Sikuli Ma Ta Dekenai Do Oi Lao Eiava Lasi?

LAGANI hida do oi sikuli, diba oi abia oi gaukara totona? Tano ta ta dekenai haere be idauidau. Guna ia idau, to hari ia hedinarai tano momo dekenai, ta ese sibona ia naria totona do ia sikuli daudau bona ena diba do ia habadaia be namo. Nega haida taravatu dainai sikulina sibona be hegeregere lasi.

Unai dainai, sikuli idia haorea taudia momo be idia giroa lou sikuli dekenai, gaukara gabudia idia lao lasi. Oibe, do idia abia hahenamo toana be namo herea. The New York Times niuspepa ese Economic Policy Institute ena ripoti amo inai hereva ia gwauraia, “haisikuli idia haorea gaukara tataudia be lagani 1979 ia lao 1987 lalonai edia davana ia diho 7.4 pesen amo, to idia ida idia gaukara hebou koledi idia haorea taudia davadia be 7 pesen amo ia daekau.”

Koledi idia haorea taudia edia kwalimu pepana ese dala ia kehoa gaukara idauidau idia abia totona. William B. Johnston, Hudson Institute edia tahua gaukara ia gunalaia tauna badana, ia gwau: “Koledi kwalimu pepana, eiava koledi dekenai oi lao, be mai anina bada, inai tano dekenai gaukara abia totona.”

To namona be ita diba, koledi idia haorea taudia be idia hekwarahi bada danu gaukara idia tahua totona, bona gaukara be lasi neganai, idia haida idia hadokodia bena idia noho kava. Tauhau Karl, ena mauri lagani be 22, ia gwau: “Egu turadia ibounai nega tamona sikuli ai haorea be idia gaukara lasi.” Jim ena mauri lagani be 55, be iunivesiti namona ta amo kosi ia haorea, mai ena maka bada ida, to February 1992 lalonai ena gaukara ia ore dainai ia noho kava. Ena iunivesiti kwalimu pepana ese ia durua lasi, bona ia durua lasi ia karaia hanaihanai gaukara namona davaria totona. Ia gwau: “Oi haginia badina aukana be miri ai ia lao.”

Jim bamona, koledi idia haorea taudia sisina momo be U.S.News & World Report ese ia gwauraia “opesi gaukara taudia edia hekwakwanai badana idia davaria”​—edia mauri laganidia be hegeregere lasi idia ritaia totona, to idia buruka dainai ma kampani haida ese idia abidia lasi.

Unai dainai, ena be koledi lao karana be mai ena hahenamo haida, to ia ese hekwakwanai ibounai ia hanamodia lasi. Unai dala sibona amo do ita kwalimu lasi. Herbert Kohl ena buka ladana The Question Is College lalonai, ia gwau: “Taunimanima momo be koledi dekenai idia lao lasi to edia mauri lalonai idia kwalimu, bona gaukara namodia momo idia noho, koledi ai idia sikuli lasi taudia ese idia karaia diba.” Hegeregere, kampani ta ese koledi idia lao lasi taudia idia abidia gaukara totona, kampani haida dekenai unai gaukara be koledi taudia ese idia karaia. Unai kampani ese koledi kwalimu pepadia idia tahua lasi, to mai goada ida idia gaukara namonamo taudia idia tahudia. Unai kampani tauna ta ia gwau: ‘Unai bamona tauna ai davaria neganai, ai laloa gaukara ta karaia dalana ai hadibaia diba.’

Oibe, ena be momo be koledi ena kwalimu pepana idia abia lasi, to idia sibodia bona edia ruma bese taudia idia naridia namonamo. Haida be vokeisinol sikuli, teknikol sikuli eiava komiuniti koledi dekenai kosi idia karaia; unai sikuli dekenai moni momo bona nega bada idia halusia lasi.a Haida be sikuli dekenai idia lao lasi to sibodia gaukara ta idia dibaia. Idia hahedinaraia edia gaukara idia karaia namonamo diba dainai idia gaukara noho.

