Sikuli Lou—Dahaka Dainai?

LAGANI toi lalonai, mai lalo-hekwarahi bada ida Robert be gaukara ia tahua. Dokonai, ena mauri lagani be 21 neganai, sikuli holidei lalonai memero kekeni edia kamepa ta dekenai, sisiba henia gaukara ia abia. Unai neganai, ena lalo-hekwarahi ia ore sisina bona Robert be gaukara ia tahua ena hekwarahi dainai ia hesiku. Ia gwau: ‘Emai tama sina idia lalo-parara lasi. Hari inai nega lalonai, gaukara tahua be mai ena hekwarahi bada.’

Robert bamona, lagani ta ta matamata taudia be sikuli idia rakatania neganai, gaukara idia abia. Idia be mai edia helaro. Idia be mai edia palani. To momo be idia davaria idia ura karaia gaukarana idia abia diba lasi.

Unai dainai, momo be idia do sikuli noho edia diba habadaia totona.a Fortune magasin ia gwau: ‘Reana lagani 1970 murinai idia hahedinaraia sikuli be anina lasi bamona, to lagani 1980 murinai lalohadai ta ia hedinarai: koledi kwalimu pepana oi abia be namo, bema lasi, do oi hekwarahi bada.’

Dahaka Dainai Idia Hekwarahi?

Dahaka dainai sikuli ma haida dekenai lao be mai anina bada? Badina ginigunana be, hari gaukara ta karaia totona diba bada oi abia be namo. U.S. Labor Department ena hereva tauna ia gwau: ‘Banika dekenai moni ia abia tauna ena gaukara be hari moni masini ese ia karaia. Hari, banika dekenai ia gaukara tauna ese egu moni be edena dala toi amo lau habadaia diba, bona dahaka dainai unai ta lau abia hidi be namo, bona edena lau dadaraia ia gwauraia hedinarai sibona. William D. Ford, House Education and Labor Committee ena seamani be inai bamona ia hereva: “Idia auka lasi gaukara be idia ore vadaeni.”

Badina iharuana be, haida idia laloa sikuli ese stiuden taudia idia hadibadia namonamo lasi. Idia gwau, hekwakwanai hegeregere drag ania kava karana, AIDS, bona rogorogo koua daladia idia hadibalaidia momo dainai, duahiduahi, toretore bona matematiks idia hadibalaidia namonamo lasi. Dr. Robert Appleton, lagani 27 lalonai ia hahediba tauna, ia gwau sikuli ena hahediba dalana be “welfea gaukara oreana” ena bamona; maduna metauna ia huaia, badina “guna idia karaia lasi, to hari sikuli ese heduru ia henia hekwakwanai idauidau hanaidia totona.”

Sikuli haida be memero kekeni dekenai gaukara karaia dalana idia hadibaia lasi dainai, momo be sibodia idia naria diba lasi, sikuli idia rakatania murinai. Florida’s Job Service ena opesi ta ia naria tauna, Joseph W. Schroeder, ia gwau: ‘Idia hadibadia lasi idia gaukara totona. Gaukara biagudia idia gwau, matamata taudia edia hekwakwanai be idia duahiduahi namonamo diba lasi eiava idia toretore namonamo diba lasi. Idia ese gaukara tahua fom idia hahonua diba lasi.’

Haida idia ura edia diba idia habadaia badina ihatoina be, koledi idia haorea matamata taudia momo herea be gaukara idia tahua noho. The New York Times niuspepa ia gwau: ‘Koledi idia haorea taudia be momo herea, to idia abia diba gaukara be momo lasi. Unai dainai gaukara biagudia idia ura lasi haisikuli idia haorea taudia idia abidia.’

Idia abia diba gaukarana idia karaia totona, momo be idia giroa lao sikuli, diba idia abia totona. United States dekenai, 59 pesen be haisikuli idia haorea murinai, ma sikuli haida dekenai idia lao. Unai namba be lagani daudau lalonai ia noho 50 pesen ena namba ia hanaia.

Unai bamona kara be ma tano haida dekenai idia vara danu. Hegeregere, lagani 1960 ema bona hari, Britain lalonai taravatu dainai idia lao sikulina idia haorea murinai, ma sikuli haida dekenai idia lao stiuden taudia edia namba ia bada daekau noho. Vanegai lagani tamona lalonai, Australia dekenai haisikuli idia haorea murinai, 85 pesen ese aplikeisen idia atoa, iunivesiti bona koledi dekenai idia lao totona. Japan dekenai, stiuden iboudiai 95 pesen bamona ese eksam idia abia, ma lagani toi lalonai idia sikuli noho totona. Unai sikuli lalonai idia be gaukara totona eiava koledi totona idia hegaegae.

To, nega haida edia diba ia habadaia sikulina ese idia ura hahenamo gaudia ia havaraia lasi. Unai sikuli edia namo bona edia dika be dahaka dahaka?

[Footnotes]