari henia. Unai dainai tubutubu gaudia idia stadilaia taudia ese unai tubutubu orea lalonai au ma haida idia tahudia bona idia gwau namona be South America ena Alexa auna do idia stadilaia.

Kensa Koua Daladia Idia Stadilaia

Nega haida idia davaria gaudia ese idia hakaudia kerere bona idia davaria gauna be ma ia idau. Hegeregere, guna, idia gwau Madagascar periwinkle amo idia kokia gauna be namo suga gorere idia abia taudia durudia totona. Canada saiens taudia ese periwinkle amo idia kokia gauna idia stadilaia, to idia hoa badina periwinkle amo idia abia gauna ese rara ena kurokuro sel havaraia karana ia hamaragia bona unai neganai tauanina ese gorere ia koua namonamo diba lasi. Unai ia vara dainai doketa taudia idia laloa namona be idia gaukaralaia toho lukimia gorere dekenai, unai be rara ena kurokuro sel ia ania kensana.

Gabeai, idia davaria gau idauidau 90 idia kokia, bona idia rua, edia ladadia be vinkristin bona vinbalastin, idia amo muramura idia karaia diba. Tubutubu gauna dekenai unai gau rua be sisina sibona idia noho, bona vinkristin ena bada gram 2 do idia davaria totona idia ese unai tubutubu gaudia edia metau tonne tamona bamona idia gaukaralaia. Hari inai negai, tanobada hegegemadai, unai gaudia bona ma gau haida idia gaukaralaidia bena kemoterapi idia henia dalana amo natudia edia lukimia gorerena idia hamaragia diba.

Lagani 1960 kahirakahira ai, U.S. National Cancer Institute oreana ese lagani 25 stadi karana ia hamatamaia, unai lagani lalodiai idia ese tubutubu gaudia idauidau 40,000 amo gau idauidau 114,000 idia kokidia bona kensa gaudia dekenai idia atoa badina idia ura diba unai kensa do ia koua eiava lasi. Tubutubu gaudia amo idia kokia gaudia idauidau 4,500 bamona be mai edia siahu, unai dainai ma idia stadilaidia noho. To drag idauidau ia stadilaia tauna, Dr. W. C. Evans ese ia hahedinaraia ena be mai anina bada gaukarana idia karaia, to ia gwau: “Reana kensa ibounai koua drag haida be do idia davaridia lasi” unai gaudia idia stadilaia karana amo. Kensa toana be idauidau momo, bona gorere tahua karana idia karaia neganai idia tubu haraga kensa haida mo sibodia dekenai idia gaukaralaidia.

Idia Do Tubu Noho Gaudia amo Muramura Matamatadia Idia Karaia

Aonega taudia ese ita diba vadaeni tubutubu gaudia idia lalodia matamaia lou. Hegeregere, harihari sihoa idia gaukaralaia mumuta karana koua eiava hamaragia totona, bena ia be namo herea motuka eiava bouti dekenai mumuta mamina idia abia taudia durudia totona.a To mai anina bada gauna be inai: sihoa ia namo bada badina reana siahu gabuna dekenai bilharsia gorere ia havaraia parasait idia davaria taudia ia durudia diba. Nigeria lalonai, unai gorere idia davaria sikuli natudia dekenai dala ta amo idia tohoa, sihoa pauda amo idia karaia tablet idia henidia, bona hari edia mei dekenai rara ia noho lasi bona bilharsia gatoi edia namba ia diho ia lao.

Muramura matamatadia ma haida do idia davaria totona, tubutubu gaudia idia stadilaia taudia edia gaukara bada herea ia do noho. Ena be tubutubu gaudia haida idia diba namonamo vadaeni, to idia lalonai gau haida idia do diba lasi. Harihari likoris idia gaukaralaia momo badina ia lalonai idia davaria kemikal idauidau be namo herea bero ena siahu ia koua totona, bona unai kemikal amo idia abia muramuradia ese roki idia davaria taudia haida idia davaria hisihisina idia hamaragia diba. Saiens taudia danu be pi uhena idia stadilaia fungus bona maikrob koua dalana idia davaria totona.

Tanobada ena kahana idauidau ai, idia do stadilaia lasi tubutubu gaudia idia hadikadia ore noho dainai, idia gaukara haraga haraga muramura matamatadia do idia davaridia totona. Tubutubu gaudia, idia diba namonamo vadaeni tubutubu gaudia danu, edia kemikal stadilaia bona edia jenetik haboioa lasi stadilaia karana be mai anina bada gaukarana. To idia do diba lasi hehuni gauna ta be inai: Unai idau momokani kemikal idauidau be edena bamona unai tubutubu gaudia idia durudia? Hegeregere, dahaka dainai purslane tubutubu gauna ese noradrenalin bada ia havaraia, badina unai homon be gau badana taunimanima dekenai?

Momokani, iseda diba tubutubu gaudia edia gau maragimaragi momo herea bona gau idauidau momo dekenai be ia do maragi herea. To ita diba gaudia ese palani badana ta ia hahedinaraia, bona iena Havaraia Tauna Badana ita hanamoa.

[Footnotes]