Lalohadai Maorona

To momokani, herevana dahaka sikuli​—koledi eiava ma diba habadaia sikulina ta​—ita gwau diba lasi idia ese ita idia durua ita kwalimu totona. Bona danu Baibel ese ia gwauraia maoro hegeregerena, “inai tanobada, hari ia noho toana bamona, be kahirakahira do ia ore.” (1 Korinto 7:31) Hari idia ura henia bada gauna be reana do anina lasi kerukeru.

Unai dainai, namona be edukeisini bada ia ura abia tauna ese ena namo bona dika ia laloa namonamo be gau badana. ‘Unai sikuli davana lau karaia diba, a? Edena bamona mauri bona hebamo do lau davaria? Lau dibaia gauna ese lau do ia durua sibogu lau naria totona, a? Bema lau headava neganai, lau do ia durua egu ruma bese lau naria totona, a?’ Baibel ese ia gwauraia hegeregerena, tama sina ese heduru sisiba namodia do idia henia edia natudia dekenai. (Deuteronomi 4:10; 6:​4-9; 11:​18-21; Aonega Herevadia 4:​1, 2) Bema oi be diba bada ese do ia mailaia diba moni bada hahenamona oi laloa noho, eiava ma gau haida, Iesu ena hereva be mai anina oi dekenai, ia gwau: “Bema tau ta ia ura kohoro ruma do ia haginia, ia be guna do ia helai diho, bona haginia ena davana do ia laloa, bema ia be ruma do ia karaia haorea diba, o lasi?”​—Luka 14:28.

Momokani, bema oi ura diba bada edukeisini oi abia, do oi lalohadailaia namonamo be gau badana. Keristani tauna ese nega ibounai Iesu ena hereva Mataio 6:33 dekenai ia laloa, ia gwau: “To umui ese Dirava ena Basileia bona [emui guba Tamana] ena kara maoromaoro do umui tahua guna, vadaeni unai gau ibounai danu umui dekenai dohore ia henia.” Keristani momokani taudia huanai, diba bada idia abia lasi taudia be kavakava taudia eiava anina lasi taudia idia gwauraidia lasi. Diba bada taudia idia dadaraidia lasi; idia be hekokoroku taudia idia gwauraidia kava lasi. Aposetolo Paulo ia gwau: “Oi be daika, tau ta ena hesiai tauna do oi gwauraia kerere? Iena Biaguna sibona ese do ia gwauraia ia be maoro o kerere. Bona ia be do ia gini, badina be Lohiabada ese ia haginia diba.”​—Roma 14:4.

Iesu be unai lalohadai maorona ia hahedinaraia. Ia ese “sikuli bada lasi bona aonega bada lasi” taudia ia dadaraidia lasi, bona edukeisini bada tauna, Paulo ia abia hidi haroro gaukara bada ia karaia totona. (Kara 4:13; 9:​10-16) Herevana edena dala oi abia hidi, to edukeisini be ena gabu korikori dekenai oi atoa be namo. Hereva gabena ese unai do ia herevalaia.

[Footnotes]

[Box on page 5]

Edukeisini Daladia Haida

November 1, 1992, ena Gima Kohorona lalonai, Iehova ena Witness taudia bona ful-taim hesiai gaukarana be inai bamona ia herevalaia: “Tano momo dekenai guna moni gaukara namona idia davaria totona edia sikuli negana be kwadogi to hari idia karaia neganai idia halataia. . . . Ena be gavamani ese taravatu ia atoa sikuli laganidia idia haorea, . . . to idia hekwarahi bada moni davana ia hegeregere gaukarana idia davaria totona. . .

“ ‘Moni davana ia hegeregere gaukarana’ ena anina be dahaka? . . . Bema edia mauri durua gaudia idia hoia diba bona edia nega bona goada ia do hegeregere noho edia Keristani hesiai gaukarana idia karaia totona, edia moni gaukara amo idia abia davana ita gwauraia ‘maoro,’ eiava ‘ia hegeregere.’ ”

Unai Gima Kohorona ia gwau: “Namo lasi taravatu aukadia ita karaia ma edukeisini daladia haida ita tahua totona eiava ita koua totona.”